બદાઉન, ઉત્તર પ્રદેશ: ઉત્તર પ્રદેશના બદાઉન જિલ્લાના ટપ્પા જામની ગામમાં બુધવારે (21 મે, 2025) રાત્રે વાવાઝોડા દરમિયાન એક ટ્રાન્સફોર્મરમાંથી નીકળેલા તણખલાએ ભીષણ આગનું સ્વરૂપ ધારણ કર્યું હતું. આ ભયાનક આગમાં આશરે 200 જેટલા મકાનો બળીને ખાખ થઈ ગયા છે, જ્યારે અનેક પશુઓના કરૂણ મોત નિપજ્યા છે. અધિકારીઓએ ગુરુવારે (22 મે, 2025) આ ઘટનાની પુષ્ટિ કરી હતી.
સ્થાનિક સૂત્રો પાસેથી મળતી માહિતી મુજબ, આગથી બચવા માટે ગ્રામજનો આમ તેમ દોડી રહ્યા હતા તે દરમિયાન એક વ્યક્તિ ગંભીર રીતે દાઝી ગયો હતો. ઈજાગ્રસ્ત વ્યક્તિને ઉઝહાનીના સામુદાયિક આરોગ્ય કેન્દ્રમાં દાખલ કરવામાં આવ્યો છે.
આગે વિકરાળ સ્વરૂપ ધારણ કરતા મોટું નુકસાન
અધિકારીઓએ જણાવ્યું હતું કે, અગ્નિશમન દળ અને પોલીસ ઘટનાસ્થળે પહોંચીને આગને કાબૂમાં લે તે પહેલાં જ ગામના આશરે 200 મકાનો રાખમાં ફેરવાઈ ગયા હતા. જિલ્લા મેજિસ્ટ્રેટ અવનીશ કુમાર રાયે જણાવ્યું હતું કે, "બુધવારે રાત્રે વાવાઝોડા દરમિયાન આગ લાગી હતી. આ ઘટનામાં કોઈ જાનહાનિ થઈ નથી, પરંતુ એક વ્યક્તિ દાઝી ગયો છે."
તેમણે વધુમાં ઉમેર્યું, "આગમાં અનેક પશુઓના મોત થયાના અહેવાલો છે. અમે નુકસાનીનું આકલન કરીશું અને અસરગ્રસ્ત લોકોને વળતર પૂરું પાડીશું. જે લોકોના મકાનોને નુકસાન થયું છે તેમને પણ મદદ પૂરી પાડવામાં આવશે." આ ઘટનાને પગલે ગામમાં શોકનો માહોલ છવાઈ ગયો છે અને સ્થાનિક વહીવટી તંત્ર દ્વારા રાહત અને બચાવ કામગીરી શરૂ કરવામાં આવી છે.