નવી દિલ્હી : એર ઇન્ડિયાના બોઇંગ 787 જેટ વિમાનના ભયાવહ ક્રેશમાં ઓછામાં ઓછા 271 લોકોના મોત થયાના દિવસો બાદ, ડાયરેક્ટોરેટ જનરલ ઓફ સિવિલ એવિએશન (DGCA) એ મંગળવારે બોઇંગ 787 ફ્લીટ પર હાથ ધરેલી તપાસમાં કોઈ મોટી સુરક્ષા ચિંતાઓ ન હોવાનું જણાવી ક્લીન ચિટ આપી છે. જોકે, નાગરિક ઉડ્ડયન નિયમનકારે એર ઇન્ડિયામાં તાજેતરમાં જોવા મળેલા મેન્ટેનન્સ-સંબંધિત મુદ્દાઓ પર ગંભીર ચિંતા વ્યક્ત કરી છે.
DGCA એ એક નિવેદનમાં જણાવ્યું હતું કે, વિમાન અને તેની સંબંધિત મેન્ટેનન્સ સિસ્ટમ્સ હાલના સુરક્ષા ધોરણોનું પાલન કરતી હોવાનું જણાયું છે. વિસ્તૃત સુરક્ષા નિરીક્ષણ હેઠળ ફ્લીટના કુલ 24 વિમાનોએ જરૂરી તપાસ સફળતાપૂર્વક પૂર્ણ કરી છે. DGCAની સમીક્ષામાં તાજેતરના ઓપરેશનલ ડેટાનું વિશ્લેષણ પણ સામેલ હતું, જેમાં ખાસ કરીને એર ઇન્ડિયાના વાઈડ-બોડી ઓપરેશન્સ, ખાસ કરીને બોઇંગ 787 વિમાનો પર ધ્યાન કેન્દ્રિત કરવામાં આવ્યું હતું.
ટાટા-માલિકીની એરલાઇનને સૂચનાઓ:
DGCA એ ટાટા-માલિકીની એરલાઇન એર ઇન્ડિયાને તેની એન્જિનિયરિંગ, ઓપરેશન્સ અને ગ્રાઉન્ડ હેન્ડલિંગ યુનિટ્સ વચ્ચે આંતરિક સંકલન મજબૂત કરવા અને મુસાફરોને થતા વિલંબ ઘટાડવા માટે સ્પેરપાર્ટ્સની પૂરતી ઉપલબ્ધતા સુનિશ્ચિત કરવા સલાહ આપી છે. આ નિર્દેશો એરલાઇનની કાર્યક્ષમતા અને સમયસરતા સુધારવા માટે મહત્વપૂર્ણ માનવામાં આવે છે.
રદ કરાયેલી ફ્લાઇટ્સ:
નાગરિક ઉડ્ડયન નિયમનકારના જણાવ્યા અનુસાર, એર ઇન્ડિયાએ 12 જૂનથી 17 જૂન દરમિયાન બોઇંગ 787 વિમાન દ્વારા સંચાલિત થતી કુલ 66 ફ્લાઇટ્સ રદ કરી છે. આ ક્રેશ બાદ ઉભી થયેલી પરિસ્થિતિ અને તપાસના પગલે આ ફ્લાઇટ્સ રદ કરવામાં આવી હતી. DGCA દ્વારા આપવામાં આવેલી ક્લીન ચિટથી એર ઇન્ડિયાના બોઇંગ 787 ફ્લીટની સુરક્ષા અંગેની તાત્કાલિક ચિંતાઓ દૂર થઈ છે, પરંતુ મેન્ટેનન્સ અને સંકલન સુધારવા પર ભાર મૂકવામાં આવ્યો છે.