મુંબઈ: બૃહનમુંબઈ મ્યુનિસિપલ કોર્પોરેશન (BMC)એ મલાડના માધ વિસ્તારમાં ગેરકાયદે બાંધકામો પર કાર્યવાહી શરૂ કરી છે. BMCએ બોલિવૂડ અભિનેતા અને ભાજપના નેતા મિથુન ચક્રવર્તીને એરંગલ ગામમાં એક પ્લોટ પર ગેરકાયદેસર ગ્રાઉન્ડ ફ્લોરનું બાંધકામ કરવા બદલ કારણદર્શક નોટિસ પાઠવી છે.
આ નોટિસમાં મિથુન ચક્રવર્તીને બાંધકામ અંગે ખુલાસો કરવા જણાવ્યું છે, જેમાં નિષ્ફળ જશે તો ગેરકાયદેસર બાંધકામને તેમના જોખમે તોડી પાડવામાં આવશે. BMCએ આ મામલે કાર્યવાહી કરવાની પણ ચેતવણી આપી છે.
BMCએ માધ વિસ્તારમાં આશરે 101 ગેરકાયદેસર બાંધકામો શોધી કાઢ્યા છે, જેમાં બનાવટી પ્લાન પર બનેલા બંગલાઓનો પણ સમાવેશ થાય છે. BMC મે મહિનાના અંત સુધીમાં તમામ ગેરકાયદેસર બાંધકામોને તોડી પાડવાની તૈયારી કરી રહી છે.
BMCના સૂત્રોના જણાવ્યા અનુસાર, એરંગલ ગામમાં હીરા દેવી મંદિર નજીક નિરીક્ષણ દરમિયાન બે વન-પ્લસ-મેઝેનાઇન-સ્ટોરી ઇમારતો, એક ગ્રાઉન્ડ-ફ્લોર સ્ટ્રક્ચર અને ઇંટો, લાકડું, કાચ અને એસી શીટ્સથી બનેલા ત્રણ કામચલાઉ યુનિટ મળી આવ્યા હતા. આ બાંધકામો સક્ષમ અધિકારી પાસેથી પરવાનગી લીધા વિના કરવામાં આવ્યા છે, જેના માટે અભિનેતાને કારણદર્શક નોટિસ જારી કરવામાં આવી છે.
આ કારણદર્શક નોટિસ મુંબઈ મ્યુનિસિપલ કોર્પોરેશન એક્ટની કલમ 351(1A) હેઠળ જારી કરવામાં આવી છે. અભિનેતાને નોટિસની તારીખ 10 મેથી સાત દિવસની અંદર જવાબ આપવા માટે કહેવામાં આવ્યું છે, જેમાં જણાવવાનું છે કે શા માટે "ઉક્ત બાંધકામ અથવા કામને દૂર, બદલવું, નીચે પાડવું અથવા પરિસરનો ઉપયોગ પુનઃસ્થાપિત ન કરવો જોઈએ."
એક અધિકારીએ જણાવ્યું હતું કે MMC એક્ટની કલમ 475A હેઠળ, આવા ઉલ્લંઘનો પર દંડ અને જેલની સજા થઈ શકે છે.
જ્યારે મિથુન ચક્રવર્તીનો સંપર્ક કરવામાં આવ્યો ત્યારે તેમણે કહ્યું કે, "મારું કોઈ ગેરકાયદેસર બાંધકામ નથી. ઘણા લોકોને નોટિસ મોકલવામાં આવી છે અને અમે અમારા જવાબો મોકલી રહ્યા છીએ."