નવી દિલ્હી :દેશના કેટલાક રાજ્યોમાં કોરોનાના કેસ ધીમે ધીમે વધી રહ્યા છે. દરમિયાન આંધ્રપ્રદેશ સરકારે પુષ્ટિ કરી છે કે રાજ્યમાં કોઈ સક્રિય કોરોના દર્દી નથી. જ્યારે પડોશી રાજ્યોમાં કેસ ફરી વધી રહ્યા છે. સાવચેતીના પગલા તરીકે આરોગ્ય, તબીબી અને પરિવાર કલ્યાણ વિભાગે જાહેર પરિવહન અને શોપિંગ મોલ, સિનેમા હોલ, પૂજા સ્થળો અને બજારો જેવા ભીડભાડવાળા સ્થળોએ માસ્ક પહેરવાનું ફરજિયાત બનાવ્યું છે. આ સાથે નાગરિકો માટે એક એડવાઈઝરી પણ જારી કરવામાં આવી છે.

આરોગ્ય વિભાગે નાગરિકોને સતર્ક રહેવા વિનંતી કરી છે. તાવ, ઉધરસ, શરદી અને ગળામાં દુખાવો જેવા સામાન્ય લક્ષણો ધરાવતા વ્યક્તિઓને ડૉક્ટરનો સંપર્ક કરવાની સલાહ આપવામાં આવે છે. એડવાઈઝરીમાં કહેવામાં આવ્યું છે કે અસરગ્રસ્ત વિસ્તારોમાંથી આવતા મુસાફરોને પરીક્ષણ કરાવવાની અને જો તેઓમાં લક્ષણો દેખાય તો ઓછામાં ઓછા એક અઠવાડિયા માટે પોતાને અલગ રાખવાની સલાહ આપવામાં આવી છે.

આરોગ્ય વિભાગ દ્વારા સગર્ભા સ્ત્રીઓ, પાંચ વર્ષથી ઓછી ઉંમરના બાળકો, વરિષ્ઠ નાગરિકો અને ક્રોનિક રોગોથી પીડિત લોકો માટે એક ખાસ એડવાઈઝરી જારી કરવામાં આવી છે. તેમને મુસાફરી મર્યાદિત કરવા અને કડક સ્વચ્છતા પ્રથાઓનું પાલન કરવાનું કહેવામાં આવ્યું છે.

આંધ્રપ્રદેશ સરકાર દ્વાર જારી કરેલી એડવાઇઝરીમાં કહેવામાં આવ્યું છે કે પ્રાર્થના સભાઓ, સામાજિક કાર્યક્રમો, પાર્ટીઓ, કાર્યક્રમો વગેરે જેવા તમામ સામૂહિક મેળાવડા બંધ રાખવા. દરેક વ્યક્તિએ રેલવે સ્ટેશનો, બસ સ્ટેન્ડ અને એરપોર્ટ પર કોવિડ-19 માર્ગદર્શિકાનું પાલન કરવાનું કહેવામાં આવ્યું છે. વૃદ્ધ લોકો (60 વર્ષથી વધુ ઉંમરના) અને ગર્ભવતી સ્ત્રીઓને ઘરની અંદર રહેવાની કડક સલાહ આપવામાં આવી છે. નિયમિતપણે હાથ ધોવા, ખાંસી/છીંક ખાતી વખતે તમારા મોંને ઢાંકવા અને ચહેરાને સ્પર્શ કરવાનું ટાળવા કહેવામાં આવ્યું છે. ઉચ્ચ જોખમવાળા વિસ્તારોમાં માસ્ક પહેવાનું પણ કહેવામાં આવ્યું છે. જો ભીડવાળી અથવા સારી હવાની અવરજવર ન હોય તેવી જગ્યાએ માસ્ક પહેરવા ખાસ સુચના આપવામાં આવી છે. આ ઉપરાંત જો કોરોનાના લક્ષણો દેખાય, તો તાત્કાલિક પરીક્ષણ કરાવવાનું કહેવામાં આવ્યું છે. કોવિડ પ્રભાવિત દેશોની મુસાફરી કરી હોય તેવા કોઈપણ વ્યક્તિને પરીક્ષણ કરાવવાનું કહેવામાં આવ્યું છે.

કોરોનાના લક્ષણો વ્યક્તિએ વ્યક્તિએ અલગ અલગ હોઈ શકે છે. તાવ અથવા શરદી, ઉધરસ, થાક, ગળામાં દુખાવો, સ્વાદ અથવા ગંધ ગુમાવવી, માથાનો દુખાવો, સ્નાયુઓ અથવા શરીરમાં દુખાવો, વહેતું નાક અથવા બંધ નાક, ઉબકા, ઉલટી અથવા ઝાડા. જો ઉપરોક્ત લક્ષણો દેખાય, તો પુષ્ટિ અને સારવાર માટે નજીકના આરોગ્ય સુવિધામાં જવું જોઈએ. આ ઉપરાંત જો કોઈ પણ વ્યક્તિ બીમાર હોય તો તેને ઘરે રહેવું પડે. જો તમને અસ્વસ્થતા લાગે, તો ઘરે આરામ કરીને અને સંપર્ક ટાળીને અન્ય લોકોને સુરક્ષિત રાખવા જોઈએ.