અમૃતસર, તા. ૩ જૂન, ૨૦૨૫: ભારતીય સુરક્ષા દળો માટે એક મોટી સફળતામાં, પંજાબ પોલીસે તરનતારન જિલ્લામાંથી ગગનદીપ સિંહ ઉર્ફે ગગન નામના એક વ્યક્તિની ધરપકડ કરી છે, જેના પર પાકિસ્તાનની ગુપ્તચર સંસ્થા ISIને સંવેદનશીલ ગુપ્ત માહિતી પૂરી પાડવાનો આરોપ છે. પંજાબ પોલીસના જણાવ્યા અનુસાર, ગગનદીપ સિંહ ‘ઓપરેશન સિંદૂર’ દરમિયાન ભારતીય સેનાની ગતિવિધિઓ અને તેનાથી સંબંધિત ગુપ્ત માહિતી ISI સાથે શેર કરી રહ્યો હતો, જે રાષ્ટ્રીય સુરક્ષા માટે ગંભીર ખતરો ઊભો કરી શકતો હતો.
પંજાબ પોલીસના ડીજીપી ગૌરવ યાદવે માહિતી આપતા જણાવ્યું કે, કાઉન્ટર-ઈન્ટેલિજન્સ-પંજાબ દ્વારા મળેલી ગુપ્ત માહિતીના આધારે તરનતારન પોલીસે સંયુક્ત ઓપરેશન હાથ ધરીને ગગનદીપ સિંહની ધરપકડ કરી છે. પ્રારંભિક તપાસમાં સામે આવ્યું છે કે, ધરપકડ કરાયેલ આરોપી પાકિસ્તાન ISI અને ખાલિસ્તાન સમર્થક ગોપાલ સિંહ ચાવલા ના સંપર્કમાં હતો.
તપાસમાં ખુલાસો થયો છે કે, ગગનદીપ સિંહ છેલ્લા પાંચ વર્ષથી પાકિસ્તાન સ્થિત ખાલિસ્તાન સમર્થક ગોપાલ સિંહ ચાવલાના સંપર્કમાં હતો. આ ચાવલા મારફત જ તેને પાકિસ્તાની ગુપ્તચર ઓપરેટરો (PIO) સાથે પરિચય કરાવવામાં આવ્યો હતો. ગગનદીપ સિંહ પીઆઈઓ મારફત નાણાં પણ મેળવતો હતો. તેણે એક મોબાઈલ ફોન દ્વારા ગુપ્ત માહિતી PIO સાથે શેર કરી હતી. આ ઉપરાંત, તેનો ૨૦થી વધુ ISIના લોકો સાથે સંપર્ક હોવાનું પણ સામે આવ્યું છે, જેના વિગતવાર પુરાવા પોલીસે મેળવી લીધા છે.
પોલીસના જણાવ્યા અનુસાર, ગગનદીપ સિંહ સેનાની તૈનાતી, સેના સાથે જોડાયેલી ગતિવિધિઓ અને અન્ય ગોપનીય માહિતી શેર કરવામાં સક્રિય હતો, જેનાથી દેશની સુરક્ષાને મોટો ખતરો થઈ શકતો હતો. આરોપી વિરુદ્ધ તરનતારન પોલીસ સ્ટેશનમાં સત્તાવાર ગુપ્તતા અધિનિયમ (Official Secrets Act) હેઠળ FIR નોંધવામાં આવી છે અને આ કેસમાં વધુ તપાસ ચાલી રહી છે. આ ધરપકડ રાષ્ટ્રીય સુરક્ષા માટે એક મહત્વપૂર્ણ સિદ્ધિ માનવામાં આવે છે.