જમ્મુમાં ૮ કલાકમાં બે હવાઈ હુમલા : વહેલી સવારે ફરીથી આવેલા નાપાક ગીધડાઓને ભારતીય ચિત્તાઓએ ભગાડ્યા
જમ્મુ, તા. ૯ : આઠ કલાકની અંદર બીજી વખત પાકિસ્તાની ‘ગીધડના ઝુંડ'ને ભારતીય ચિત્તાઓએ મારી ભગાડ્યા છે. ગઈ રાત્રે સવા આઠ વાગ્યે ડ્રોન અને મિસાઈલોના નિષ્ફળ હુમલા બાદ પાકિસ્તાન તરફથી વહેલી સવારે ત્રણ વાગ્યાની આસપાસ ફરીથી થયેલા હુમલાને નિષ્ફળ બનાવવામાં આવ્યો છે.
સંરક્ષણ સૂત્રોના જણાવ્યા અનુસાર, જમ્મુ સેક્ટરમાં તૈનાત એર ડિફેન્સના ચિત્તાઓએ આ હુમલાઓને નિષ્ફળ બનાવ્યા છે. સંરક્ષણ સૂત્રો આ હુમલાઓમાં ભારતીય પક્ષને કોઈ નુકસાન થયું નથી તેવો દાવો ચોક્કસ કરે છે. જો કે તેઓ કહે છે કે આ હુમલાઓ બાદ ખતરો હજુ ટળ્યો નથી અને પાકિસ્તાન તરફથી ફરીથી હુમલા થવાની સંભાવના યથાવત છે.
૧૯૭૧ના ભારત-પાકિસ્તાન યુદ્ધ પછી આ પહેલીવાર હતું કે પાકિસ્તાન તરફથી સમગ્ર રાજ્યમાં શહેરો અને લશ્કરી સ્થાપનોને નિશાન બનાવવાનો પ્રયાસ કરવામાં આવ્યો હતો. વર્ષ ૧૯૯૯ના કારગિલ યુદ્ધ, ૨૦૦૧માં સંસદ પર થયેલા હુમલા બાદ યુદ્ધ જેવી પરિસ્થિતિ, ઉરી અને પછી પુલવામા હુમલા બાદ ભારતીય સ્ટ્રાઈક દરમિયાન પણ જમ્મુ-કાશ્મીરની જનતાએ આવા હુમલાઓ જોયા નહોતા. એટલું ચોક્કસ હતું કે એલઓસી પર પાકિસ્તાની સેનાની તોપોના મોઢા કયારેય બંધ થયા નહોતા.
અધિકારીઓએ જનતાને સૂચના આપી છે કે બ્લેકઆઉટના સાયરન પછી ન તો કોઈ રોશની કરવામાં આવે અને ન તો આ સૂચનાઓનું ઉલ્લંઘન કરવામાં આવે. તેઓ કહે છે કે દુશ્મનને નબળો ન ગણવો જોઈએ કારણ કે તે ઘાયલ સાપની જેમ છે જે કોઈપણ સમયે ફરીથી ડંખ મારવાનો પ્રયાસ કરશે. જાણકારી માટે જમ્મુનું એરફોર્સ એરપોર્ટ સંપૂર્ણપણે પાકિસ્તાની સેનાની ૧૦૫ એમએમની તોપોની મારની અંદર છે. અને તમામ યુદ્ધો દરમિયાન પાકિસ્તાનનો સમગ્ર ભાર આ હવાઈમથકને નુકસાન પહોંચાડવાનો રહ્યો છે. એટલું જ નહીં, ત્રણ યુદ્ધો દરમિયાન તેણે તવી નદી પર બનેલા પુલોને ઘણી વખત ઉડાવી દેવાનો નાપાક પ્રયાસ કર્યો પરંતુ કયારેય સફળ થયો નથી. આવી સ્થિતિમાં અધિકારીઓ કહે છે
કે ખતરો હજુ ટળ્યો નથી. (સુરેશ એસ ડુગ્ગર દ્વારા)
(4:07 PM IST)
છેલ્લા 8 દિવસમાં સૌથી લોકપ્રિય 
