નવી દિલ્‍હીઃ ઈરાન અને ઈઝરાયલ વચ્‍ચેના યુદ્ધની અસર હવે ભારત પર પણ દેખાઈ રહી છે. પરિસ્‍થિતિ એવી છે કે ભારતથી ઈરાનમાં ચોખાની નિકાસ લગભગ બંધ થઈ ગઈ છે. જેના કારણે ચોખાના વેપારીઓ નારાજ છે. વેપારીઓના મતે, ભારતથી ઈરાનમાં ચોખાનો પુરવઠો બંધ થવાને કારણે, પ્રતિ કિલો ચોખાના ભાવમાં ૧૦ રૂપિયાનો ઘટાડો થયો છે. બીજી તરફ ડ્રાયફ્રુટના ભાવમાં ઉછાળો આવ્‍યો છે.

છેલ્લા ૪ દિવસથી ભારતમાંથી ચોખાનો પુરવઠો બંધ.

માહિતી મુજબ, ભારતમાંથી બાસમતી સેલા ચોખાનો મહત્તમ પુરવઠો ઈરાનને થાય છે. પરંતુ ઈઝરાયલ વચ્‍ચે વધતા તણાવને કારણે, છેલ્લા ચાર દિવસથી ભારતમાંથી ચોખાનો પુરવઠો બંધ થઈ ગયો છે. જેના કારણે ચોખાના વેપારીઓમાં અંધાધૂંધી છે. નયા બજારના ચોખાના વેપારી સચિન શર્માએ જણાવ્‍યું હતું કે ચોખા ઉઘોગમાં ભયનું વાતાવરણ છે. શુક્રવારથી શરૂ થયેલા આ યુદ્ધ પછી, ઈરાનમાં બાસમતી સેલાનો પુરવઠો ઠપ્‍પ થઈ ગયો છે.

હજારો ટન ચોખા અધવચ્‍ચે જ અટવાઈ ગયા છે. કેટલાક ટન માલ પરત કરવામાં આવ્‍યો છે. જેના કારણે વેપારીઓ નારાજ છે. સચિને કહ્યું કે ઈરાન અને ઈઝરાયલ વચ્‍ચે યુદ્ધ શરૂ થયું તે પહેલાં બાસમતી સેલા ચોખાનો જથ્‍થાબંધ ભાવ લગભગ ૭૦ રૂપિયા હતો, પરંતુ છેલ્લા ચાર દિવસમાં ભાવમાં પ્રતિ કિલો ૧૦ રૂપિયાનો ઘટાડો થયો છે. જો આ સ્‍થિતિ રહેશે તો આગામી દિવસોમાં ચોખાના ભાવમાં વધુ દ્યટાડો થશે, જેના કારણે વેપારીઓને કરોડોનું નુકસાન સહન કરવું પડશે. આ ઉપરાંત, સચિને એમ પણ કહ્યું કે યુદ્ધને કારણે હજારો કરોડ રૂપિયાની ચુકવણી અટવાઈ ગઈ છે. જેના કારણે ચોખાના વેપારીઓનો તણાવ વધુ વધી ગયો છ.

ડ્રાયફ્રુટના બજારમાં પણ અરાજકતા છે. ઈરાન અને ઈઝરાયલ યુદ્ધને કારણે ડ્રાયફ્રુટ બજારમાં પણ અરાજકતા છે. ઇન્‍ટરનેશનલ ફ્રુટ્‍સ એન્‍ડ નટ્‍સ ઓર્ગેનાઇઝેશનના ડિરેક્‍ટર રવિન્‍દ્ર મહેતા કહે છે કે પિસ્‍તા અને મમરા બદામનો મોટો જથ્‍થો ઈરાનથી આવે છે. પરંતુ યુદ્ધને કારણે ઈરાનથી તેનો પુરવઠો બંધ થઈ ગયો છે, જેના કારણે બજારમાં પિસ્‍તા અને મમરા બદામના ભાવમાં પ્રતિ કિલો ૫૦ થી ૬૦ રૂપિયાનો વધારો થયો છે. તેમણે કહ્યું કે જો પરિસ્‍થિતિ આવી જ રહેશે તો આગામી દિવસોમાં તેના ભાવમાં વધુ વધારો થઈ શકે છે.