૩ વર્ષની બાળકી પર બળાત્કારનો આરોપી પોલીસ એન્કાઉન્ટરમાં ઠાર
લખનૌના આલમબાગ વિસ્તારમાં ૩ વર્ષની માસૂમ બાળકી પર બળાત્કારના કેસમાં પોલીસે કડક કાર્યવાહી કરી
લખનૌ તા.૬: ઉત્તર પ્રદેશના લખનૌના આલમબાગ વિસ્તારમાં ૩ વર્ષની માસૂમ બાળકી પર બળાત્કારના કેસમાં પોલીસે કડક કાર્યવાહી કરી છે. ગયા બુધવારે બનેલી આ ઘટનામાં આરોપીને શોધવા માટે પોલીસે ૫ ખાસ ટીમો બનાવી હતી. હવે, માત્ર ૨૪ કલાકની શોધખોળ બાદ પોલીસે આરોપી દીપક વર્માને એન્કાઉન્ટરમાં ઠાર માર્યો છે. ગયા બુધવારે મધ્યરાત્રિએ બાળકીનું અપહરણ અને બળાત્કાર થયાના અહેવાલ બાદ, પોલીસે CCTV ફૂટેજ પરથી દીપકની ઓળખ કરી હતી અને તેની ધરપકડ પર ૧ લાખ રૂપિયાનું ઈનામ જાહેર કર્યું હતું. આ ઉપરાંત, રસ્તામાં લગાવેલા CCTVના આધારે દીપકનો સ્કૂટી નંબર પણ ટ્રેક કરવામાં આવ્યો હતો.
બુધવારે મોડી રાત્રે ઉન્નાવના એક દંપતી તેમની ૩ વર્ષની પુત્રી સાથે આલમબાગ મેટ્રો સ્ટેશન નીચે ફૂટપાથ પર સૂઈ રહ્યા હતા ત્યારે આ બળાત્કારની ઘટના બની. રાત્રે ૨ થી ૨.૩૦ વાગ્યાની વચ્ચે, એક અજાણ્યા વ્યક્તિએ બાળકીને ઉપાડી લીધી અને તેને થોડે દૂર લઈ ગયો અને તેના પર બળાત્કાર કર્યો અને ભાગી ગયો.
બાળકીના રડવાનો અવાજ સાંભળીને, એક રાહદારીએ માતાપિતાને જાણ કરી. પરિવાર તાત્કાલિક બાળકીને નજીકની લોકબંધુ હોસ્પિટલમાં લઈ ગયો, જ્યાં ડોક્ટરોએ પુષ્ટિ આપી કે તેના પર બળાત્કાર થયો છે. બાળકીની ગંભીર સ્થિતિ જોઈને, પ્રાથમિક સારવાર બાદ, તેને લખનૌની કિંગ જ્યોર્જ મેડિકલ યુનિવર્સિટીમાં રિફર કરવામાં આવી. ડોક્ટરોનું કહેવું છે કે છોકરીને વધુ સારી સારવાર માટે ઉચ્ચ કેન્દ્રમાં દાખલ કરવામાં આવી છે.
ઘટનાની જાણ થતાં જ આલમબાગ પોલીસ અને વરિષ્ઠ ઝોન અધિકારીઓ ઘટનાસ્થળે પહોંચ્યા. ડીસીપી સેન્ટ્રલ આશિષ શ્રીવાસ્તવે જણાવ્યું કે આ કેસમાં આલમબાગ પોલીસ સ્ટેશનમાં એફઆઈઆર નોંધવામાં આવી છે. આ પછી, આલમબાગ વીવીઆઈપી રોડ પર ધરપકડના પ્રયાસ દરમિયાન, આરોપીએ પોલીસ પર ગોળીબાર કર્યો અને જવાબી ગોળીબારમાં આરોપીનું મોત થયું. ઐશબાગ વિસ્તારનો રહેવાસી દીપક વર્મા રેલવેમાં પાણી સપ્લાયર તરીકે કામ કરતો હતો.
(10:20 AM IST)
છેલ્લા 8 દિવસમાં સૌથી લોકપ્રિય 
