ઈસ્લામાબાદઃ પાકિસ્તાનમાં સોમવારના બપોરના સમયે અચાનક ધરતી ધ્રૂજવા લાગી હતી, જેમાં રિક્ટર સ્કેલ પર ૪.૬ની તીવ્રતાનો ભૂકંપ નોંધાયો હતો. નેશનલ સેન્ટર ફોર સિસ્મોલોજી (એનસીએસ) દ્વારા જાહેર કરવામાં આવેલી માહિતી અનુસાર, આ ભૂકંપનું કેન્દ્રબિંદુ જમીનથી માત્ર ૧૦ કિલોમીટરની ઊંડાઈએ હોવાથી આફ્ટરશોક્સની સંભાવના વધી ગઈ છે, જેના કારણે સ્થાનિક લોકોમાં ભયનો માહોલ જોવા મળી રહ્યો છે.
એનસીએસે પોતાના સત્તાવાર એક્સ હેન્ડલ પર આ ભૂકંપ અંગે માહિતી આપતા જણાવ્યું હતું કે, "ભૂકંપની તીવ્રતાઃ ૪.૬, તારીખ અને સમયઃ ૧૨/૦૫/૨૦૨૫ ૧૩:૨૬:૩૨ IST, અક્ષાંશઃ ૨૯.૧૨ N, રેખાંશઃ ૬૭.૨૬ E, ઊંડાઈઃ ૧૦ કિમી, સ્થાનઃ પાકિસ્તાન." ભૂકંપના આંચકા અનુભવાતા જ લોકો પોતાના ઘરો અને ઓફિસોમાંથી બહાર દોડી આવ્યા હતા. જો કે, તાત્કાલિક કોઈ જાનહાનિ કે મોટા નુકસાનના સમાચાર મળ્યા નથી, પરંતુ ઓછી ઊંડાઈના કારણે આફ્ટરશોક્સની શક્યતાને જોતા તંત્ર દ્વારા લોકોને સાવચેત રહેવાની સૂચના આપવામાં આવી છે.
ભૂસ્તરીય રીતે પાકિસ્તાન વિશ્વના સૌથી વધુ ભૂકંપ સંવેદનશીલ વિસ્તારોમાંનું એક છે, કારણ કે તે અનેક મોટી ટેક્ટોનિક ફોલ્ટ લાઇન પર આવેલું છે. યુરેશિયન અને ભારતીય ટેક્ટોનિક પ્લેટોના સંગમ પર હોવાથી આ દેશમાં અવારનવાર ભૂકંપના આંચકા અનુભવાતા રહે છે અને ભૂતકાળમાં અહીં વિનાશક ભૂકંપો પણ આવ્યા છે. બલૂચિસ્તાન, ફેડરલી એડમિનિસ્ટર્ડ ટ્રાઇબલ એરિયાઝ, ખૈબર પખ્તુન્ખ્વા અને ગિલગિટ-બાલ્ટિસ્તાન પ્રાંત યુરેશિયન પ્લેટની દક્ષિણી ધાર પર સ્થિત છે, જ્યારે સિંધ, પંજાબ અને પાકિસ્તાન અધિકૃત જમ્મુ અને કાશ્મીર ભારતીય પ્લેટની ઉત્તરપશ્ચિમ ધાર પર આવેલા છે. આ બે ટેક્ટોનિક પ્લેટોની ટક્કરના કારણે આ પ્રદેશમાં હિંસક ભૂકંપની શક્યતા હંમેશા રહે છે. ત્યારે, આજે આવેલા ભૂકંપના પગલે સ્થાનિક વહીવટી તંત્ર દ્વારા પરિસ્થિતિ પર ચાંપતી નજર રાખવામાં આવી રહી છે અને લોકોને સતર્ક રહેવા માટે કહેવામાં આવ્યું છે.