રાજકોટ, 14 જૂન 2025: રાજકોટના હીરાસર એરપોર્ટ પર આજે સવારે દિલ્હીથી આવતી એર ઈન્ડિયાની ફ્લાઈટમાં ટેકનિકલ ખામી સર્જાતા યાત્રિકોના જીવ તાળવે ચોંટ્યા હતા. આ ફ્લાઈટને ત્રીજા પ્રયાસે લેન્ડ કરાવી શકાઈ હતી, જેના કારણે મુસાફરોમાં ભારે ફફડાટ વ્યાપી ગયો હતો. આ ઘટના હજુ તાજી છે ત્યાં જ સુરત અને ગઈકાલે જયપુરમાં પણ એર ઇન્ડિયાની ફ્લાઇટ્સમાં ખામી હોવાના સમાચારો સામે આવ્યા છે, જેણે 12 જૂનના રોજ અમદાવાદમાં થયેલી ભયાનક AI-171 દુર્ઘટનાના ઘા તાજા કર્યા છે.
અમદાવાદમાં લંડન જતી એર ઈન્ડિયાની ફ્લાઈટ AI-171ના ટેકઓફના ગણતરીની મિનિટોમાં જ ક્રેશ થઈ જવા અને 241 લોકોના કરૂણ મોત (જેમાંથી એકમાત્ર વિશ્વકુમાર રામેશ ચમત્કારિક રીતે બચ્યા હતા) બાદ ભારતીય વિમાન સેવા એર ઈન્ડિયાની ફ્લાઈટ્સમાં એક પછી એક ટેકનિકલ ખામીઓના સમાચાર સામે આવતા મુસાફરો અને નાગરિક ઉડ્ડયન ક્ષેત્રમાં ભારે ચિંતા વ્યાપી છે.
સુરતમાં 'થ્રસ્ટ'ની સમસ્યા અને જયપુરમાં ફ્લાઈટ રદ: સલામતી પર સવાલો
રાજકોટની ઘટના બાદ તરત જ સુરતમાંથી પણ એર ઇન્ડિયાની ફ્લાઇટમાં ખામી હોવાના અહેવાલ આવ્યા છે. સુરતમાં એર ઇન્ડિયા એક્સપ્રેસની બેંગકોક-સુરતની ફ્લાઇટમાં "થ્રસ્ટ" સંબંધિત ગંભીર સમસ્યા સર્જાઈ હતી. પ્રારંભિક તપાસમાં એન્જિન થ્રસ્ટ, વિંગ ફ્લેપ્સ અને લેન્ડિંગ ગિયર સંબંધિત ખામીઓની સંભાવના વ્યક્ત કરવામાં આવી છે. વિમાનના બ્લેક બોક્સમાંથી મળેલા ડેટા અને સીસીટીવી ફૂટેજના આધારે, વિમાનના એન્જિનના પ્રદર્શન અને ફ્લેપ સેટિંગ્સની સઘન તપાસ કરવામાં આવી રહી છે.
ઉલ્લેખનીય છે કે, ગઈકાલે શુક્રવારે પણ જયપુરથી બેંગલુરુ જતી એર ઇન્ડિયા એક્સપ્રેસની ફ્લાઇટ IX 2749 ટેકનિકલ ખામીને કારણે રદ કરવી પડી હતી. સવારે 11:30 વાગ્યે ઉપડનારી આ ફ્લાઈટ ઉડાન ભરી શકી ન હતી.
સલામતી સમીક્ષા શરૂ: નિષ્ણાતો ચિંતિત, DGCA સફાળું જાગ્યું
આ તમામ ઘટનાઓએ એરલાઇનના ટેક્નિકલ મેન્ટેનન્સ અને સલામતી પ્રોટોકોલ્સ પર ગંભીર પ્રશ્નચિહ્ન ઊભા કર્યા છે. ઉડ્ડયન વિશેષજ્ઞોનું માનવું છે કે AI-171ની અમદાવાદ દુર્ઘટનામાં પાઇલટની ભૂલ, એન્જિન ફેઇલ્યોર અથવા ફ્લેપ સેટિંગ્સમાં ખામી હોઈ શકે છે. આ સતત બનતી ઘટનાઓના પગલે, તપાસ એજન્સીઓએ એર ઈન્ડિયા અને એર ઈન્ડિયા એક્સપ્રેસની તમામ ફ્લાઇટ્સની સલામતીની વ્યાપક સમીક્ષા શરૂ કરી છે. આગામી મહિનાઓમાં આ અંગે વધુ વિગતો બહાર આવવાની સંભાવના છે.
આ શ્રેણીબદ્ધ ખામીઓએ એર ઇન્ડિયાની પ્રતિષ્ઠા અને મુસાફરોનો વિશ્વાસ ડગમગાવ્યા છે. હવે જોવું રહ્યું કે એર ઇન્ડિયા આ પડકારનો કેવી રીતે સામનો કરે છે અને મુસાફરોની સલામતી સુનિશ્ચિત કરવા માટે કેવા કડક પગલાં ભરે છે.