નવી દિલ્હી :દિલ્હી હાઈકોર્ટે આગામી સુનાવણી સુધી અજમેર શરીફ દરગાહના CAG ઓડિટના આદેશ પર રોક લગાવી દીધી છે. CAG કાયદાની કલમ 20 હેઠળ જરૂરી શરતો પૂર્ણ કરવામાં આવી નથી તેવી દરગાહની અરજી પર હાઇકોર્ટે સ્ટે મૂકવાનો આદેશ આપ્યો હતો.

દરગાહ સમિતિ દ્વારા એવી પણ દલીલ કરવામાં આવી હતી કે જ્યારે લઘુમતી બાબતોના મંત્રી દ્વારા ઓડિટ કરવા માટે પત્ર જારી કરવામાં આવ્યો હતો, ત્યારે CAG તેની સાથે સંમત થયા ન હતા. દિલ્હી હાઈકોર્ટ હવે આ કેસની સુનાવણી 28 જુલાઈએ કરશે. 

દિલ્હી હાઈકોર્ટના ન્યાયાધીશે દરગાહની દલીલ સ્વીકારી હતી કે CAG કાયદાની કલમ 20 હેઠળની શરતો પૂરી થઈ નથી. આ કેસ અંજુમન મોઈનીયા ફખારિયા ચિશ્તિયા ખુદામ ખ્વાજા સાહેબ સૈયદજાદાગન દરગાહ શરીફ અજમેર દ્વારા દાખલ કરાયેલી 2 અરજીઓના સંદર્ભમાં હતો.

પહેલી અરજીમાં લઘુમતી બાબતોના મંત્રાલય દ્વારા માર્ચ 2024માં જારી કરાયેલા પત્રને પડકારવામાં આવ્યો હતો, જેમાં અંજુમન સૈયદઝાદાગન અને શેખઝાદાગન બંનેની આવક અને ખર્ચનું CAG સમક્ષ ઓડિટ કરવાનો પ્રસ્તાવ મૂકવામાં આવ્યો હતો.

બીજી અરજીમાં, CAG દ્વારા અરજદાર સંસ્થાના ખાતાઓની ઓડિટ પ્રક્રિયાને પડકારવામાં આવી હતી. એવું કહેવામાં આવ્યું હતું કે CAG કાયદાની કલમ 20(1) હેઠળ રાષ્ટ્રપતિની સંમતિ જરૂરી નહોતી. લઘુમતી બાબતોના મંત્રાલયે પત્ર જારી કર્યો ત્યાં સુધી, CAG એ ઓડિટ માટે સંમતિ પણ આપી ન હતી. તેથી આ પ્રક્રિયા કાનૂની જોગવાઈઓનું ઉલ્લંઘન છે. 

આ ઉપરાંત, કોર્ટે CAGના વકીલને બે પ્રશ્નો પૂછ્યા. પ્રથમ, શું માર્ચ 2024 માં પત્ર જારી કરતી વખતે, CAG એ અરજદાર સંસ્થાનું ઓડિટ કરવા માટે સંમતિ આપી હતી? બીજું, શું 13 જાન્યુઆરીના રોજ નાણા મંત્રાલય દ્વારા કેગને મોકલવામાં આવેલા પત્રમાં ઓડિટના નિયમો અને શરતો પર સંમતિ સધાઈ હતી? વકીલે બંનેના જવાબ નકારાત્મકમાં આપ્યા. આવી સ્થિતિમાં, કોર્ટે ઓડિટ પર વચગાળાનો સ્ટે મૂક્યો.