જમ્મુ: પહેલગામ નરસંહાર બાદ સંપૂર્ણપણે ખતમ થઈ ગયેલા કાશ્મીરના પ્રવાસનને ફરીથી જીવંત કરવાના પ્રયાસો તેજ બન્યા છે. આ માટે સરકારી અને બિન-સરકારી સ્તરે ઝડપી પ્રયાસો કરવામાં આવી રહ્યા છે. એક તરફ મુખ્યમંત્રીએ કાશ્મીરના વિવિધ ભાગોમાં કેબિનેટ બેઠકો યોજવાની જાહેરાત કરી છે, તો બીજી તરફ હોટેલોએ ૫૦ ટકા ડિસ્કાઉન્ટ સાથે પ્રવાસીઓને આકર્ષવાના પ્રયાસો શરૂ કર્યા છે.

પહેલગામમાં થયેલા આતંકવાદી હુમલા બાદ પ્રવાસન ક્ષેત્રને ફરીથી ધબકતું કરવા માટે, સ્થાનિક હોટેલ સંચાલકો પ્રવાસન પેકેજો પર ૫૦ ટકાની છૂટ આપવાનું આયોજન કરી રહ્યા છે. જેનો હેતુ પ્રવાસીઓને પાછા આકર્ષવાનો અને પ્રવાસન પર નિર્ભર હજારો કર્મચારીઓને રાહત આપવાનો છે.

જેએન્ડકે હોટેલિયર્સ ક્લબના મહાસચિવ તારિક ગનીએ જણાવ્યું કે, આ છૂટ ૨૭ મે થી ૩૦ મે દરમિયાન નિર્ધારિત 'ફેમ ટૂર' નામના વિશ્વાસ-નિર્માણ કાર્યક્રમનો ભાગ હશે. આ કાર્યક્રમમાં ભાગ લેવા માટે સમગ્ર ભારતમાંથી રાષ્ટ્રીય ટૂર ઓપરેટરો, ટોચના હોટેલિયરો અને મીડિયા પ્રતિનિધિઓને આમંત્રિત કરવામાં આવ્યા છે. તેઓ પહેલગામ, શ્રીનગર, સોનમર્ગ અને ગુલમર્ગ સહિત ચાર મુખ્ય રમણીય સ્થળોની મુલાકાત લેશે અને જમીની સ્થિતિનું આકલન કરશે.

બીજી તરફ, મુખ્યમંત્રી ઉમર અબ્દુલ્લાએ પણ પ્રવાસીઓમાં વિશ્વાસ જગાવવા માટે ખીણના લોકપ્રિય પ્રવાસન સ્થળો પર સત્તાવાર બેઠકો યોજવાનો નિર્ણય કર્યો છે. પ્રથમ બેઠક ૨૮ મે, બુધવારે ગુલમર્ગમાં યોજાશે, જેમાં મુખ્યમંત્રીની અધ્યક્ષતામાં ઉચ્ચ સ્તરીય અધિકારીઓ હાજર રહેશે.

સત્તારૂઢ પક્ષના ધારાસભ્ય અને મુખ્ય પ્રવક્તા તનવીર સાદિકે જણાવ્યું કે, મુખ્યમંત્રી ઉમર અબ્દુલ્લા "દરવાજે પર શાસન" પહેલ અંતર્ગત ગુલમર્ગ અને પહેલગામ સહિત વિવિધ સ્થળોએ કેબિનેટ બેઠકોનું નેતૃત્વ કરશે. તેઓ વિકાસ કાર્યો પર વ્યક્તિગત રીતે નજર રાખશે અને તમામ જાહેર મુદ્દાઓને સંબોધવા માટે પ્રતિબદ્ધ છે.

આ પ્રયાસોથી કાશ્મીરના પ્રવાસન ક્ષેત્રને ફરીથી ગતિ મળશે અને સ્થાનિક અર્થતંત્રને વેગ મળશે તેવી આશા છે. (સુરેશ ડુગર અકિલા જમ્મુ)