નવી દિલ્હી : એક ૧૬ વર્ષ અને ૬ મહિનાની એક સગીર છોકરીએ સુપ્રીમ કોર્ટમાં તેના બળજબરીથી થયેલા લગ્નને રદ કરવા માટે અરજી દાખલ કરી છે. અરજીમાં જણાવાયું છે કે તેણી પોતાનો અભ્યાસ પૂર્ણ કરવા માંગતી હતી ત્યારે તેણીના લગ્ન ૩૨ વર્ષીય પુરુષ સાથે તેની ઇચ્છા વિરુદ્ધ કરવામાં આવ્યા હતા. છોકરીએ તેના સાસરિયાના ઘરમાં શારીરિક અને માનસિક ત્રાસ આપવાનો પણ આરોપ લગાવ્યો છે. આ કેસ બાળ લગ્ન પ્રતિબંધ અધિનિયમ, ૨૦૦૬ હેઠળ ન્યાય માંગે છે.

અરજદારનું કહેવું છે કે તેના લગ્ન તેની સંમતિ વિના કરવામાં આવ્યા હતા. તેના સાસરિયાના ઘરે તેને શારીરિક અને માનસિક રીતે હેરાન કરવામાં આવતો હતો. જેના કારણે તે ત્યાં રહેવા માંગતી નથી. છોકરીએ કોર્ટને વિનંતી કરી છે કે તેના લગ્ન ગેરકાયદેસર જાહેર કરવામાં આવે, જેથી તે પોતાનો અભ્યાસ અને જીવન નવેસરથી શરૂ કરી શકે. તેણે એમ પણ કહ્યું કે તે પોતાની મરજીથી તેના મિત્ર સૌરભ કુમાર સાથે રહી રહી છે

   છોકરીની માતાએ 4 એપ્રિલે પટનાના પીપલવા પોલીસ સ્ટેશનમાં એફઆઈઆર (નંબર 59/25) નોંધાવી હતી. આમાં છોકરીના મિત્ર સૌરભ કુમાર અને તેના પરિવાર પર અપહરણનો આરોપ મૂકવામાં આવ્યો હતો. અરજીમાં દાવો કરવામાં આવ્યો છે કે આ એફઆઈઆર એટલા માટે દાખલ કરવામાં આવી હતી જેથી છોકરીને બળજબરીથી તેના સાસરિયાના ઘરે પાછી મોકલી શકાય. છોકરીએ સુપ્રીમ કોર્ટમાં આ એફઆઈઆરના આધારે કોઈપણ પ્રકારની દમનકારી કાર્યવાહી બંધ કરવાની માંગ કરી છે. તેણીએ પોતાની, સૌરભ અને તેના પરિવારની સુરક્ષા માટે પણ વિનંતી કરી છે.

અરજીમાં બંધારણના અનુચ્છેદ 32 અને 142નો ઉલ્લેખ કરવામાં આવ્યો છે. અનુચ્છેદ 32 મૂળભૂત અધિકારોના રક્ષણ માટે કોર્ટમાં અરજી દાખલ કરવાનો અધિકાર આપે છે, જ્યારે અનુચ્છેદ 142 કોર્ટને ખાસ પરિસ્થિતિઓમાં ન્યાય માટે આદેશો પસાર કરવાની સત્તા આપે છે. છોકરીએ કોર્ટને વિનંતી કરી છે કે તે તેના હિતમાં હસ્તક્ષેપ કરે અને બાળ લગ્ન રદ કરે, જેથી તેના શિક્ષણ અને સ્વતંત્રતાના અધિકારોનું રક્ષણ થાય.

આ કેસ બાળ લગ્નના સામાજિક દુષણ સામે એક મહત્વપૂર્ણ પગલું છે. ભારતમાં, બાળ લગ્ન પ્રતિબંધ અધિનિયમ, 2006 હેઠળ, 18 વર્ષથી ઓછી ઉંમરની છોકરી અને 21 વર્ષથી ઓછી ઉંમરના છોકરાના લગ્ન ગેરકાયદેસર છે. આમ છતાં, ઘણી જગ્યાએ બળજબરીથી બાળ લગ્નના કિસ્સાઓ નોંધાય છે. આ અરજી દ્વારા, સગીર છોકરીએ માત્ર તેના અધિકારોના રક્ષણની માંગ કરી નથી પરંતુ સમાજમાં જાગૃતિ ફેલાવવાનો પણ પ્રયાસ કર્યો છે.