બેંગલુરુ: અહીં આરસીબીની આઇપીએલ જીતની ઉજવણી દરમિયાન થયેલી નાસભાગમાં ૧૧ લોકોના મોત અને ૩૦ થી વધુ લોકોના ઘાયલ થવા બાદ આઇપીએલ અધ્યક્ષે સ્પષ્ટતા કરી છે કે, સ્ટેડિયમની અંદરના ખેલાડીઓ અને અધિકારીઓને બહારની દુર્ઘટના વિશે કોઈ જાણકારી નહોતી. તેમણે કાર્યક્રમના આયોજન અને ભીડના વ્યવસ્થાપન અંગે અજાણતા વ્યક્ત કરી. આરસીબી ફ્રેન્ચાઇઝી અને વિરાટ કોહલીએ આ દુ:ખદ ઘટના પર શોક વ્યક્ત કર્યો છે. બીસીસીઆઈ એ પણ આ ઘટનાને કમનસીબ ગણાવી છે અને ભવિષ્યમાં આવા આયોજનો માટે વધુ સારી સુરક્ષા વ્યવસ્થાની જરૂરિયાત પર ભાર મૂક્યો છે. આ ઘટનાએ મોટા જાહેર કાર્યક્રમોના આયોજન અને ભીડ નિયંત્રણની સુરક્ષા વ્યવસ્થા પર ગંભીર પ્રશ્નો ઉભા કર્યા છે.

 

 

વિગતવાર જોઈએ તો રોયલ ચેલેન્જર્સ બેંગલુરુ (આરસીબી) ની આઈપીએલ ટ્રોફી જીતની ઉજવણી દરમિયાન એમ. ચિન્નાસ્વામી સ્ટેડિયમ બહાર થયેલી નાસભાગની દુ:ખદ ઘટના અંગે આઈપીએલ ના અધ્યક્ષે મહત્વપૂર્ણ સ્પષ્ટીકરણ આપ્યું છે. તેમણે જણાવ્યું છે કે, સ્ટેડિયમની અંદર હાજર ખેલાડીઓ અને અધિકારીઓને બહાર બનેલી આ દુર્ઘટના વિશે કોઈ જાણકારી નહોતી, તેથી જ ઉજવણી ચાલુ રહી હતી. આ ઘટનામાં ઓછામાં ઓછા ૧૧ લોકોના મોત થયા છે અને ૩૦ થી વધુ લોકો ઘાયલ થયા છે.

 

 

આઇપીએલ અધ્યક્ષે કહ્યું, "સ્ટેડિયમની અંદર હાજર ખેલાડીઓ અને અધિકારીઓને આ દુ:ખદ ઘટના વિશે કોઈ જાણકારી નહોતી." તેમણે વધુમાં ઉમેર્યું, "મને એ પણ જાણ નથી કે આ કાર્યક્રમનું આયોજન કોણે કર્યું હતું અને આટલી મોટી ભીડ સ્થળ પર કેવી રીતે પહોંચી."

 

 

 

પ્રાપ્ત માહિતી અનુસાર, મેચ જીતનાર આરઆરસીએ પોતાની પ્રથમ આઈપીએલ ટ્રોફી જીત્યા બાદ બેંગલુરુમાં વિજય પરેડ અને ઉજવણીનું આયોજન કર્યું હતું. આ કાર્યક્રમ માટે ટીમે પોતાની વેબસાઇટ દ્વારા ચાહકોને મફત પાસ આપ્યા હતા અને પોલીસ તથા અધિકારીઓ દ્વારા નિર્ધારિત દિશાનિર્દેશોનું પાલન કરવા વિનંતી કરી હતી. 

 

 

જોકે, એમ. ચિન્નાસ્વામી સ્ટેડિયમની બહાર હજારોની સંખ્યામાં, અંદાજે ત્રણેક લાખ ચાહકો એકઠા થતાં અરાજકતા સર્જાઈ હતી અને નાસભાગ જેવી સ્થિતિ ઊભી થઈ હતી, જેના કારણે ઘણા લોકોના જીવ ગયા અને સંખ્યાબંધ લોકો ઘાયલ થયા.

 

 

કર્ણાટકના મુખ્યમંત્રી સિદ્ધારામૈયાએ પણ જણાવ્યું હતું કે, "ઉજવણીના સમયે, આ કમનસીબ ઘટના ન થવી જોઈતી હતી. અમે આનાથી દુઃખી છીએ. કોઈને પણ આટલી ભીડની અપેક્ષા નહોતી."

 

 

આરસીબી અને વિરાટ કોહલીનો પ્રતિભાવ: આ દુર્ઘટના બાદ રોયલ ચેલેન્જર્સ બેંગલુરુ (આરસીબી) ફ્રેન્ચાઇઝીએ એક સત્તાવાર નિવેદન બહાર પાડીને દુ:ખ વ્યક્ત કર્યું છે. આરસીબી એ જણાવ્યું કે, "અમે સાર્વજનિક મેળાવડાઓ સંબંધિત મીડિયા રિપોર્ટ્સ દ્વારા સામે આવેલી કમનસીબ ઘટનાઓથી અત્યંત દુ:ખી છીએ. દરેક વ્યક્તિની સુરક્ષા અને સુખાકારી અમારા માટે અત્યંત મહત્વપૂર્ણ છે. આરસીબી જીવ ગુમાવનારા લોકોના દુ:ખમાં સહભાગી છે અને અસરગ્રસ્ત પરિવારો પ્રત્યે અમારી હૃદયપૂર્વકની સંવેદના વ્યક્ત કરીએ છીએ. પરિસ્થિતિની જાણ થતાં જ, અમે તરત જ અમારા કાર્યક્રમમાં સુધારો કર્યો અને સ્થાનિક પ્રશાસનના માર્ગદર્શન અને સલાહનું પાલન કર્યું."

 

 

વિરાટ કોહલીએ પણ આ ઘટના પર પ્રતિક્રિયા આપતા ઇન્સ્ટાગ્રામ પર લખ્યું હતું કે, "શબ્દો નથી. સંપૂર્ણપણે દુ:ખી છું." તેમણે આરસીબી ના સત્તાવાર નિવેદનને પણ શેર કર્યું હતું.

 

 

બીસીસીઆઈ અને આયોજન પર પ્રશ્નો: ભારતીય ક્રિકેટ કંટ્રોલ બોર્ડ (બીસીસીઆઈ) ના સચિવ દેવજીત સૈકિયાએ આ ઘટનાને "કમનસીબ" ગણાવી હતી અને કહ્યું હતું કે, "આ લોકપ્રિયતાની નકારાત્મક બાજુ છે. લોકો પોતાના ક્રિકેટરો માટે પાગલ છે. આયોજકોએ તેનું વધુ સારી રીતે આયોજન કરવું જોઈતું હતું." આઇપીએલ અધ્યક્ષ અરુણ ધૂમલે પણ સ્પષ્ટ કર્યું હતું કે, બીસીસીઆઈ ને આ ઉજવણી કાર્યક્રમ વિશે કોઈ પૂર્વ જાણકારી નહોતી, કારણ કે આઇપીએલ સત્તાવાર રીતે એક દિવસ પહેલા સમાપ્ત થઈ ગઈ હતી. તેમણે જણાવ્યું કે, આ ઘટનાની તપાસ થવી જોઈએ અને ભવિષ્યમાં આવા બનાવો ન બને તે સુનિશ્ચિત કરવું જોઈએ.