મુંબઈ, 2 જૂન, 2025: ભારતીય ક્રિકેટ કંટ્રોલ બોર્ડ (BCCI) ના રાજકારણમાં ફરી એકવાર ગરમાવો જોવા મળી રહ્યો છે! ક્રિકેટના સૌથી ધનિક બોર્ડના અધ્યક્ષ પદ પર મોટો ફેરફાર થવા જઈ રહ્યો છે. વર્તમાન અધ્યક્ષ અને 1983 વર્લ્ડ કપ વિજેતા ટીમના હીરો રોજર બિન્ની આગામી મહિને 70 વર્ષના થતા હોવાથી BCCIના નિયમો મુજબ તેમને અધ્યક્ષ પદ છોડવું પડશે. તેમના સ્થાને હવે કોંગ્રેસના વરિષ્ઠ નેતા અને અનુભવી ક્રિકેટ પ્રશાસક રાજીવ શુક્લા BCCIના કાર્યકારી અધ્યક્ષ તરીકેનો કાર્યભાર સંભાળશે.
BCCIના સૂત્રો દ્વારા સોમવારે પીટીઆઈને મળેલી માહિતી મુજબ, રોજર બિન્ની 19 જુલાઈના રોજ 70 વર્ષના થશે, જે BCCIના પદાધિકારીઓ માટે નિર્ધારિત વય મર્યાદા છે. આના પરિણામે, તેમને પદ છોડવું અનિવાર્ય બનશે.
હાલમાં 65 વર્ષીય રાજીવ શુક્લા 2020 થી BCCIના ઉપાધ્યક્ષ તરીકે ફરજ બજાવી રહ્યા છે. પ્રવર્તમાન પરંપરા અનુસાર, જ્યારે અધ્યક્ષ પદ ખાલી પડે અને નવી ચૂંટણીઓ ન થાય ત્યાં સુધી, સૌથી વરિષ્ઠ પદાધિકારી આ પદનો કાર્યભાર સંભાળે છે. આ નિયમ મુજબ, શુક્લા હવે સપ્ટેમ્બરમાં યોજાનારી બોર્ડની વાર્ષિક સામાન્ય સભા (AGM) માં નવી ચૂંટણીઓ ન થાય ત્યાં સુધી બોર્ડના સર્વોચ્ચ પદની ધુરા સંભાળશે. એક BCCI સૂત્રએ આ વાતની પુષ્ટિ કરતા જણાવ્યું હતું કે, "પ્રથા મુજબ, આવા સંજોગોમાં સૌથી વરિષ્ઠ પદાધિકારી કાર્યભાર સંભાળે છે. શુક્લાજી સપ્ટેમ્બરમાં નવી ચૂંટણીઓ ન થાય ત્યાં સુધી આ ભૂમિકા નિભાવશે."
રાજ્યસભા સાંસદ રાજીવ શુક્લા પાસે ક્રિકેટ પ્રશાસનનો બહોળો અનુભવ છે. તેઓ ભૂતકાળમાં ઇન્ડિયન પ્રીમિયર લીગ (IPL) ના ચેરમેન તરીકે પણ સફળતાપૂર્વક સેવા આપી ચૂક્યા છે. તેમની આ નિમણૂકથી સપ્ટેમ્બરમાં યોજાનારી AGM અને આગામી ચૂંટણીઓ પહેલા BCCIના રાજકારણમાં નવા સમીકરણો રચાય તેવી શક્યતા છે.
અગાઉ પણ, 2017 થી 2019 દરમિયાન, જ્યારે સુપ્રીમ કોર્ટ દ્વારા નિયુક્ત વહીવટકર્તાઓની સમિતિ (CoA) બોર્ડનું સંચાલન કરતી હતી, ત્યારે સી. કે. ખન્નાએ BCCIના કાર્યકારી અધ્યક્ષ તરીકે ફરજ બજાવી હતી.
ઉલ્લેખનીય છે કે, રોજર બિન્નીએ ત્રણ વર્ષ પહેલા સૌરવ ગાંગુલીના સ્થાને વિશ્વના સૌથી ધનિક ક્રિકેટ બોર્ડના અધ્યક્ષનો હવાલો સંભાળ્યો હતો. તે પહેલા તેઓ કર્ણાટક સ્ટેટ ક્રિકેટ એસોસિએશનના અધ્યક્ષ હતા. ભારતીય ક્રિકેટના ઇતિહાસમાં તેમનું નામ સુવર્ણ અક્ષરે અંકિત છે, કારણ કે તેઓ કપિલ દેવની કપ્તાની હેઠળ 1983નો વર્લ્ડ કપ જીતનારી ઐતિહાસિક ટીમના સભ્ય હતા. ક્રિકેટર તરીકે નિવૃત્તિ બાદ, તેમણે ભારત અંડર-19 ટીમના કોચ તરીકે પણ સફળતાપૂર્વક સેવા આપી હતી, જે ટીમે 2000 માં ICC વર્લ્ડ કપનો ખિતાબ જીત્યો હતો. હવે, તેમના અનુગામી તરીકે રાજીવ શુક્લા BCCIના વહીવટની જવાબદારી સંભાળશે, જેના પર સૌની નજર રહેશે.