નવી દિલ્હી : રાષ્ટ્રપતિ દ્રૌપદી મુર્મુએ ગુરુવારે રાષ્ટ્રપતિ ભવનમાં આયોજિત સંરક્ષણ સન્માન સમારોહ-1 દરમિયાન દેશના બહાદુર સૈનિકોને શૌર્ય ચક્ર અને અન્ય શૌર્ય પુરસ્કારોથી સન્માનિત કર્યા. આ સન્માન એવા લશ્કરી કર્મચારીઓને આપવામાં આવ્યું હતું જેમણે અત્યંત બહાદુરી, હિંમત અને બલિદાન દર્શાવ્યું હતું

  આ સમારોહ રાષ્ટ્રપતિ ભવનના રિપબ્લિક પેવેલિયન ખાતે યોજાયો હતો જ્યાં વડા પ્રધાન નરેન્દ્રભાઈ મોદી, ઉપરાષ્ટ્રપતિ જગદીપ ધનખર, સંરક્ષણ પ્રધાન રાજનાથ સિંહ અને ત્રણેય સશસ્ત્ર દળોના વડાઓ હાજર રહ્યા હતા.

આ ગૌરવપૂર્ણ પ્રસંગે, દેશે રાષ્ટ્રની સુરક્ષા માટે પોતાના જીવનનું બલિદાન આપનારા અથવા અસાધારણ હિંમત દર્શાવનારા તેના બહાદુર સૈનિકોને શ્રદ્ધાંજલિ અને સન્માન આપ્યું. આ સમારોહ દેશની લશ્કરી પરંપરા અને બહાદુરી માટે આદરનું પ્રતીક બની ગયો.

આ દરમિયાન, રાષ્ટ્રપતિએ શીખ લાઇટ ઇન્ફન્ટ્રી 19 રાષ્ટ્રીય રાઇફલ્સના સિપાહી પ્રદીપ સિંહ અને મેજર આશિષ ધોનચક (સેના મેડલ) ને મરણોત્તર શૌર્ય ચક્ર એનાયત કર્યું. સમારોહ દરમિયાન, રાષ્ટ્રપતિ દ્રૌપદી મુર્મુ બે વાર મંચ પરથી નીચે આવ્યા અને શહીદ સૈનિકોના પરિવારોને ગળે લગાવ્યા.

શૌર્ય ચક્ર મેળવનારાઓમાં સ્ક્વોડ્રન લીડર દીપક કુમાર, રાજપૂત રેજિમેન્ટ 44મી બટાલિયન રાષ્ટ્રીય રાઇફલ્સના મેજર વિજય વર્મા, ડેપ્યુટી કમાન્ડન્ટ વિક્રાંત કુમાર, પેરાશૂટ રેજિમેન્ટના લેફ્ટનન્ટ કર્નલ સીવીએસ નિખિલ, આર્મી સર્વિસ કોર્પ્સના મેજર તૃપ્તપ્રીત સિંહ, સીઆરપીએફના જેફરી હેમિંગચુલો, ઇન્સ્પેક્ટર (જીડી), જમ્મુ અને કાશ્મીર પોલીસના સ્પેશિયલ પોલીસ ઓફિસર અબ્દુલ લતીફનો સમાવેશ થાય છે.

આ ઉપરાંત, જમ્મુ અને કાશ્મીર રાઇફલ્સની 5મી બટાલિયનના સુબેદાર સંજીવ સિંહ જસરોટિયા, લેફ્ટનન્ટ કમાન્ડર કપિલ યાદવ, સ્ક્વોડ્રન લીડર દીપક કુમાર, આર્ટિલરી રેજિમેન્ટના સુબેદાર પી. પુબિન સિંઘા, 666 આર્મી એવિએશન સ્ક્વોડ્રન કર્નલ પવન સિંહ, વિંગ કમાન્ડર વર્નોન ડેસમંડ કીન, મેજર સાહિલ રંધાવાને શૌર્ય ચક્રથી સન્માનિત કરવામાં આવ્યા હતા.

રાષ્ટ્રપતિ દ્વારા લેફ્ટનન્ટ કમાન્ડર કપિલ યાદવ, AEO INS વિશાખાપટ્ટનમ અને આર્મી સર્વિસ કોર્પ્સ 34 રાષ્ટ્રીય રાઇફલ્સના મેજર તૃપ્તપ્રીત સિંહને પણ શૌર્ય ચક્ર એનાયત કરવામાં આવ્યા હતા.