નવી દિલ્હી : ભારતમાં કોરોના વાયરસ સંક્રમણ ફરી એકવાર ઝડપ પકડતું દેખાઈ રહ્યું છે. કેન્દ્રીય સ્વાસ્થ્ય અને પરિવાર કલ્યાણ મંત્રાલય દ્વારા સોમવારે જાહેર કરાયેલા આંકડા અનુસાર, દેશમાં કોવિડ-૧૯ ના કુલ સક્રિય કેસોની સંખ્યા ૬૪૯૧ પર પહોંચી ગઈ છે, જે ચિંતાજનક છે. આ સાથે જ ઇન્ડિયન સાર્સ-કોવ-૨ જીનોમિક્સ કન્સોર્ટિયમ (INSACOG) દ્વારા કોરોનાના નવા 'XFG વેરિઅન્ટ' ની પણ પુષ્ટિ કરવામાં આવી છે, જેના દેશભરમાં ૧૬૩ કેસ નોંધાયા છે.
રાજ્યવાર કોરોનાની સ્થિતિ અને XFG વેરિઅન્ટનો ફેલાવો:
રાજ્યવાર આંકડાઓ મુજબ, કેરળ આ સમયે સૌથી વધુ પ્રભાવિત રાજ્ય છે, જ્યાં ૧,૯૫૭ સક્રિય કેસ નોંધાયા છે અને છેલ્લા ૨૪ કલાકમાં ૭ નવા કેસ સામે આવ્યા છે. આ ઉપરાંત, મહારાષ્ટ્ર, કર્ણાટક, ગુજરાત, દિલ્હી, પશ્ચિમ બંગાળ, ઉત્તર પ્રદેશ, તમિલનાડુ અને હરિયાણામાં પણ સક્રિય કેસોની સંખ્યા ચિંતાજનક સ્તરે પહોંચી રહી છે.
INSACOG ના અહેવાલ મુજબ, અત્યાર સુધીમાં દેશભરમાં ૧૬૩ કેસોમાં XFG વેરિઅન્ટની પુષ્ટિ થઈ છે. જેમાંથી મહારાષ્ટ્રમાં ૮૯ કેસ, તમિલનાડુમાં ૧૬, કેરળમાં ૧૫, ગુજરાતમાં ૧૧, આંધ્ર પ્રદેશ, મધ્ય પ્રદેશ અને પશ્ચિમ બંગાળમાં ૬-૬ કેસ મળી આવ્યા છે.
XFG વેરિઅન્ટ શું છે અને કેટલો ખતરનાક?
XFG વેરિઅન્ટ એ કોરોના વાયરસના ઓમિક્રોન ઉપવેરિઅન્ટમાંથી વિકસિત થયેલો એક નવો સ્ટ્રેન છે. પ્રતિષ્ઠિત મેડિકલ જર્નલ 'ધ લેન્સેટ' અનુસાર, આ વેરિઅન્ટ સૌપ્રથમ કેનેડામાં સામે આવ્યો હતો. XFG માં ચાર મુખ્ય મ્યુટેશન (His445Arg, Asn487Asp, Gln493Glu અને Thr572Ile) જોવા મળ્યા છે, જે તેને વધુ સંક્રામક અને રોગપ્રતિકારક શક્તિથી બચી નીકળવામાં સક્ષમ બનાવે છે.
મૃત્યુદરની સ્થિતિ:
છેલ્લા ૨૪ કલાકમાં કોઈ મૃત્યુની પુષ્ટિ થઈ નથી તે રાહતની વાત છે, પરંતુ ૧ જાન્યુઆરી ૨૦૨૫ થી અત્યાર સુધીમાં કુલ ૬૫ મૃત્યુ નોંધાયા છે. આ મૃત્યુ ઉત્તર પ્રદેશ, પશ્ચિમ બંગાળ, તમિલનાડુ, પંજાબ, મહારાષ્ટ્ર, મધ્ય પ્રદેશ, કેરળ, કર્ણાટક, ગુજરાત અને દિલ્હીમાંથી સામે આવ્યા છે.
સ્વાસ્થ્ય નિષ્ણાતોનું કહેવું છે કે XFG વેરિઅન્ટના કારણે સંક્રમણની નવી લહેરનો ખતરો તોળાઈ રહ્યો છે. આ વેરિઅન્ટ ઝડપથી ફેલાઈ શકે છે અને રસીકરણ પછી બનેલી ઇમ્યુનિટીને પણ ચકમા આપવામાં સક્ષમ છે. આ પરિસ્થિતિને ધ્યાનમાં રાખીને, હાલમાં સરકાર દેખરેખ વધારવા અને તપાસમાં ઝડપ લાવવા પર ભાર આપી રહી છે. નાગરિકોને પણ કોવિડ એપ્રોપ્રિયેટ બિહેવિયરનું પાલન કરવાની અપીલ કરવામાં આવી છે.