પુણે બ્રિજ ધરાશાયી: પુણેમાં રવિવારે ઈન્દ્રાયણી નદી પરનો પુલ ધરાશાયી થયો. પુલ ધરાશાયી થવાથી ઘણા પ્રવાસીઓ ડૂબી ગયા હોવાની આશંકા છે. આ ઘટના લોકપ્રિય પર્યટન સ્થળ કુંડમાલામાં બની હતી  જ્યાં ચોમાસા દરમિયાન મોટી સંખ્યામાં પ્રવાસીઓ આવે છે. મહારાષ્ટ્રના સીએમ દેવેન્દ્ર ફડણવીસે જણાવ્યું હતું કે ઈન્દ્રાયણી નદી પરનો પુલ ધરાશાયી થવાથી 4 લોકોના મોત થયા છે, 32 લોકો ઘાયલ થયા છે, છ લોકોને બચાવી લેવામાં આવ્યા છે, જ્યારે કેટલાક લોકો તણાઈ ગયા છે.

પ્રધાનમંત્રી નરેન્દ્રભાઈ  મોદીએ રવિવારે મહારાષ્ટ્રના મુખ્યમંત્રી દેવેન્દ્ર ફડણવીસ સાથે વાત કરી અને કુંડમાલામાં ઈન્દ્રાયણી નદી પરનો પુલ તૂટી પડવાની ઘટના બાદ ચાલી રહેલા બચાવ કામગીરી વિશે પૂછપરછ કરી. પીએમ મોદીને અસરગ્રસ્ત લોકોને મદદ કરવા માટે ચાલી રહેલા પ્રયાસો વિશે માહિતી આપવામાં આવી.

દરમિયાન, મહારાષ્ટ્રના મુખ્યમંત્રી દેવેન્દ્ર ફડણવીસે ઈન્દ્રાયણી નદી પરનો પુલ તૂટી પડવા પર ઊંડો શોક વ્યક્ત કર્યો. મુખ્યમંત્રીએ ટ્વિટર પર પોસ્ટ કર્યું કે પુણે જિલ્લાના તાલેગાંવ નજીક ઈન્દોરીમાં ઈન્દ્રાયણી નદી પરનો પુલ તૂટી પડવાના સમાચાર સાંભળીને તેમને ખૂબ દુઃખ થયું છે. પ્રાથમિક માહિતી અનુસાર, આ ઘટનામાં 2 લોકોના મોત થયા છે. હું તેમને હૃદયપૂર્વક શ્રદ્ધાંજલિ અર્પણ કરું છું. અમે તેમના પરિવારોના દુઃખમાં ભાગીદાર છીએ.

મહારાષ્ટ્રના નાયબ મુખ્યમંત્રી અજિત પવારે રવિવારે જણાવ્યું હતું કે ઇન્દ્રાયણી નદી પરનો લોખંડનો પુલ કાટ લાગી ગયો હતો અને પ્રથમ દ્રષ્ટિએ એવું લાગે છે કે પુલ પર ઘણા લોકો ઉભા હતા, જેના કારણે તે તૂટી પડ્યો. આ અકસ્માતમાં બે લોકોના મોત થયા છે. પુણે જિલ્લા કલેક્ટર જિતેન્દ્ર ડુડીએ જણાવ્યું હતું કે અત્યાર સુધીમાં 38 લોકોને બચાવી લેવામાં આવ્યા છે, જેમાંથી 30 લોકોને હોસ્પિટલમાં દાખલ કરવામાં આવ્યા છે, જ્યારે છ અન્ય ગંભીર રીતે ઘાયલ છે.

એનસીપીના ધારાસભ્ય સુનિલ શેલ્કેએ જણાવ્યું હતું કે કમનસીબે બે પ્રવાસીઓના જીવ ગયા છે. આ ઉપરાંત ચારથી પાંચ લોકોને બચાવી લેવામાં આવ્યા છે. અહીં એનડીઆરએફની ટીમો તૈનાત કરવામાં આવી છે

ડીસીપી વિશાલ ગાયકવાડ (ઝોન 2, પિંપરી ચિંચવડ) એ જણાવ્યું હતું કે તળાવ અને ધોધ પાસેનો એક જૂનો લોખંડનો પુલ બપોરે 3:30 થી 4:30 વાગ્યાની વચ્ચે તૂટી પડ્યો હતો. પ્રારંભિક માહિતી અનુસાર, બે લોકોના મોત થયા છે અને 6-7 અન્ય ઘાયલ થયા છે, જેમની હોસ્પિટલમાં સારવાર ચાલી રહી છે. એનડીઆરએફની ટીમ પહોંચી ગઈ છે અને બચાવ કામગીરી હાથ ધરી રહી છે.