જયપુર : રાજસ્થાનના રાજકારણમાં શનિવારે એક એવી ઘટના બની, જેણે રાજ્યના રાજકીય વર્તુળોમાં ભારે હડકંપ મચાવ્યો છે. ભલે રાજ્યમાં હાલ ભાજપની પૂર્ણ બહુમતની સરકાર હોય, પરંતુ કોંગ્રેસના બે દિગ્ગજ નેતાઓ, પૂર્વ મુખ્યમંત્રી અશોક ગેહલોત અને AICC મહાસચિવ સચિન પાયલટ વચ્ચેની મુલાકાતથી રાજકીય વર્તુળોમાં અનેક અટકળોએ જન્મ લીધો છે.
રહસ્યમય મુલાકાત: બે કલાક, બંધ બારણે:
શુક્રવારે, કોંગ્રેસ નેતા સચિન પાયલટે પૂર્વ મુખ્યમંત્રી અશોક ગેહલોતના સિવિલ લાઇન્સ સ્થિત નિવાસસ્થાને મુલાકાત લીધી હતી. આ મુલાકાત એટલા માટે ખાસ બની રહી છે કારણ કે, રાજસ્થાન વિધાનસભા ચૂંટણી પહેલાથી જ બંને નેતાઓ વચ્ચે વર્ષો જૂની 'રાજકીય અદાવત' અને મતભેદો હોવાના કયાસ લગાવવામાં આવતા રહ્યા છે. આ બધાની વચ્ચે, બંને નેતાઓ વચ્ચે બંધ બારણે લગભગ બે કલાક સુધી ચાલેલી આ બેઠકે સૌનું ધ્યાન ખેંચ્યું છે અને રાજકીય વર્તુળોમાં તેના અનેક અર્થો કાઢવામાં આવી રહ્યા છે.
પુણ્યતિથિના બહાને રાજકીય સંકેત?
આ મુલાકાત સચિન પાયલટના પિતા અને પૂર્વ કેન્દ્રીય મંત્રી સ્વર્ગીય રાજેશ પાયલટની 25મી પુણ્યતિથિના અવસરે થઈ હતી. સચિન પાયલટે વ્યક્તિગત રીતે ગેહલોતને 11 જૂનના રોજ પાયલટ પરિવારના રાજકીય ગઢ ગણાતા દૌસાના ભંડાના-ઝીરોટા ખાતે યોજાનારા શ્રદ્ધાંજલિ સમારોહમાં હાજરી આપવા આમંત્રણ આપ્યું હતું.
ગેહલોતનો વિડીયો સંદેશ:
આ મુલાકાત બાદ અશોક ગેહલોતે સોશિયલ મીડિયા પર એક નાનો વિડીયો પણ શેર કર્યો હતો. આ વિડીયો સાથે તેમણે લખ્યું, "AICC મહાસચિવ સચિન પાયલટે મને પૂર્વ કેન્દ્રીય મંત્રી સ્વર્ગીય રાજેશ પાયલટની 25મી પુણ્યતિથિ પર તેમના નિવાસસ્થાને આયોજિત થનારા કાર્યક્રમમાં આમંત્રિત કર્યા છે. પૂર્વ મંત્રી અને હું 1980માં એકસાથે લોકસભામાં આવ્યા અને લગભગ 18 વર્ષ સુધી સાંસદ રહ્યા. તેમનું આકસ્મિક નિધન એક વ્યક્તિગત ક્ષતિ અને કોંગ્રેસ પાર્ટી માટે એક મોટો આંચકો છે."
અટકળોનો દોર તેજ:
અશોક ગેહલોતના આ વિડીયો સંદેશમાં ભલે રાજકીય સંકેતો સ્પષ્ટ ન હોય, પરંતુ રાજસ્થાનની રાજનીતિમાં 'નાની સરખી મુલાકાત પણ મોટી હલચલ' જગાવે છે. ભાજપની સરકાર હોવા છતાં, કોંગ્રેસના આ બે કદાવર નેતાઓની આ મુલાકાત આગામી સમયમાં રાજસ્થાન કોંગ્રેસમાં કોઈ મોટા પરિવર્તનના સંકેત આપી રહી છે કે કેમ, તે જોવું રસપ્રદ રહેશે. રાજકીય વિશ્લેષકો આ બેઠકને 2028ની વિધાનસભા ચૂંટણી પહેલા કોંગ્રેસમાં જૂથબંધી સમાપ્ત કરવા અને એકતા લાવવાના પ્રયાસ તરીકે પણ જોઈ રહ્યા છે.