જમ્મુ: ચીનની સેના દ્વારા વારંવાર થતી ઘૂસણખોરીને રોકવા અને તેના કોઈપણ હિંમતભેર પગલાંનો જવાબ આપવા માટે પૂર્વ લદ્દાખમાં ચીન સાથેની વાસ્તવિક નિયંત્રણ રેખા (એલએસી) પર એક નવું આર્મી ડિવિઝન તૈનાત કરવામાં આવશે. રક્ષા સૂત્રોના જણાવ્યા અનુસાર, સરકારે આ માટે મંજૂરી આપી દીધી છે અને આ ડિવિઝનને ૭૨ ઇન્ફન્ટ્રી ડિવિઝન તરીકે ઓળખવામાં આવશે. આ ડિવિઝનમાં નવા માનવબળનો સમાવેશ નહીં થાય, પરંતુ પૂર્વ લદ્દાખમાં ફરજ બજાવી રહેલ હાલની બ્રિગેડને ફરીથી કામગીરી સોંપવામાં આવશે. એક ડિવિઝનમાં લગભગ ૧૫,૦૦૦ જવાનો અને સાધનો હોય છે, જેનું નેતૃત્વ મેજર જનરલ રેન્કના અધિકારી કરે છે અને તેમાં ત્રણથી ચાર બ્રિગેડ હોય છે, જેમનું નેતૃત્વ બ્રિગેડિયર કરે છે

રક્ષા અધિકારીઓએ જણાવ્યું કે આ ડિવિઝનના યુદ્ધ-લડાઈના તત્વોને અંતિમ સ્વરૂપ આપવામાં આવ્યું છે. ઉલ્લેખનીય છે કે એપ્રિલ ૨૦૨૦માં પૂર્વ લદ્દાખમાં ભારતીય અને ચીની સૈનિકો વચ્ચે તણાવ ઊભો થયો હતો, જે લગભગ ચાર વર્ષ સુધી ચાલ્યો અને બંને પક્ષો વચ્ચે સમજૂતી થયા બાદ મોટા ભાગના વિસ્તારોમાં તણાવ ઘટ્યો. આ ગતિરોધ દરમિયાન, ભારતીય સેનાએ બરેલીની ૬ માઉન્ટેન બ્રિગેડ અને મથુરા સ્થિત ૧ સ્ટ્રાઈક કોરના કેટલાક સંસાધનોને લદ્દાખમાં તૈનાત કર્યા હતા.

નવું ૭૨ ઇન્ફન્ટ્રી ડિવિઝન લેહ સ્થિત ૧૪ કોરનો ભાગ હશે અને તેને ચીન સાથેની એલએસી તેમજ પાકિસ્તાન સાથેની નિયંત્રણ રેખા (એલઓસી) પર બંને મોરચે જવાબદારી સોંપાશે. આ ડિવિઝનની જવાબદારીમાં ચીન સાથેની ૮૩૨ કિલોમીટર લાંબી એલએસી, દ્રાસ-કારગિલ-બટાલિક સેક્ટરમાં પાકિસ્તાન સાથેની એલઓસી અને સિયાચીન ગ્લેશિયરનો સમાવેશ થશે.

આ ઉપરાંત, ૧૪ કોરમાં બે ડિવિઝન છે: ૮ માઉન્ટેન ડિવિઝન, જે પાકિસ્તાન સાથેની એલઓસી પર તૈનાત છે, અને ૩ ઇન્ફન્ટ્રી ડિવિઝન, જે પૂર્વ લદ્દાખમાં એલએસીની જવાબદારી સંભાળે છે. સૂત્રોના જણાવ્યા અનુસાર, ૭૨ ઇન્ફન્ટ્રી ડિવિઝનમાં આ બંનેમાંથી કેટલાક તત્વોનો સમાવેશ થવાની શક્યતા છે.

એક ડિવિઝનમાં લગભગ ૧૫,૦૦૦ જવાનો અને સાધનો હોય છે, જેનું નેતૃત્વ મેજર જનરલ રેન્કના અધિકારી કરે છે અને તેમાં ત્રણથી ચાર બ્રિગેડ હોય છે, જેમનું નેતૃત્વ બ્રિગેડિયર કરે છે. ૨૦૧૭માં સરકારે મંજૂરી આપ્યા બાદ આ ડિવિઝનને ૧૭ માઉન્ટેન સ્ટ્રાઈક કોરનો ભાગ બનાવવાનું હતું, જેનું મુખ્ય મથક પઠાણકોટમાં હતું. પરંતુ, પુનર્ગઠન હેઠળ તેનું મુખ્ય મથક પૂર્વ લદ્દાખમાં હશે. (સુરેશ ડુગર અકિલા જમ્મુ)