<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Saturday, 10th May 2025

યુક્રેન 30 દિવસના યુદ્ધવિરામ માટે તૈયાર: રશિયા સાથે ચાલી રહેલ યુદ્ધનો અંત આવે તેવી શક્યતા

ફ્રાન્સ, બ્રિટન, જર્મની અને પોલેન્ડના દિગ્ગજ નેતાઓએ રશિયા પર દબાણ વધારવા અને યુદ્ધ બંધ કરવાના પ્રયાસો પર ચર્ચા કરી.

કિવ: રશિયા અને યુક્રેન વચ્ચે ચાલી રહેલ યુદ્ધ બંધ થવાની અપેક્ષા છે. યુક્રેન અને તેના સાથી દેશો 30 દિવસના સંપૂર્ણ અને બિનશરતી યુદ્ધવિરામ માટે સંમત થયા છે. યુક્રેનના વિદેશ પ્રધાને જણાવ્યું હતું કે આ યુદ્ધવિરામ સોમવારથી શરૂ થશે.

યુક્રેનના વિદેશ પ્રધાન આન્દ્રે સિબિહાએ જણાવ્યું હતું કે યુક્રેન અને તેના સાથી દેશો સોમવારથી ઓછામાં ઓછા 30 દિવસ માટે રશિયા સાથે સંપૂર્ણ, બિનશરતી યુદ્ધવિરામ માટે તૈયાર છે.

 ચાર દેશો  ફ્રાન્સ, બ્રિટન, જર્મની અને પોલેન્ડના નેતાઓ યુક્રેન પહોંચ્યા. આમાં ફ્રાન્સના રાષ્ટ્રપતિ ઇમેન્યુઅલ મેક્રોન, જર્મન ચાન્સેલર ફ્રેડરિક મેર્ઝ, પોલેન્ડના વડા પ્રધાન ડોનાલ્ડ ટસ્ક અને બ્રિટિશ વડા પ્રધાન કીર સ્ટારમરનો સમાવેશ થાય છે. તમામ  નેતાઓ રાષ્ટ્રપતિ વોલોડીમીર ઝેલેન્સકીને મળ્યા અને રશિયા પર દબાણ વધારવા અને યુદ્ધ બંધ કરવાના પ્રયાસો પર ચર્ચા કરી.

ઝેલેન્સકીને મળતા પહેલા, નેતાઓએ એક સંયુક્ત નિવેદનમાં જણાવ્યું હતું કે અમે, અમેરિકા સાથે મળીને, રશિયાને 30 દિવસના સંપૂર્ણ અને બિનશરતી યુદ્ધવિરામ માટે અપીલ કરીએ છીએ જેથી ન્યાયી અને સ્થાયી શાંતિ તરફ વાટાઘાટો થઈ શકે. તેમણે વધુમાં કહ્યું, અમે યુદ્ધવિરામ લાગુ કરવા અને સંપૂર્ણ શાંતિ સમાધાન માટે તૈયારી કરવા માટે વાટાઘાટોને સમર્થન આપવા તૈયાર છીએ.

નેતાઓએ કહ્યું હતું કે રક્તપાત હવે બંધ થવો જોઈએ, રશિયાએ તેની ગેરકાયદેસર ઘૂસણખોરી બંધ કરવી જોઈએ અને યુક્રેનને એક સુરક્ષિત, સાર્વભૌમ રાષ્ટ્ર તરીકે સમૃદ્ધ થવાનો અધિકાર મળવો જોઈએ. તે જ સમયે, નેતાઓએ ચેતવણી આપી હતી કે જો રશિયા યુદ્ધવિરામ માટે તૈયાર નહીં થાય, તો તેના પર દબાણ વધારવામાં આવશે અને યુક્રેનને શક્ય તમામ સહાય ચાલુ રાખવામાં આવશે.

રશિયા-યુક્રેન યુદ્ધને ત્રણ વર્ષથી વધુ સમય થઈ ગયો છે. રશિયા-યુક્રેન યુદ્ધ બંધ કરવા માટે અમેરિકા સતત દબાણ કરી રહ્યું છે. માર્ચમાં, અમેરિકાએ તાત્કાલિક, મર્યાદિત 30 દિવસના યુદ્ધવિરામનો પ્રસ્તાવ મૂક્યો હતો જેને યુક્રેને સ્વીકારી લીધો હતો, પરંતુ રશિયાએ તેની પસંદગી મુજબ શરતો પર આગ્રહ રાખ્યો હતો.

 

(7:19 PM IST)