હળવદ, ૦૯ જૂન ૨૦૨૫: હળવદ તાલુકાના મેરુપર ગામના વતની અને ઓસ્ટ્રેલિયામાં સ્થાયી થયેલા ૨૯ વર્ષીય રાજદીપસિંહ ડોડિયા નામના યુવકનું સિડનીમાં ભેદી સંજોગોમાં મોત થયાની હૃદયદ્રાવક ઘટના સામે આવી છે. રાજદીપસિંહ નોકરી પર ગયા બાદ ગુમ થયા હતા, અને તેમનો મૃતદેહ ગત ૬ઠ્ઠી જૂનના રોજ એક નદીના કાંઠેથી મળી આવતા પરિવાર અને ગામમાં શોકનો માહોલ છવાઈ ગયો છે.
મળતી માહિતી મુજબ, રાજદીપસિંહ ડોડિયા સાત વર્ષ પહેલાં સ્ટુડન્ટ વિઝા પર ઓસ્ટ્રેલિયા ગયા હતા. ત્યાં તેમણે પોતાનો અભ્યાસ પૂર્ણ કર્યા બાદ નોકરી કરતા હતા. લગભગ એક વર્ષ પહેલાં જ તેમના લગ્ન થયા હતા અને તેમના પત્ની પણ તેમની સાથે સિડનીમાં રહેતા હતા. ગત ૬ઠ્ઠી જૂનના રોજ રાજદીપસિંહ નોકરી માટે ઘરેથી નીકળ્યા હતા, પરંતુ તેઓ પરત ન ફરતા પરિવારે શોધખોળ આદરી હતી. દુર્ભાગ્યવશ, તેમનો મૃતદેહ નદી કિનારેથી મળી આવતા પરિવાર પર આભ તૂટી પડ્યું છે.
આ ઘટના અંગે વધુ વિગતોની રાહ જોવાઈ રહી છે. રાજદીપસિંહનું મોત કયા સંજોગોમાં થયું તે અંગે હજુ કોઈ સ્પષ્ટતા નથી. ઓસ્ટ્રેલિયન સત્તાવાળાઓ દ્વારા આગામી મંગળવારે રાજદીપસિંહના મૃતદેહનું પોસ્ટમોર્ટમ કરવામાં આવશે. પોસ્ટમોર્ટમ બાદ તેમના પાર્થિવ દેહને વતન, હળવદના મેરુપર ગામ લાવવામાં આવશે. યુવાન વયે થયેલા આ કરુણ મોતના કારણે ડોડિયા પરિવારમાં અને સમગ્ર મેરુપર ગામમાં ગમગીની છવાઈ ગઈ છે.