મુંબઈ,તા.૩૦: મહારાષ્ટ્રના લાતુર જિલ્લામાં એક વરિષ્ઠ સરકારી ડોકટર પર ખૂબ જ ગંભીર આરોપો લગાવવામાં આવ્યા છે. ૨૦૨૧ માં કોવિડ-૧૯ મહામારી દરમિયાન, આરોપી ડોકટર પર એક સાથીદારને કોરોના વાયરસથી સંક્રમિત મહિલા દર્દીને મારવાની સૂચના આપવાનો આરોપ મૂકવામાં આવ્યો છે. આ કિસ્સામાં, ફરિયાદ મળ્યા બાદ પોલીસે FIR નોંધી છે.

સોશિયલ મીડિયા પર વાયરલ થયેલી એક ઓડિયો કિલપમાં બે ડોકટરો વચ્ચેની કથિત વાતચીત સાંભળી હતી, જેમાં ખુલાસો થયો હતો કે ડો.શશિકાંત દેશપાંડેએ કોવિડ-૧૯ દર્દીને મારવાની સૂચના આપી હતી. આના પર તેમના સાથીદાર ડો.શશિકાંત ડાંગેએ સાવધાનીપૂર્વક જવાબ આપ્યો કે ઓકિસજન સપોર્ટ પહેલાથી જ ઘટાડી દેવામાં આવ્યો છે.

મહિલા દર્દીના પતિની ફરિયાદ પર કાર્યવાહી કરતા, પોલીસે ડો.દેશપાંડે વિરુદ્ધ ધાર્મિક લાગણીઓને ઠેસ પહોંચાડવાના ઈરાદાથી ઇરાદાપૂર્વક અને દુર્ભાવનાપૂર્ણ કૃત્યો અને અન્ય ગુનાઓની કાયદાકીય જોગવાઈઓ હેઠળ કેસ નોંધ્યો છે.

શું મામલો છે?

સોશિયલ મીડિયા પર વાયરલ થયેલી કથિત ઓડિયો કિલપ ૨૦૨૧ની હોવાનું કહેવાય છે, જ્યારે કોવિડ-૧૯ ચરમસીમાએ હતું અને હોસ્પિટલો દર્દીઓથી ભરેલી હતી. આ સમય દરમિયાન, દયામી અઝીમુદ્દીન ગૌસુદ્દીન (૫૩) ની પત્ની કૌસર ફાતિમા પણ કોરોનાથી સંક્રમિત થઈ હતી, જોકે તે સારવાર પછી સ્વસ્થ થઈ ગઈ હતી.

કૌસર ફાતિમાને લાતુરના કોવિડ-૧૯ કેર સેન્ટરમાં દાખલ કરવામાં આવી હતી. જ્યાં ડો. શશિકાંત ડાંગે પોસ્ટ કરવામાં આવ્યા હતા, જ્યારે ડો. શશિકાંત દેશપાંડે તે સમયે લાતુરની ઉદગીર સરકારી હોસ્પિટલમાં એડિશનલ ડિસ્ટ્રિકટ સર્જન હતા. ડો.દેશપાંડે કથિત રીતે કહેતા સાંભળવામાં આવ્યા હતા, કોઈને અંદર જવા દો નહીં, ફકત દયામી નામની મહિલાને મારી નાખો. આના પર ડો.ડાંગેએ કહ્યું કે ઓકિસજન પહેલાથી જ ઓછો થઈ ગયો છે.

ગૌસુદ્દીનની ફરિયાદના આધારે, ઉદગીર શહેર પોલીસે ૨૪ મેના રોજ દેશપાંડે વિરુદ્ધ કેસ નોંધ્યો છે. ગૌસુદ્દીનનો દાવો હતો કે બંને ડોકટરો તેમની નજીક ફોન પર તેમની પત્નીની હત્યા વિશે વાત કરી રહ્યા હતા. પરંતુ તે સમયે તેમની પત્નીની હાલત સારી ન હતી, તેથી તેઓ લાચાર હતા અને કોઈ પ્રતિક્રિયા આપી શક્યા ન હતા.

એક પોલીસ અધિકારીએ જણાવ્યું હતું કે ગૌસુદ્દીનની ફરિયાદના આધારે કેસ નોંધવામાં આવ્યો છે અને ડોકટરનો મોબાઇલ ફોન જપ્ત કરવામાં આવ્યો છે અને તેમને નોટિસ જારી કરવામાં આવી છે. આ મામલાની વિગતવાર તપાસ કરવામાં આવી રહી છે, તેમનું નિવેદન નોંધવામાં આવી રહ્યું છે.