અમેરિકાની મેસાચુસેટ્સ ઇન્સ્ટિટ્યૂટ ઑફ ટેક્નોલોજી (MIT) માં ભારતીય મૂળની વિદ્યાર્થીની મેઘા વેમુરીએ મંચ પરથી 'ફ્રી પેલેસ્ટાઇન'ના નારા લગાવ્યા છે. તેમના ભાષણને લઈને વિવાદ ખૂબ જ તેજ બન્યો છે.

મેઘા વેમુરીએ ઇઝરાયેલ પર નિર્દોષોની હત્યાનો આરોપ લગાવતા કહ્યું હતું કે યુનિવર્સિટીએ ઇઝરાયેલ સાથેના સંબંધો સમાપ્ત કરી દેવા જોઈએ. વેમુરીએ તેમના સાથી વિદ્યાર્થીઓને પણ પેલેસ્ટાઇનના સમર્થનમાં ઊભા રહેવા હાકલ કરી હતી.

લાલ રંગની કિફિયા (પેલેસ્ટાઇન સમર્થકોની નિશાની) પહેરીને વેમુરીએ કહ્યું, "તમે લોકો બતાવી દો કે MIT સ્વતંત્ર પેલેસ્ટાઇન ઇચ્છે છે." યુનિવર્સિટીના દીક્ષાંત સમારોહના અવસરે ભારે ભીડ એકઠી થઈ હતી. કેમ્પસમાં તે સમયે વિદ્યાર્થીઓ ઉપરાંત તેમના પરિવાર અને ફેકલ્ટી મેમ્બર પણ હાજર હતા.

ઉલ્લેખનીય છે કે અમેરિકાની ઘણી યુનિવર્સિટીઓમાં ગાઝામાં ઇઝરાયેલી હુમલાને લઈને પહેલાથી જ વિવાદની સ્થિતિ પ્રવર્તી રહી છે. અમેરિકી પ્રશાસને ઘણા વિદ્યાર્થીઓ અને વિદ્યાર્થીનીઓ સામે કાર્યવાહી પણ કરી છે. વેમુરીએ પોતાની સ્પીચમાં કહ્યું, "કોઈનાથી છુપાયેલું નથી કે સમગ્ર દેશની શિક્ષણ સંસ્થાઓ અનિશ્ચિતતાના વાતાવરણમાં છે." તેમણે કહ્યું કે MIT ના ઇઝરાયેલ સાથેના રિસર્ચ લિંક શરમજનક છે અને તે માનવતા વિરુદ્ધ છે.

વેમુરીએ કહ્યું, "MIT ના રિસર્ચ લિંક ફક્ત ઇઝરાયેલી સેના સાથે છે. આનો અર્થ એ છે કે ઇઝરાયેલ ગાઝામાં જે નરસંહાર કરી રહ્યું છે, તેને આ સ્કૂલ પણ સમર્થન આપી રહી છે." તેમણે કહ્યું કે MIT ની અંડરગ્રેજ્યુએટ અને ગ્રેજ્યુએટ સ્ટુડન્ટ યુનિયને ઇઝરાયેલ સાથે સંબંધો તોડવાના સમર્થનમાં મત આપ્યો છે. વિદ્યાર્થીઓને યુનિવર્સિટીના અધિકારીઓ તરફથી જ ધમકી આપવામાં આવી. તેમ છતાં તેઓ દબાયા નહીં. વેમુરીએ કહ્યું, "ગાઝામાં હવે કોઈ યુનિવર્સિટી નથી. ઇઝરાયેલ પેલેસ્ટાઇનને મિટાવી દેવા માંગે છે. શરમની વાત છે કે MIT પણ તેનો એક ભાગ છે."

કોણ છે મેઘા વેમુરી?

મેઘા વેમુરી MIT માં 2025 ના ક્લાસ પ્રેસિડેન્ટ છે. વેમુરીના ભાષણ દરમિયાન ઘણા વિદ્યાર્થીઓએ 'ફ્રી પેલેસ્ટાઇન'ના નારા લગાવ્યા, જ્યારે ઘણા વિદ્યાર્થીઓ શાંત રહ્યા. MIT એ આ વિશે કોઈ નિવેદન બહાર પાડ્યું નથી. મેઘા વેમુરી ભારતીય મૂળની છે. તેમનો જન્મ આલ્ફારેટા, જ્યોર્જિયામાં થયો હતો. હાલમાં જ તેમણે કોમ્પ્યુટર સાયન્સ, ન્યુરોસાયન્સ અને ભાષા વિજ્ઞાનમાં ડિગ્રી પૂરી કરી છે અને તે ગ્રેજ્યુએટિંગ ક્લાસની પ્રેસિડેન્ટ રહી ચૂકી છે. વેમુરી મેકગવર્ન ઇન્સ્ટિટ્યૂટ ફોર રિસર્ચમાં પણ કામ કરી ચૂકી છે.