કીવ, તા.૭: યુક્રેનના ભયાનક ડ્રોન હુમલા બાદ રશિયાનો બદલો ચાલુ છે. રશિયા શનિવારે પૂર્વીય યુક્રેનિયન શહેર ખાર્કિવ પર ભીષણ ડ્રોન અને મિસાઇલ હુમલો કર્યો, જેમાં ઓછામાં ઓછા ૩ લોકો માર્યા ગયા અને ૨૧ ઘાયલ થયા. યુક્રેનિયન સ્‍થાનિક અધિકારીઓએ આ વાતની પુષ્ટિ કરી છે.

રશિયા દ્વારા યુક્રેન પર સતત અને વ્‍યાપક હુમલાઓની શ્રેણીમાં આ હુમલો વધુ એક ખતરનાક પગલું છે. ખાર્કિવના મેયર ઇગોર તેરેખોવે જણાવ્‍યું હતું કે હુમલામાં ૧૮ બહુમાળી ઇમારતો અને ૧૩ ખાનગી મકાનોને નુકસાન થયું છે.

પ્રારંભિક માહિતી અનુસાર, રશિયાએ આ હુમલામાં ૪૮ ‘શહીદ ડ્રોન', ૨ મિસાઇલ અને ૪ એરિયલ ગ્‍લાઇડ બોમ્‍બનો ઉપયોગ કર્યો. એરિયલ ગ્‍લાઇડ બોમ્‍બ અત્‍યંત ઘાતક માનવામાં આવે છે, કારણ કે તે ચોક્કસાઈથી લક્ષ્યને ફટકારે છે અને મોટા પાયે વિનાશ કરી શકે છે.

તાજેતરમાં, યુક્રેને ડ્રોન દ્વારા રશિયા પર હુમલો કર્યો. રોઇટર્સે ત્રણ ઓપન સોર્સ વિશ્‍લેષકોને ટાંકીને કહ્યું છે કે યુક્રેને રશિયાની અંદર ડ્રોન હુમલો કર્યા પછી તરત જ લીધેલા રશિયન એરબેઝના સેટેલાઇટ ફોટા દર્શાવે છે કે ઘણા બોમ્‍બમારા વિમાનો નાશ પામ્‍યા હતા અને ખરાબ રીતે નુકસાન થયું હતું.

યુક્રેને લક્ષ્યની નજીક કન્‍ટેનરમાંથી છોડવામાં આવેલા ૧૧૭ માનવરહિત હવાઈ વાહનોનો ઉપયોગ કરીને રશિયામાં લગભગ ચાર એરબેઝને નિશાન બનાવ્‍યા હતા. રોઇટર્સ દ્વારા ચકાસાયેલ ઓપરેશનના ડ્રોન ફૂટેજ દર્શાવે છે કે નજીકના બે સ્‍થળોએ ઘણા એરબેઝ પર હુમલો કરવામાં આવ્‍યો હતો.