મુંબઈ : મુંબઈના વેસ્ટર્ન લાઇન પર આવેલા ચર્ચગેટ રેલવે સ્ટેશન પરિસરમાં આજે સાંજે એક દુકાનમાં ભીષણ આગ લાગતા અફરાતફરીનો માહોલ સર્જાયો હતો. સાંજે ૫:૨૬ વાગ્યાની આસપાસ બનેલી આ ઘટનામાં સ્ટેશનના કોનકોર્સ વિસ્તારમાં આવેલા એક સ્ટોલમાં શોર્ટ સર્કિટને કારણે સ્પાર્કિંગ થયા બાદ આગે વિકરાળ સ્વરૂપ ધારણ કર્યું હતું. જોકે, મુંબઈ ફાયર બ્રિગેડ (MFB), પોલીસ અને વોર્ડ સ્ટાફની ત્વરિત કાર્યવાહી તથા રેલવે સ્ટાફની સતર્કતાને કારણે પાંચ જ મિનિટમાં આગ પર કાબુ મેળવી લેવાયો હતો અને કોઈ જાનહાનિના અહેવાલ નથી.
આગ લાગ્યાની જાણ થતાં જ સમગ્ર વિસ્તારમાં ધુમાડો ફેલાઈ ગયો હતો, જેના દ્રશ્યો સોશિયલ મીડિયા પર શેર કરાયેલા વીડિયોમાં સ્પષ્ટપણે જોઈ શકાય છે. ભારે ધુમાડાના કારણે પ્લેટફોર્મ પર હાજર મુસાફરોને શ્વાસ લેવામાં તકલીફ પડી હતી અને ગભરાટનો માહોલ સર્જાયો હતો. લોકોએ સલામત સ્થળે ખસી જવાનો પ્રયાસ કરતા થોડી અંધાધૂંધી પણ ફેલાઈ હતી.
પ્રાથમિક માહિતી મળતાની સાથે જ મુંબઈ ફાયર બ્રિગેડની ટીમો ઘટનાસ્થળે પહોંચી ગઈ હતી. ફાયર બ્રિગેડના જવાનો અને રેલવેના સતર્ક સ્ટાફે તાત્કાલિક અગ્નિશામકનો ઉપયોગ કરીને આગ બુઝાવવાની કામગીરી શરૂ કરી દીધી હતી. તેમની સમયસરની અને કુશળ કામગીરીને કારણે આગ વધુ ફેલાઈ ન હતી અને ગણતરીની મિનિટોમાં જ પરિસ્થિતિ પર નિયંત્રણ મેળવી લેવાયું હતું.
નવી માહિતી અનુસાર, આગ પર સંપૂર્ણપણે કાબુ મેળવી લેવામાં આવ્યો છે અને આ દુર્ઘટનામાં કોઈને ઈજા થઈ હોવાના કોઈ અહેવાલ પ્રાપ્ત થયા નથી. જોકે, આ ઘટનાએ રેલવે સ્ટેશન પરિસરમાં આવેલી દુકાનો અને સ્ટોલની સુરક્ષા વ્યવસ્થા પર ફરી એકવાર સવાલો ઉભા કર્યા છે. સત્તાવાળાઓ દ્વારા આગના ચોક્કસ કારણ અને ભવિષ્યમાં આવી ઘટનાઓ અટકાવવા માટે જરૂરી પગલાં લેવામાં આવશે તેવી અપેક્ષા છે.