નવી દિલ્હી: ફ્રાન્સના રાષ્ટ્રપતિ ઇમેન્યુઅલ મેક્રોન અને તેમની પત્ની બ્રિજિટે મેક્રોનનો એક વીડિયો હાલ સોશિયલ મીડિયા પર ખળભળાટ મચાવી રહ્યો છે. આ કોઈ સામાન્ય મુલાકાત કે પ્રેમભર્યો ક્ષણનો વીડિયો નથી, પરંતુ વિયેતનામના પાટનગર હનોઈમાં રાજ્ય મુલાકાત દરમિયાન ફ્લાઇટમાંથી ઉતરતી વખતે બનેલી એક ચોંકાવનારી ઘટના કેદ થઈ છે, જેમાં ફર્સ્ટ લેડી બ્રિજિટે મેક્રોનના ચહેરા પર હાથ ફેરવતા જોવા મળે છે, જેને ઘણા લોકો થપ્પડ તરીકે ગણી રહ્યા છે!
વિમાનના ગેટ પરનો 'થપ્પડકાંડ':
વીડિયોમાં સ્પષ્ટપણે જોઈ શકાય છે કે વિમાનનો દરવાજો ખુલતાની સાથે જ, ફ્રેન્ચ રાષ્ટ્રપતિ મેક્રોન ગેટની ખૂબ નજીક ઉભા હોય છે. તે જ સમયે, તેમની પત્ની બ્રિજિટે અચાનક તેમના ચહેરા પર હાથ ફેરવે છે, જે એક થપ્પડ જેવો દ્રશ્યમાન થાય છે. આ અણધારી ઘટનાથી મેક્રોન થોડા પાછળ હટે છે, અને તરત જ તેમને અહેસાસ થાય છે કે પત્રકારો અને કેમેરાની ફોજની નજર તેમના પર ટકેલી છે. ક્ષણભરમાં, રાષ્ટ્રપતિએ પોતાના ચહેરાના હાવભાવ બદલ્યા અને હસતાં હસતાં હાથ લહેરાવીને ગુપ્ત રીતે વિમાનની અંદર છુપાઈ ગયા. આ દ્રશ્ય કેમેરામાં કેદ થતા જ વાયરલ થવામાં સહેજ પણ વાર ન લાગી. આ ઘટના જોઈને વિમાનમાં હાજર સ્ટાફ પણ દંગ રહી ગયો હતો.
રાષ્ટ્રપતિ ભવનનો 'AI' દાવો અને પછી 'ઘરકંકાસ'નો સ્વીકાર:
શરૂઆતમાં, ફ્રેન્ચ રાષ્ટ્રપતિ ભવને આ વીડિયોને "આર્ટિફિશિયલ ઇન્ટેલિજન્સ (AI) નો ચમત્કાર" ગણાવીને ફગાવી દેવાનો પ્રયાસ કર્યો. જોકે, જ્યારે વીડિયોનું સત્ય બહાર આવ્યું અને તે વાસ્તવિક હોવાનું પુરવાર થયું, ત્યારે રાષ્ટ્રપતિ ભવનના નિવેદનમાં પણ વળાંક આવ્યો. હવે મેક્રોનના એક નજીકના મિત્રએ આ ઘટનાને પતિ-પત્ની વચ્ચેના "ઝઘડા" તરીકે વર્ણવી છે. જોકે, વીડિયોમાં બંને વચ્ચે કોઈ ખાસ સંકલન જોવા મળ્યું નથી, અને મેક્રોનનો ચહેરો સંપૂર્ણપણે સફેદ થઈ ગયો હતો, જાણે કે તેઓ બ્રિજિટથી ડરતા હોય.
પ્રેમ કહાણીથી 'થપ્પડકાંડ' સુધીની સફર:
ઇમેન્યુઅલ મેક્રોન અને બ્રિજિટના પ્રેમ લગ્ન છે, જે હંમેશા ચર્ચામાં રહ્યા છે. તેમની ઉંમરમાં 24 વર્ષનો તફાવત છે; મેક્રોન તેમની પત્ની કરતા 24 વર્ષ નાના છે. બ્રિજિટ એક સમયે મેક્રોનની શાળાની શિક્ષિકા હતી. જ્યારે મેક્રોન માત્ર 15 વર્ષના હતા, ત્યારે તેમને તેમની 39 વર્ષીય શિક્ષિકા બ્રિજિટ સાથે પ્રેમ થઈ ગયો હતો. તે સમયે બ્રિજિટ પરિણીત હતી અને ત્રણ બાળકોની માતા પણ હતી. આમ છતાં, 16 વર્ષની ઉંમરે, મેક્રોને બ્રિજિટને પ્રપોઝ કર્યું.
મેક્રોનના પરિવારે આ સંબંધનો સખત વિરોધ કર્યો, પરંતુ તેઓ સંમત ન થયા. બ્રિજિટે તેના પહેલા પતિને છૂટાછેડા આપ્યા અને 2007 માં, જ્યારે મેક્રોન 29 વર્ષના હતા અને બ્રિજિટ 54 વર્ષની હતી, ત્યારે તેઓએ પેરિસમાં એક ખાનગી સમારંભમાં લગ્ન કર્યા. 2017 માં મેક્રોન ફ્રાન્સના રાષ્ટ્રપતિ બન્યા પછી, બ્રિજિટે ફ્રાન્સના પ્રથમ મહિલાનું બિરુદ મેળવ્યું. તેઓ દરેક વિદેશ પ્રવાસમાં પોતાના પતિ સાથે રહે છે.
આ વાયરલ વીડિયોએ આંતરરાષ્ટ્રીય સ્તરે ચર્ચા જગાવી છે અને મેક્રોન-બ્રિજિટના સંબંધો ફરી એકવાર સમાચારોના કેન્દ્રમાં આવ્યા છે.