નવી દિલ્હી, 24 મે, 2025: રાજધાની દિલ્હીના બવાના વિસ્તારમાંથી આજે સવારે મોટા સમાચાર સામે આવ્યા છે. શનિવારે વહેલી સવારે બવાનાના DSIDC સેક્ટર 2, J-10 માં આવેલી એક ફેક્ટરીમાં ભીષણ આગ ફાટી નીકળી હતી. સવારે લગભગ 4:48 વાગ્યે લાગેલી આ આગ એટલી ભયાવહ હતી કે તેના કારણે ફેક્ટરીની ઇમારતમાં વિસ્ફોટ થયો અને તે ધરાશાયી થઈ ગઈ.
આ ઘટના અંગે ફાયર વિભાગને જાણ કરવામાં આવતા તાત્કાલિક ફાયર વિભાગની ટીમ ઘટનાસ્થળે પહોંચી ગઈ હતી. હાલમાં આગને કાબૂમાં લેવા માટે 17 ફાયર બ્રિગેડ વાહનો તૈનાત કરવામાં આવ્યા છે અને ફાયર ફાઇટર્સ આગ પર કાબૂ મેળવવા માટે સઘન પ્રયાસો કરી રહ્યા છે. સદભાગ્યે, આ દુર્ઘટનામાં અત્યાર સુધી કોઈના ઘાયલ થયા કે મૃત્યુ પામ્યાના સમાચાર નથી.
આગ લાગવાનું ચોક્કસ કારણ હજુ સ્પષ્ટ થયું નથી અને તેની તપાસ ચાલી રહી છે. આગ સંપૂર્ણપણે કાબૂમાં આવ્યા બાદ તેની વિગતવાર તપાસ હાથ ધરવામાં આવશે. આગને કારણે આ વિસ્તારમાં દૂર દૂરથી ધુમાડાના ગોટેગોટા જોવા મળી રહ્યા છે.
કોટલા મુબારકપુરમાં પણ આગનો બનાવ:
ઉલ્લેખનીય છે કે, આ પહેલા બુધવારે પણ દિલ્હીના કોટલા મુબારકપુર સ્થિત બજારમાં આગ લાગવાની ઘટના સામે આવી હતી. ફાયર વિભાગના એક અધિકારીએ જણાવ્યું કે તે આગની ઘટના સવારે 4:08 વાગ્યે નોંધાઈ હતી. માહિતી મળતા જ નવ ફાયર વાહનોને ઘટનાસ્થળે મોકલવામાં આવ્યા હતા અને સવારે 6:15 વાગ્યા સુધીમાં આગ પર કાબૂ મેળવી લેવાયો હતો. તે ઘટનામાં પણ કોઈ જાનહાનિ થઈ ન હતી, જોકે આગના કારણે કપડાં, તાડપત્રી, સ્ટેશનરી અને સૌંદર્ય પ્રસાધનો સહિત વિવિધ વસ્તુઓ વેચતી દુકાનોને નુકસાન થયું હતું.