નવી દિલ્હી, : અમદાવાદમાં તાજેતરમાં (12 જૂન, 2025 ના રોજ) થયેલી કરુણ વિમાન દુર્ઘટના, જેમાં 250 થી વધુ લોકોએ જીવ ગુમાવ્યા હતા, તેના શોકમાં અને મૃતકો પ્રત્યે આદર વ્યક્ત કરવા માટે, ઇંગ્લેન્ડ અને ભારત વચ્ચેની દ્વિપક્ષીય ટેસ્ટ સિરીઝ માટે પ્રસ્તાવિત 'એન્ડરસન-તેંડુલકર ટ્રોફી' ના લોન્ચિંગને હાલ પૂરતું મોકૂફ રાખવામાં આવ્યું છે. ઈંગ્લેન્ડ ક્રિકેટ બોર્ડ (ECB) અને ભારતીય ક્રિકેટ કંટ્રોલ બોર્ડ (BCCI) વચ્ચે પરસ્પર સમજૂતીથી આ નિર્ણય લેવામાં આવ્યો છે.
ભારતીય ટીમ ઇંગ્લેન્ડ સામે પાંચ મેચની ટેસ્ટ સિરીઝ માટે સંપૂર્ણપણે તૈયાર છે, જે 20 જૂન, 2025 થી શરૂ થશે. આ સિરીઝ સાથે જ નવી વર્લ્ડ ટેસ્ટ ચેમ્પિયનશિપ (WTC) 2025-27 સાયકલનો પણ પ્રારંભ થશે.
ઉલ્લેખનીય છે કે, તાજેતરમાં જ ભારત-ઇંગ્લેન્ડ દ્વિપક્ષીય સિરીઝનું નામ 'પટૌડી ટ્રોફી' થી બદલીને 'એન્ડરસન-તેંડુલકર ટ્રોફી' કરવાની જાહેરાત કરવામાં આવી હતી. સિરીઝ શરૂ થાય તે પહેલાં આ નવી ટ્રોફીના ભવ્ય લોન્ચિંગનો પ્રસ્તાવ હતો. પરંતુ, અમદાવાદ વિમાન દુર્ઘટનાની ગંભીરતાને જોતા, આ કાર્યક્રમ મુલતવી રાખવામાં આવ્યો છે.
સચિન તેંડુલકરની વિનંતીથી 'પટૌડી' નામ યથાવત:
ECB અને BCCI એ સંયુક્ત રીતે શનિવારે (14 જૂન) યોજાનાર ટ્રોફી-નામકરણ સમારંભને હાલ પૂરતો રદ કરવાનો નિર્ણય લીધો હતો. ક્રિકબઝ દ્વારા ટાંકવામાં આવેલા એક ECB અધિકારીએ જણાવ્યું હતું કે, "ભારતમાં બનેલી કરુણ ઘટનાઓને ધ્યાનમાં રાખીને, ગુમાવેલા જીવો પ્રત્યે આદર રૂપે જાહેરાત થોડો સમય રાહ જોઈ શકે છે. BCCI હજુ પણ જાહેરાત માટે યોગ્ય સમય નક્કી કરી રહ્યું છે. દુર્ઘટનાને કારણે જાહેરાતને લવચીક રાખવામાં આવી હતી."
જ્યાં ECB 'પટૌડી ટ્રોફી' નું નામ બદલીને 'એન્ડરસન-તેંડુલકર ટ્રોફી' કરવા માંગતું હતું, ત્યાં સચિન તેંડુલકરે પોતે ECB ને વિનંતી કરતા બોર્ડનો નિર્ણય બદલાયો હોય તેમ લાગે છે. ક્રિકબઝ અનુસાર, તેંડુલકરે ECB અને BCCI બંને સાથે 'પટૌડી' નામ ચાલુ રાખવા વિશે વાત કરી છે.
ECB અધિકારીએ આ વાતની પુષ્ટિ કરતા જણાવ્યું કે, "હા, ઇંગ્લેન્ડ-ભારત સિરીઝમાં 'પટૌડી' જોડાણને જાળવી રાખવાની પુષ્ટિ થયેલ યોજના છે." એવી અપેક્ષા છે કે બોર્ડ આ પરંપરાને ચાલુ રાખવા માટે સ્વર્ગસ્થ MAK પટૌડીના નામ પર એક મેડલ એનાયત કરશે. આ નિર્ણય ભારતીય ક્રિકેટના ઇતિહાસ અને મહાન ખેલાડીઓના યોગદાન પ્રત્યે સન્માન દર્શાવે છે.