બુરહાનપુર, તા.૧૨: મધ્‍યપ્રદેશના બુરહાનપુરમાં એક અનોખો બકરો છે, જે પોતાની બે ટાંગો પર ઊભો થાય તો માણસોથી પણ ઊંચો થઈ જાય છે. તેની ઊંચાઈ આશરે ૬ ફૂટ છે. આ બકરાને દોડવાનો ખૂબ જ શોખ છે, અને તેની જાત જમુનાપારી છે. આ બકરાની ઉંમર માત્ર ૧ વર્ષ છે. બકરાના માલિક મોહમ્‍મદ સુફિયાન તેને ડ્રાયફ્રૂટ ખવડાવે છે અને ઉનાળામાં તેના માટે કુલરની વ્‍યવસ્‍થા કરે છે.

મોહમ્‍મદ સુફિયાનએ લોકલ ૧૮ને જણાવ્‍યું કે આ બકરાને દોડવાનો ખૂબ શોખ છે. રાત્રે જ્‍યારે તે દોડે છે, ત્‍યારે લોકો તેને જોઈને એક બાજુ થઈ જાય છે. તેને ડોક્‍ટરની સલાહ મુજબ ખોરાક આપવામાં આવે છે અને તે ડ્રાય ફ્રૂટ ખાવાનો ખૂબ શોખીન છે. આ બકરો કાજુ અને બદામ ખાય છે. તેને ઘાસ સાથે ડ્રાય ફ્રૂટ પણ આપવામાં આવે છે. સવારથી સાંજ સુધી ઘણા લોકો તેને જોવા આવે છે અને તેની સાથે સેલ્‍ફી લે છે.

મોહમ્‍મદ સુફિયાનએ જણાવ્‍યું કે જ્‍યારે પણ તે તેના બકરાને ફરવા માટે બહાર લઈ જાય છે, ત્‍યારે તે તેની પાછળ દોડવા લાગે છે. જો કોઈ વ્‍યક્‍તિ માલિકને સ્‍પર્શ કરવાનો પ્રયાસ કરે છે, તો આ બકરો તેને મારવા તૈયાર થઈ જાય છે. સુફિયાનના પપ્‍પા એક દિવસ બજારમાં ગયા હતા ત્‍યારે આ બકરો મંડીમાં વેચાવા આવ્‍યો હતો. તેમને આ બકરો ખૂબ ગમ્‍યો હતો અને તેથી તેમણે તેને ૪૫૦૦૦ રૂપિયામાં ખરીદી લીધો હતો. આજે આ બકરો સમગ્ર મોહલ્લામાં પ્રખ્‍યાત થઈ ગયો છે.