ઇસ્લામાબાદ: ભારત સાથે વધતા જતા તણાવ વચ્ચે પાકિસ્તાને સીધી રીતે સંઘર્ષથી પીછેહઠ કરવાનો ઇનકાર કરી દીધો છે. એક ઉચ્ચ સ્તરીય પ્રેસ બ્રીફિંગમાં પાકિસ્તાની લશ્કરી પ્રવક્તા મેજર જનરલ અહેમદ શરીફ ચૌધરીએ સ્પષ્ટ શબ્દોમાં કહ્યું હતું કે, "અમે તણાવ ઓછો નહીં કરીએ. ભારતે તેમના દ્વારા કરવામાં આવેલા નુકસાનના જવાબની અપેક્ષા રાખવી જોઈએ."
તેમણે વધુમાં જણાવ્યું હતું કે પાકિસ્તાની સેના પોતાના વલણ પર કાયમ રહેશે અને ભારત દ્વારા કરવામાં આવેલી કોઈપણ કાર્યવાહીનો જડબાતોડ જવાબ આપશે. તેમણે ભારત પર વધુ ડ્રોન હુમલાઓ ચાલુ રાખવાની પણ ધમકી આપી હતી, જેનાથી સરહદી વિસ્તારોમાં સ્થિતિ વધુ તંગ બની ગઈ છે.
પાકિસ્તાનના આ ઉદ્ધત નિવેદનથી બંને દેશો વચ્ચે શાંતિની શક્યતાઓ વધુ ધૂંધળી બની ગઈ છે. ભારતે હજી સુધી પાકિસ્તાનના આ નિવેદન પર કોઈ સત્તાવાર પ્રતિક્રિયા આપી નથી, પરંતુ સુરક્ષા નિષ્ણાતો માની રહ્યા છે કે ભારતે પાકિસ્તાનના કોઈપણ દુસ્સાહસનો યોગ્ય જવાબ આપવા માટે તૈયાર રહેવું પડશે. સરહદી વિસ્તારોમાં ભારતીય સુરક્ષા દળોને પણ એલર્ટ પર રાખવામાં આવ્યા છે.