ઝાબુઆ, 4 જૂન, 2025: મધ્યપ્રદેશના ઝાબુઆ જિલ્લામાં થાંદલા-મેઘનગર રોડ પર સંજેલી રેલવે ફાટક નજીક ગત મોડી રાત્રે એક ભયાનક માર્ગ અકસ્માતમાં 9 લોકોના કરુણ મોત નિપજ્યા છે. આ ઘટના બુધવારે મોડી રાત્રે લગભગ 2 વાગ્યે બની હતી, જ્યારે સિમેન્ટથી ભરેલો એક ટ્રક નિર્માણાધીન ઓવરબ્રિજ પાસેના વળાંક પર એક કાર પર પલટી ગયો હતો. આ દુર્ઘટનામાં કારમાં સવાર તમામ લોકો કાળનો કોળિયો બન્યા હતા.
લગ્ન સમારોહથી પરત ફરતો પરિવાર અકસ્માતનો ભોગ બન્યો
પોલીસ પાસેથી મળતી માહિતી મુજબ, મૃત્યુ પામેલા 9 લોકોમાંથી આઠ થાંદલા નજીકના શિવગઢ મહુદા ગામના રહેવાસી હતા, જ્યારે એક અન્ય મૃતક પણ શિવગઢ નજીકના ગામનો હોવાનું જાણવા મળ્યું છે. આ તમામ દુર્ભાગી લોકો એક જ પરિવારના સભ્યો હતા અને મોડી રાત્રે એક લગ્ન સમારોહમાંથી પોતાના ઘરે પરત ફરી રહ્યા હતા ત્યારે આ ગમખ્વાર ઘટના બની હતી.
ઝાબુઆના પોલીસ અધિક્ષક (SP) પદ્મવિલોચન શુક્લા આ મામલે તપાસ કરી રહ્યા છે. તેમણે જણાવ્યું કે, ટ્રક મેઘનગર તહસીલ વિસ્તાર હેઠળ આવતા સંજેલી રેલવે ક્રોસિંગ નજીક એક ખરાબ રસ્તા પરથી નિર્માણાધીન રેલ ઓવરબ્રિજ (ROB) ને પાર કરી રહ્યો હતો. આ દરમિયાન, ટ્રકનું સંતુલન બગડ્યું અને તે નિયંત્રણ ગુમાવીને સામેથી આવી રહેલી કાર પર પલટી ગયો. ટ્રક સિમેન્ટથી ભરેલો હોવાથી, કાર પર ભયંકર દબાણ આવ્યું અને અંદર બેઠેલા લોકોને બચવાની કોઈ તક મળી ન હતી.
ઘટનાની જાણ થતાં જ પોલીસ અને બચાવ દળો ઘટનાસ્થળે પહોંચી ગયા હતા અને મૃતદેહોને બહાર કાઢવાની કામગીરી હાથ ધરી હતી. હાલ આ સમગ્ર મામલે ઊંડાણપૂર્વક તપાસ ચાલી રહી છે, જેથી અકસ્માતનું ચોક્કસ કારણ જાણી શકાય અને જવાબદારો સામે કાર્યવાહી કરી શકાય. આ દુર્ઘટનાએ સમગ્ર વિસ્તારમાં શોકની લાગણી પ્રસરાવી છે.