બાગપત (ઉત્તર પ્રદેશ) : ઉત્તર પ્રદેશના બાગપત જિલ્લામાં બે ભાઈઓ વચ્ચેના જમીન વિવાદે એક ચોંકાવનારો વળાંક લીધો છે, જ્યાં ભારતીય સેનાના સૈનિકોએ 'કૌટુંબિક ઝઘડા'માં સીધો પ્રવેશ કર્યો હતો. સેનામાં કર્નલ તરીકે ફરજ બજાવતા એક ભાઈએ પોતાના કાકા અને બીજા ભાઈ પાસેથી ઘરનો કબજો લેવા માટે સૈનિકોની એક ટુકડી મોકલી દીધી હતી. ફિલ્મી શૈલીમાં ગામમાં પહોંચેલા અડધો ડઝન સૈનિકોએ ઘરનો દરવાજો અને તાળા તોડીને તેનો કબજો લીધો હતો. એટલું જ નહીં, સૈનિકોએ હથોડાની મદદથી ઘરનો લોખંડનો દરવાજો તોડી નાખ્યો અને તેને પોતાના ટ્રકમાં ભરીને લઈ ગયા! આ સમગ્ર ઘટનાનો વીડિયો સોશિયલ મીડિયા પર વાયરલ થતાં ખળભળાટ મચી ગયો છે, અને બારોટ કોતવાલી પોલીસે કેસ નોંધીને તપાસ શરૂ કરી છે.
પૈતૃક જમીનનો વિવાદ અને કર્નલનો 'લશ્કરી દાવ'
વાજીદપુર ગામના રહેવાસી ધીર સિંહ તોમરે પોલીસને આપેલી ફરિયાદમાં જણાવ્યું કે તેઓ 2012 માં સરુરપુર ખેડકી ગામની ઇન્ટર કોલેજમાંથી પ્રિન્સિપાલ પદેથી નિવૃત્ત થયા હતા. હાલમાં, તેઓ તેમની પત્ની સુશીલા અને સગીર પૌત્રી હિમાંશી (ધોરણ 11માં અભ્યાસ કરતી) સાથે ગામમાં રહે છે. હિમાંશીના પિતાનું 2011 માં અવસાન થયું હતું.
ધીર સિંહે જણાવ્યું કે તેમણે ડિસેમ્બર 2024 માં ગામમાં તેમની પૈતૃક જમીન પર ઘર બનાવવાનું શરૂ કર્યું હતું અને તે ઘર તેમણે પોતાની પૌત્રી હિમાંશીને ભેટ આપ્યું હતું. પરંતુ, જ્યારે ઘર તૈયાર થયું, ત્યારે તેમના નાના ભાઈ ઋષિપાલ અને તેમના પુત્ર, જે જમ્મુ અને કાશ્મીરમાં સિગ્નલ રેજિમેન્ટમાં તૈનાત લેફ્ટનન્ટ કર્નલ તરુણ કુમાર છે, તેમણે આ ઘરમાં દખલગીરી શરૂ કરી.
સૈનિકો દ્વારા ઘર પર કબજો અને ધમકી
ફરિયાદ મુજબ, 17 મે, 2025 ના રોજ, લેફ્ટનન્ટ કર્નલ તરુણ કુમાર અને તેમના પિતા ઋષિપાલે ઘરનું તાળું તોડ્યું. આ પછી, 19 મે ના રોજ બપોરે 2 વાગ્યે, ઋષિપાલ, તેમની પત્ની અને પુત્ર લેફ્ટનન્ટ કર્નલ તરુણ કુમાર મેરઠથી કેટલાક સૈનિકોને લશ્કરના વાહનમાં લાવ્યા. આશ્ચર્યજનક રીતે, વાહનની નંબર પ્લેટ પર સફેદ કાગળ લગાડેલો હતો.
આ સૈનિકોએ જાણે કોઈ લશ્કરી ઓપરેશન હોય તેમ, ધીર સિંહના ઘરનું તાળું તોડી નાખ્યું અને તેનો દરવાજો ઉખેડી નાખ્યો. આ દરવાજો હથોડાની મદદથી તોડીને સૈનિકોએ તેને સેનાના વાહનમાં ભરી લીધો. આ દરમિયાન, ઘરનો સામાન પણ નાશ પામ્યો. જ્યારે સગીર પૌત્રી હિમાંશીએ આ ઘટનાનો વીડિયો બનાવવાનો પ્રયાસ કર્યો, ત્યારે તેને માર મારવામાં આવ્યો અને ધમકી આપવામાં આવી કે જો તે આ ઘરમાં રહેશે તો બધાને ગોળી મારી દેવામાં આવશે.
આ ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે, જેમાં સૈનિકો સ્પષ્ટપણે દરવાજો તોડતા અને સામાન ખસેડતા જોવા મળે છે. આ ઘટનાએ સેનાના જવાનોના ઉપયોગ અને કૌટુંબિક વિવાદમાં સરકારી મિલકતના દુરુપયોગ અંગે ગંભીર સવાલો ઊભા કર્યા છે. બારોટ પોલીસે આ મામલે કેસ નોંધીને તપાસ શરૂ કરી છે, અને આ ઘટનાથી સમગ્ર વિસ્તારમાં ચકચાર મચી ગઈ છે.