(ન્યૂઝફર્સ્ટ) નવી દિલ્હી, 16 જૂન 2025: આકાશમાં ફરી એકવાર દહેશતનો માહોલ સર્જાયો છે. હોંગકોંગથી ભારતની રાજધાની દિલ્હી જઈ રહેલી એર ઈન્ડિયાની ફ્લાઈટ AI315 ને અધવચ્ચેથી પરત ફરવાની ફરજ પડી છે. પાઈલટે વિમાનમાં શંકાસ્પદ ટેકનિકલ ખામી હોવાની જાણ કર્યા બાદ આ ઈમરજન્સી નિર્ણય લેવામાં આવ્યો હતો, જેના પગલે મુસાફરોમાં ભયનો માહોલ છવાઈ ગયો હતો.
મળતી માહિતી મુજબ, આ ફ્લાઈટ બોઈંગ 787-8 ડ્રીમલાઈનર વિમાન દ્વારા સંચાલિત કરવામાં આવી રહી હતી. આ ઘટના એવા સમયે બની છે જ્યારે તાજેતરમાં જ વિમાન દુર્ઘટનાઓના સમાચારો સામે આવી રહ્યા છે, અને આવા સંજોગોમાં બોઈંગ 787-8 ડ્રીમલાઈનર વિમાનોની સુરક્ષા અને વિશ્વસનીયતા પર ગંભીર સવાલો ઉભા થયા છે. એવિએશન નિષ્ણાતો આ વિમાનોમાં વારંવાર જોવા મળતી ટેકનિકલ સમસ્યાઓને "ખૂબ જ ચિંતાજનક અને ખતરનાક" ગણાવી રહ્યા છે.
વિમાન હોંગકોંગથી દિલ્હી જવા રવાના થયું હતું, પરંતુ ઉડાન દરમિયાન જ પાઈલટને કોઈ અસામાન્યતા જણાતા તેમણે તાત્કાલિક પરત ફરવાનો નિર્ણય લીધો. વિમાન સુરક્ષિત રીતે પરત ફર્યું હોવાના પ્રાથમિક અહેવાલો છે, પરંતુ આ ઘટનાએ હવાઈ મુસાફરી કરતા લોકોમાં નવી ચિંતા જગાવી છે. હાલમાં, આ ઘટના અંગેની સત્તાવાર અને વિસ્તૃત વિગતોની રાહ જોવાઈ રહી છે. એર ઇન્ડિયા કે બોઈંગ કંપની તરફથી આ અંગે કોઈ સત્તાવાર નિવેદન હજુ સુધી આવ્યું નથી.