ખંડવા (મધ્‍યપ્રદેશ),તા.૨૬:  મધ્‍યપ્રદેશના ખંડવા જિલ્લાના એક ગામમાં આદિવાસી સમુદાયની એક મહિલાની સાથે સામુહિક બળાત્‍કારની અમાનવીય ઘટના બની છે. એટલું જ નહીં, બળાત્‍કારીઓએ તમામ મર્યાદા નેવે મૂકીને પીડિત મહિલાના પ્રાઇવેટ પાર્ટમાં લોખંડ રોડ અને લાકડી નાંખીને ગર્ભાશય બહાર કાઢી દીધું હતું. આ હૃદય કંપાવી નાંખનારી ઘટનામાં પીડિત મહિલાનું મોત થયું છે. આ મામલામાં બે આરોપીની ધરપકડ કરવામાં આવી છે.

પ્રાથમિક માહિતી મુજબ મળતક મહિલા બે બાળકોની માતા હતી. સામૂહિક બળાત્‍કાર પછી આરોપી પીડિતાને લોહીલુહાણ હાલતમાં છોડીને ભાગી ગયા હતા. મહિલા જમીન પર તરફડતી રહી, અને સારવાર નહીં મળવાને કારણે મહિલાએ અંતિમ શ્વાસ લીધા હતા.

આ ઘટના ખાલવા ક્ષેત્ર અંતર્ગતના રોશની પોલીસ ચોકી ક્ષેત્રમાં શનિવારે બપોરે એક કલાકની આસપાસ બની હતી. આ મામલામાં પોલીસે મહિલાના બે પરિચિત વ્‍યક્‍તિ - હરિ પાલવી અને સુનીલ ધુર્વેની ધરપકડ કરી છે.

પોલીસને પ્રાથમિક તપાસમાં જાણવા મળ્‍યું કે બળાત્‍કારીઓએ પીડિતાની સાથે બર્બરતાની તમામ હદો પાર કરી દીધી હતી. આ દરમિયાન, ગ્રામીણ લોકોની સૂચનાના આધાર પર પોલીસે બે પરિચિત લોકોની ધરપકડ કરી હતી, જેમણે સામુહિક બળાત્‍કાર કર્યા હોવાની આશંકા હતી. ગ્રામીણ લોકોના કહેવા મુજબ, પીડિત મહિલા બેભાન હાલતમાં આરોપી હરી પાલવીના ઘર પાસે જ પડેલી મળી હતી. પોલીસે મહિલાના મળતદેહને ખાલવા હોસ્‍પિટલમાંથી ખંડવાની જિલ્લા હોસ્‍પિટલ મોકલ્‍યો છે.(૪૦.૪)