લિમા, 16 જૂન 2025: પેરુના મધ્ય દરિયાકાંઠે રવિવારે 5.6ની તીવ્રતાનો શક્તિશાળી ભૂકંપ અનુભવાયો હતો, જેના આંચકા રાજધાની લિમા અને કાલાઓ બંદર શહેર સહિતના વિસ્તારોમાં તીવ્રપણે અનુભવાયા હતા. આ ભૂકંપના કારણે એક વ્યક્તિનું કરુણ મોત થયું છે અને પાંચ લોકો ઘાયલ થયા છે, તેમ સત્તાવાળાઓએ જણાવ્યું છે.
યુનાઈટેડ સ્ટેટ્સ જીઓલોજિકલ સર્વે (USGS) અનુસાર, ભૂકંપ સ્થાનિક સમય મુજબ સવારે 11:35 વાગ્યે પેસિફિક મહાસાગરમાં આવ્યો હતો. તેનું કેન્દ્રબિંદુ કાલાઓથી 23 કિલોમીટર (14 માઈલ) દક્ષિણપશ્ચિમમાં, રાજધાની લિમાની પશ્ચિમમાં સ્થિત હતું.
પોલીસ કર્નલ રામિરો ક્લોકોએ RPP રેડિયોને જણાવ્યું હતું કે, ઉત્તરી લિમામાં એક 36 વર્ષીય વ્યક્તિનું મોત થયું હતું. તે "યાત્રીની રાહ જોઈને પોતાના વાહનની બહાર ઊભો હતો" ત્યારે નિર્માણાધીન ઇમારતના ચોથા માળેથી એક દીવાલ છૂટી પડી અને તેના માથા પર પડી હતી. ઇમરજન્સી ઓપરેશન્સ સેન્ટરે જણાવ્યું હતું કે, ઘાયલ થયેલા પાંચ લોકોને હોસ્પિટલોમાં સારવાર આપવામાં આવી રહી છે. એજન્સીએ રસ્તાઓ અને શૈક્ષણિક કેન્દ્રોને પણ નુકસાન થયું હોવાના અહેવાલ આપ્યા હતા.
પેરુના રાષ્ટ્રપતિ કાર્યાલયે X (અગાઉ ટ્વિટર) પર જણાવ્યું હતું કે, રાષ્ટ્રપતિ દિના બોલુઆર્ટે પરિસ્થિતિનું નિરીક્ષણ કરવા માટે કાલાઓ તરફ રવાના થયા છે. સ્થાનિક મીડિયા દ્વારા શેર કરાયેલા ફૂટેજમાં વાહનો પર કાટમાળ પડતો, ક્ષતિગ્રસ્ત મકાનો અને તૂટી પડેલા હોર્ડિંગ્સ પણ જોવા મળ્યા હતા.
પેરુના જિયોફિઝિકલ ઇન્સ્ટિટ્યૂટના કાર્યકારી પ્રમુખ હર્નાન્ડો તાવેરાએ સ્થાનિક ટીવી ચેનલ N ને જણાવ્યું હતું કે, લિમાના તમામ જિલ્લાઓમાં ભૂકંપના આંચકા અનુભવાયા હતા. સ્થાનિક રેડિયો સ્ટેશનોએ અહેવાલ આપ્યો હતો કે લિમાના આલ્બર્ટો ગેલાર્ડો સ્ટેડિયમમાં ચાલી રહેલી એક વ્યાવસાયિક ફૂટબોલ મેચને ઘણી મિનિટો સુધી રોકી દેવામાં આવી હતી. લિમાના કેથેડ્રલમાં ચાલી રહેલી માસ પણ ભયભીત ભક્તો સ્થળ પરથી ભાગી છૂટતા અટકાવી દેવામાં આવી હતી.
ઉલ્લેખનીય છે કે, પેરુ 'રિંગ ઓફ ફાયર' પર સ્થિત છે, જે પેસિફિક મહાસાગર સાથેનો એક માર્ગ છે જ્યાં વારંવાર ભૂકંપ અને સક્રિય જ્વાળામુખી જોવા મળે છે, જેના કારણે આવા કુદરતી આફતોનો ખતરો સતત રહે છે.