નવી દિલ્હી, તા. ૩ જૂન, ૨૦૨૫: કેન્દ્ર સરકારે લદ્દાખ કેન્દ્રશાસિત પ્રદેશના સ્થાનિક લોકોને નોકરીઓ અને અન્ય લાભોમાં અગ્રતા આપવા માટે એક મહત્વપૂર્ણ નિર્ણય લીધો છે. રાષ્ટ્રપતિ દ્રૌપદી મુર્મુએ 'ધ યુનિયન ટેરિટરી ઑફ લદ્દાખ રિઝર્વેશન (એમેન્ડમેન્ટ) રેગ્યુલેશન, ૨૦૨૫' નામનો વટહુકમ બહાર પાડ્યો છે. આ વટહુકમ દ્વારા જમ્મુ અને કાશ્મીર અનામત અધિનિયમ, ૨૦૦૪ માં લદ્દાખ કેન્દ્રશાસિત પ્રદેશને લાગુ પડતા સુધારા કરવામાં આવ્યા છે.
આ નવા નિયમન મુજબ, લદ્દાખમાં ૧૦% EWS (આર્થિક રીતે નબળા વર્ગો) માટેના અનામત ઉપરાંત, અન્ય વર્ગો માટે ૮૫% અનામત લાગુ પડશે. વટહુકમમાં સ્પષ્ટપણે જણાવવામાં આવ્યું છે કે, આર્થિક રીતે નબળા વર્ગો માટેના અનામતને બાદ કરતાં, કુલ અનામત કોઈ પણ સંજોગોમાં ૮૫% થી વધુ નહીં હોય. આનો અર્થ એ થયો કે લદ્દાખના સ્થાનિક લોકોને સરકારી નોકરીઓ અને શૈક્ષણિક સંસ્થાઓમાં મોટા પાયે અનામતનો લાભ મળશે.
રાષ્ટ્રપતિએ બંધારણના અનુચ્છેદ ૨૪૦ હેઠળ મળેલ સત્તાઓનો ઉપયોગ કરીને, જમ્મુ અને કાશ્મીર પુનર્ગઠન અધિનિયમ, ૨૦૧૯ ની કલમ ૫૮ ના પેટા-કલમ (૨) સાથે વાંચતા, આ નિયમન પ્રસિદ્ધ કર્યું છે. આ 'ધ યુનિયન ટેરિટરી ઑફ લદ્દાખ રિઝર્વેશન (એમેન્ડમેન્ટ) રેગ્યુલેશન, ૨૦૨૫' (નં. ૧ ઓફ ૨૦૨૫) સમગ્ર લદ્દાખ કેન્દ્રશાસિત પ્રદેશમાં લાગુ પડશે.
જોકે, આ વટહુકમ કઈ તારીખથી અમલમાં આવશે તે અંગે કેન્દ્ર સરકાર સત્તાવાર ગેઝેટમાં નોટિફિકેશન દ્વારા જાણ કરશે. આ નિર્ણય લદ્દાખના સ્થાનિક લોકોની લાંબા સમયથી ચાલી આવતી માંગણીને પૂર્ણ કરતો હોવાનું મનાય છે અને તેનાથી પ્રદેશમાં સામાજિક-આર્થિક સમાનતા લાવવામાં મદદ મળશે તેવી અપેક્ષા છે.