નવી દિલ્હી, ૧૯ જૂન ૨૦૨૫: લોકસભામાં વિપક્ષના નેતા રાહુલ ગાંધી આજે તેમનો ૫૫મો જન્મદિવસ ઉજવી રહ્યા છે. આ ઉંમરે પણ તેમની ફિટનેસ રૂટિન ઘણા લોકોને પ્રેરણા આપી રહી છે, ત્યારે તેમના જન્મદિવસ નિમિત્તે તેમના સ્વસ્થ જીવનનું રહસ્ય પણ સામે આવ્યું છે.
૨૦૨૩માં, રાજસ્થાનમાં ભારત જોડો યાત્રા દરમિયાન, ટ્રાવેલ અને ફૂડ ચેનલ કર્લીટેલ્સ સાથેની વાતચીતમાં, ગાંધીએ તેમના આહાર અને વર્કઆઉટ વિશે ખુલીને વાત કરી હતી. તેમણે સ્વસ્થ અને ફિટ રહેવા માટે કરતા વિવિધ પ્રકારના વર્કઆઉટ્સ અને સારું શરીર જાળવવા માટે શું ખાય છે તે જણાવ્યું હતું.
રાહુલ ગાંધીનો આહાર અને વર્કઆઉટ:
કોંગ્રેસના સત્તાવાર 'X' હેન્ડલ દ્વારા શેર કરાયેલા ઇન્ટરવ્યુમાં, રાહુલ ગાંધીએ તેમના વર્કઆઉટ રેજીમેન (નિયમિત કસરત) વિશે ખુલાસો કર્યો હતો. કોંગ્રેસના સાંસદે જણાવ્યું હતું કે તેઓ હંમેશા કોઈને કોઈ પ્રકારની શારીરિક પ્રવૃત્તિમાં સામેલ રહ્યા છે. જેઓ નથી જાણતા, તેમના માટે જણાવી દઈએ કે રાહુલ ગાંધી માર્શલ આર્ટ્સમાં બ્લેક બેલ્ટ છે. માર્શલ આર્ટ્સ ઉપરાંત, તેઓ ડાઈવિંગ પણ જાણે છે. વધુમાં, તેમણે જણાવ્યું કે ભારત જોડો યાત્રા દરમિયાન પણ તેઓ નિયમિતપણે માર્શલ આર્ટ્સના ક્લાસ લેતા હતા.
આહાર વિશે તેમણે કહ્યું કે તેઓ કાર્બોહાઇડ્રેટ્સ ટાળે છે, પરંતુ જો તેમને ભાત કે રોટલી ખાવાની હોય, તો તેઓ રોટલીને વધુ પસંદ કરે છે. નોન-વેજ પ્રેમી તરીકે, તેમની પ્રિય વાનગીઓમાં ચિકન ટિક્કા, સીખ કબાબ અને સાદો ઓમલેટનો સમાવેશ થાય છે. તેમણે સવારે એક કપ કોફી પસંદ કરવાનું પણ જણાવ્યું હતું.
રાહુલ ગાંધીના જન્મદિવસની ઉજવણી:
કોંગ્રેસ નેતા રાહુલ ગાંધીના ૫૫માં જન્મદિવસ નિમિત્તે, કોંગ્રેસની દિલ્હી યુનિટ અને ઇન્ડિયન યુથ કોંગ્રેસ સંયુક્ત રીતે તાલકટોરા સ્ટેડિયમ ખાતે એક મેગા જોબ ફેરનું આયોજન કરશે. આ કાર્યક્રમ ગાંધીના મુખ્ય રાજકીય વિષયોમાંથી એક, એટલે કે બેરોજગારી, સાથે ગાઢ રીતે જોડાયેલો છે.
વધુમાં, સોશિયલ મીડિયા પર કોંગ્રેસ નેતાને શુભેચ્છાઓનો ધોધ વરસી રહ્યો છે. સંરક્ષણ મંત્રી રાજનાથ સિંહે પણ રાહુલ ગાંધીને જન્મદિવસની શુભેચ્છાઓ પાઠવી હતી. સિંહએ સોશિયલ મીડિયા 'X' પર લખ્યું, "લોકસભામાં વિપક્ષના નેતા રાહુલ ગાંધીને તેમના જન્મદિવસ પર શુભેચ્છાઓ. તેમને સારા સ્વાસ્થ્ય અને લાંબા આયુષ્યની પ્રાપ્તિ થાય." તમિલનાડુના મુખ્યમંત્રી એમ.કે. સ્ટાલિન અને વરિષ્ઠ કોંગ્રેસ નેતા અશોક ગેહલોતે પણ 'X' પર તેમની શુભેચ્છાઓ પોસ્ટ કરી હતી.