બાબા સિદ્દીકીની હત્યાના માસ્ટરમાઇન્ડને કેનેડા પોલીસે ઝડપી પાડયો
લોરેન્સ બિશ્નોઈ ગેંગ સાથે જોડાયેલા શાર્પશૂટરની ધરપકડથી મુંબઈ પોલીસની તપાસને નવી દિશા મળી શકે છે
મુંબઈ, તા.૭: મહારાષ્ટ્રના રાજકારણમાં મોટી ઉથલપાથલ સર્જનાર એનસીપી (અજીત પવાર જૂથ) નેતા બાબા સિદ્દીકી ની હત્યાના કેસમાં મહત્વનો વળાંક આવ્યો છે. આ કેસના મુખ્ય આરોપી અને માસ્ટરમાઇન્ડ ગણાતા ઝીશાન અખ્તર ઉર્ફે જસ્સી પુરેવાલની કેનેડાની સરે પોલીસે ધરપકડ કરી હોવાના અહેવાલ છે. જોકે, આ ધરપકડ કયા ચોક્કસ કેસમાં કરવામાં આવી છે તે હજુ સ્પષ્ટ થયું નથી. મુંબઈ પોલીસે હજુ સુધી આ બાબતે સત્તાવાર પુષ્ટિ આપી નથી, પરંતુ તેઓ કેનેડાની સરે પોલીસ સાથે સંપર્કમાં છે અને વધુ માહિતી મેળવવાનો પ્રયાસ કરી રહ્યા છે.
બાબા સિદ્દીકી, જેઓ બોલિવૂડ સ્ટાર સલમાન ખાનના નજીકના મિત્ર હતા, તેમની હત્યા ૧૨ ઓક્ટોબર, ૨૦૨૪ના રોજ મુંબઈના બાંદ્રા વિસ્તારમાં તેમના પુત્ર ઝીશાન સિદ્દીકીની ઓફિસની બહાર થઈ હતી. લોરેન્સ બિ‘ોઈ ગેંગે આ હત્યાની જવાબદારી લીધી હતી અને દાવો કર્યો હતો કે સિદ્દીકીની સલમાન ખાન સાથેની નિકટતા આ હત્યા પાછળનું કારણ હતું. આ ગેંગની સલમાન ખાન સાથે લાંબા સમયથી દુશ્મની ચાલી રહી છે. હત્યા બાદ મુંબઈ પોલીસે તપાસ શરૂ કરી અને અનેક આરોપીઓની ધરપકડ કરી, જેમાંથી ઝીશાન અખ્તરનું નામ મુખ્ય આરોપી તરીકે સામે આવ્યું.
મુંબઈ પોલીસની તપાસમાં જાણવા મળ્યું છે કે ઝીશાન અખ્તર, જે પંજાબના જલંધરનો રહેવાસી છે, આ હત્યાનો મુખ્ય સૂત્રધાર હતો. હત્યા દરમિયાન તે ઘટનાસ્થળે હાજર હતો અને ગોળીબાર કરનારાઓ સાથે સીધો સંપર્કમાં હતો. પોલીસના જણાવ્યા અનુસાર, ઝીશાને લોરેન્સ બિશ્નોઈના ભાઈ અનમોલ બિ‘ોઈ સાથે ફોન પર વાતચીત કરી હતી. જો ગોળીબાર કરનારાઓ બાબા સિદ્દીકીને મારવામાં નિષ્ફળ જાય, તો ઝીશાને તેને ગોળી મારવાની યોજના હતી. હત્યા બાદ, ઝીશાને ઘટનાસ્થળના ફોટા અને વીડિયો અનમોલ બિ‘ોઈને મોકલ્યા હતા. હત્યા પછી તે પાકિસ્તાની ડોન શહજાદ ભટ્ટીની મદદથી વિદેશ ભાગી ગયો હતો.
ઝીશાન અખ્તરનો ગુનાહિત ઇતિહાસ પણ પોલીસ તપાસમાં બહાર આવ્યો છે. તેની ૨૦૨૨માં ધરપકડ થઇ હતી અને તે પટિયાલા જેલમાં હતો, જ્યાંથી તે જૂન ૨૦૨૪માં છૂટયો હતો. તેના પર પંજાબમાં હત્યા, હત્યાનો પ્રયાસ અને લૂંટ જેવા ગંભીર આરોપો હતા. ઝીશાનના લોરેન્સ બિશ્નોઈ ગેંગ સાથે ગાઢ સંબંધો હતા, અને તેણે ગેંગના આદેશ પર અગાઉ પણ ગુનાઓ આચર્યા હતા. ખાસ કરીને, તેણે પંજાબમાં ડેરા સચ્ચા સૌદાના અનુયાયીઓ પર હુમલાની યોજના બનાવી હતી.
બાબા સિદ્દીકીની હત્યા બાદ મુંબઈ પોલીસે ઝડપી કાર્યવાહી કરી અને અનેક આરોપીઓની ધરપકડ કરી. આ કેસમાં અત્યાર સુધી ૨૬ લોકોની ધરપકડ થઈ છે, જેમાં શૂટર્સ ગુરમેલ સિંહ, ધર્મરાજ કશ્યપ અને અન્ય સહયોગીઓનો સમાવેશ થાય છે. પોલીસે જણાવ્યું કે આરોપીઓએ હત્યા પહેલાં બાબા સિદ્દીકીના ઘર અને ઓફિસની રેકી કરી હતી. ઝીશાનને આ હત્યાનો કોન્ટ્રાક્ટ આપવામાં આવ્યો હતો, અને તેણે અન્ય આરોપીઓને હથિયારો અને લોજિસ્ટિક સપોર્ટ પૂરો પાડ્યો હતો.
ઝીશાન અખ્તરે હત્યા બાદ પાકિસ્તાની ડોન શહજાદ ભટ્ટીની મદદથી દેશ છોડ્યો હતો. શહજાદ ભટ્ટીએ એક વીડિયોમાં ઝીશાનની મદદ કરવાની વાત સ્વીકારી હતી અને લોરેન્સ બિશ્નોઈને પોતાનો ‘ભાઈ' ગણાવ્યો હતો. આ વીડિયોમાં તેણે બાબા સિદ્દીકીની હત્યા વિશે મહત્વની માહિતી આપી હતી, જે પોલીસ તપાસમાં મહત્વની સાબિત થઈ.
(3:57 PM IST)
છેલ્લા 8 દિવસમાં સૌથી લોકપ્રિય 
