વૉશિંગ્ટન ડીસીમાં આયોજિત યુએસ-ઈન્ડિયા સ્ટ્રેટેજિક પાર્ટનરશિપ ફોરમમાં અમેરિકાના વાણિજ્ય સચિવ હૉવર્ડ લુટનિકે ભારત અને અમેરિકા વચ્ચે વધતી જતી નિકટતા અને મજબૂત સંબંધો અંગે ખુલીને વાત કરી. તેમણે ભારતના વડાપ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પની લોકપ્રિયતા અને જનાદેશની પ્રશંસા કરતાં જણાવ્યું કે, "ટ્રમ્પ અમેરિકાના એવા નેતા છે જેમને આખા દેશે પસંદ કર્યા છે, અને ભારતમાં વડાપ્રધાન મોદીની સ્થિતિ પણ એવી જ છે. દુનિયામાં આવા નેતાઓ બહુ ઓછા છે, જેમને આખા દેશનો જનાદેશ મળે. આ બંને નેતાઓના સંબંધોને ખાસ અને દુર્લભ બનાવે છે, જે વેપાર કરારના રૂપે સકારાત્મક શરૂઆત બની શકે છે. મજબૂત સંબંધો વેપાર કરારનો માર્ગ સરળ બનાવે છે."

લુટનિકે વેપાર કરારની પ્રક્રિયા અંગે જણાવ્યું કે, "વેપાર કરારમાં સામાન્ય રીતે વર્ષો લાગે છે, પરંતુ ભારત આ પ્રક્રિયાને ઝડપથી આગળ વધારવા માટે સક્રિય છે. પહેલું પગલું ભરનાર દેશને હંમેશા સારી ડીલ મળે છે. અમને આશા છે કે ટૂંક સમયમાં એવો કરાર થશે જે બંને દેશો માટે ફાયદાકારક હશે."

તેમણે ભારત પ્રત્યેના વ્યક્તિગત લગાવનો ઉલ્લેખ કરતાં કહ્યું, "હું ભારતનો ખૂબ મોટો પ્રશંસક છું. મારા નજીકના મિત્રોમાં નિકેશ અરોરા છે, જે ભારતીય છે. જ્યારે હું ભારત જાઉં છું, ત્યારે અમે ક્રિકેટ રમીએ છીએ, ઘરે પાર્ટીઓ કરીએ છીએ, એ એક અલગ અનુભવ છે."

આર્ટિફિશિયલ ઇન્ટેલિજન્સ (એઆઈ) અને ટેકનિકલ સહયોગ પર ભાર મૂકતાં લુટનિકે જણાવ્યું, "ટ્રમ્પ પ્રશાસન સહયોગી દેશો સાથે મળીને કામ કરવા માટે પ્રતિબદ્ધ છે. અમે અમારી શ્રેષ્ઠ ચિપ્સ મિત્ર દેશોને આપવા ઇચ્છીએ છીએ, પરંતુ શરત એ છે કે તે ખોટા હાથમાં ન જાય. જો ભારત વિશાળ ડેટા સેન્ટર્સ બનાવવા અને એઆઈ ક્રાંતિમાં ભાગીદાર બનવા ઇચ્છે છે, તો અમે તેના માટે તૈયાર છીએ. રાષ્ટ્રપતિ ટ્રમ્પનો દૃષ્ટિકોણ 'અમેરિકા ફર્સ્ટ' છે, પરંતુ ફક્ત અમેરિકા નહીં. પોતાના દેશને મજબૂત કર્યા બાદ સહયોગી દેશોનું ધ્યાન રાખવું જરૂરી છે. ભારત પ્રત્યે ટ્રમ્પના મનમાં ખાસ સન્માન છે, અને અમે ભારત સાથે એક મહાન ભાગીદારી તરફ આગળ વધી રહ્યા છીએ."