<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 19th May 2025

અફઘાનિસ્તાનમાં ફરી ભૂકંપના આંચકા, પાકિસ્તાન સરહદ નજીક ધરા ધ્રુજી : 4.2ની તીવ્રતાના આંચકા

ભૂકંપનું કેન્દ્ર જમીનથી 140 કિલોમીટર નીચે હતું:છેલ્લા 4 દિવસમાં આ ચોથો ભૂકંપ

અફઘાનિસ્તાનમાં ભૂકંપ આજે (19 મે) સવારે 8:54 વાગ્યે આવ્યો હતો. રિક્ટર સ્કેલ પર તેની તીવ્રતા 4.2 માપવામાં આવી હતી. ભૂકંપનું કેન્દ્રબિંદુ અફઘાનિસ્તાનમાં હતું, જે પાકિસ્તાન સરહદની ખૂબ નજીક હતું. આવી સ્થિતિમાં, પાકિસ્તાનના કેટલાક વિસ્તારોમાં પણ આ ભૂકંપના આંચકા અનુભવાયા હતા.

 

ભૂકંપનું કેન્દ્ર જમીનથી 140 કિલોમીટર નીચે હતું. તમને જણાવી દઈએ કે છેલ્લા 4 દિવસમાં આ ચોથો ભૂકંપ છે. વાસ્તવમાં અફઘાનિસ્તાન ભારતીય અને યુરેશિયન ટેક્ટોનિક પ્લેટો વચ્ચેની ફોલ્ટ લાઇન પર આવેલું છે. આવી સ્થિતિમાં, જ્યારે પણ ભારતીય પ્લેટ યુરેશિયન પ્લેટની નીચે જાય છે, ત્યારે હિન્દુ કુશ પર્વતમાળામાં ભૂકંપના આંચકા અનુભવાય છે.

 

પાકિસ્તાનમાં ફરી એકવાર ભૂકંપના કારણે ધરતી ધ્રુજી ઉઠી હતી. રવિવારે રાત્રે પાકિસ્તાનના કેટલાક ભાગોમાં ભૂકંપના આંચકા અનુભવાયા હતા. તેની તીવ્રતા 4.7 માપવામાં આવી હતી, જોકે મહત્વની વાત એ છે કે કોઈ નુકસાનના સમાચાર નથી. ગયા સોમવારે પણ પાકિસ્તાનમાં ભૂકંપ આવ્યો હતો. છેલ્લા 15 દિવસમાં અહીં 3 ભૂકંપ આવ્યા છે. પાકિસ્તાનની સાથે, તાજેતરમાં ચીન અને મ્યાનમારમાં પણ ભૂકંપ આવ્યા હતા.

 

રવિવારે રાત્રે પાકિસ્તાનના સ્વાત જિલ્લામાં ભૂકંપના આંચકા અનુભવાયા હતા. ભૂકંપની ઊંડાઈ 205 કિલોમીટર માનવામાં આવી હતી. અફઘાનિસ્તાન અને પાકિસ્તાનના ઉત્તરીય વિસ્તારોમાં ફેલાયેલી હિન્દુકુશ પર્વતમાળામાં વારંવાર ભૂકંપ આવે છે. મિંગોરી અને તેની બહારના વિસ્તારો સહિત સ્વાતના ઘણા ભાગોમાં ભૂકંપના આંચકા અનુભવાયા હતા.

(1:25 PM IST)