પેરિસ, ૨૧ : મેસેજિંગ પ્લેટફોર્મ ટેલિગ્રામના અબજોપતિ સ્થાપક પાવેલ દુરોવે પોતાની ₹૧.૮૦ લાખ કરોડ (અંદાજિત £૧૭ અબજ) ની સંપત્તિ '૧૦૦ થી વધુ સંતાનો' ને આપવાની જાહેરાત કરી છે. ૪૦ વર્ષીય ટેક ટાયકૂન પાવેલ દુરોવને ત્રણ અલગ-અલગ પાર્ટનર્સથી છ બાળકો છે, અને એવું માનવામાં આવે છે કે તેણે ૧૨ જુદા જુદા દેશોમાં ડઝનબંધ યુગલોને મોટા પાયે શુક્રાણુ દાન કર્યા હોવાથી તેના લગભગ ૧૦૦ થી વધુ બાળકો છે.
'મારા બધા બાળકો, સમાન અધિકાર': દુરોવનો અનોખો દ્રષ્ટિકોણ
દુરોવે તાજેતરમાં ફ્રાન્સના 'લે પોઈન્ટ' મેગેઝિનને આપેલા ઇન્ટરવ્યુમાં પોતાની સંપત્તિ તેના તમામ સંતાનોને આપવાની યોજના જાહેર કરી હતી. તેણે જણાવ્યું કે તે કુદરતી રીતે જન્મેલા બાળકો અને શુક્રાણુ દાન દ્વારા જન્મેલા બાળકો વચ્ચે કોઈ ભેદભાવ જોતો નથી. "તેઓ બધા મારા બાળકો છે અને બધાને સમાન અધિકાર મળશે," દુરોવે કહ્યું. "હું નથી ઇચ્છતો કે મારા મૃત્યુ પછી તેઓ એકબીજાને ફાડી ખાય."
જોકે, તેણે સ્પષ્ટ કર્યું કે તેમાંથી કોઈને પણ ૩૦ વર્ષ સુધી કોઈ રોકડ મળશે નહીં. દુરોવે તેના પાછળનો હેતુ સમજાવતા કહ્યું, "હું ઇચ્છું છું કે તેઓ સામાન્ય લોકોની જેમ જીવે, પોતાની જિંદગી જાતે બનાવે, પોતા પર ભરોસો કરવાનું શીખે, કંઈક નવું બનાવવાની ક્ષમતા કેળવે – બેંક ખાતા પર નિર્ભર ન રહે."
રશિયન મહિલાનો દાવો અને દુરોવનો ખુલાસો:
આ અબજોપતિએ ગયા વર્ષે જ પ્રથમ વખત જાહેર કર્યું હતું કે તેણે શુક્રાણુ દાન દ્વારા ઘણા બાળકો પેદા કર્યા છે. આ ખુલાસો એક સ્વિસમાં રહેતી રશિયન મહિલાના દાવા પછી થયો હતો. ૪૪ વર્ષીય ઇરિના બોલ્ગરે રશિયન ફોર્બ્સમાં દાવો કર્યો હતો કે દુરોવ તેના ત્રણ બાળકોનો પિતા છે, જેઓ ૨૦૧૩, ૨૦૧૬ અને ૨૦૧૭ માં સેન્ટ પીટર્સબર્ગમાં જન્મ્યા હતા અને તેઓ દુરોવનું નામ ધરાવે છે. તેણે પોતાના અને તેના બાળકોની તસવીરો પણ પોસ્ટ કરી હતી.
'રશિયાના માર્ક ઝકરબર્ગ' થી દુબઈ સુધીની સફર:
પાવેલ દુરોવ, જેમનું મેસેજિંગ પ્લેટફોર્મ વિશ્વભરમાં એક અબજથી વધુ માસિક સક્રિય યુઝર્સ ધરાવે છે, તેમને 'રશિયાના માર્ક ઝકરબર્ગ' અથવા 'એલોન મસ્ક' તરીકે ઓળખવામાં આવે છે. તેમની સંપત્તિ ₹૧.૮૦ લાખ કરોડ સુધી અંદાજવામાં આવે છે.
રશિયામાં જન્મેલા દુરોવે તેમના બાળપણના ઘણા વર્ષો ઇટાલીમાં વિતાવ્યા હતા, ત્યારબાદ તેમના પિતા, જે પ્રાચીન રોમન સાહિત્યના વિદ્વાન હતા, તેમને સેન્ટ પીટર્સબર્ગ યુનિવર્સિટીમાં નવી નોકરી મળતાં તેઓ વતન પાછા ફર્યા હતા.
૨૧ વર્ષની ઉંમરે, તેમણે 'VK' પ્લેટફોર્મની સ્થાપના કરી, જેને તે સમયે 'રશિયાનું ફેસબુક' કહેવામાં આવતું હતું. જ્યારે તેમણે રશિયન સુરક્ષા એજન્સીઓને યુક્રેનિયન વિરોધકર્તાઓનો ડેટા આપવાનો ઇનકાર કર્યો, ત્યારે તેમને અસરકારક રીતે તેમની કંપની છોડવાની ફરજ પડી અને ૨૦૧૪ માં તેઓ વિદેશ ગયા.
દુરોવે જણાવ્યું કે રશિયામાં સુરક્ષિત સંચારના કોઈપણ સ્વરૂપની ગેરહાજરીએ તેમને ટેલિગ્રામ બનાવવાનો વિચાર આપ્યો. રશિયન ઉદ્યોગસાહસિકે જણાવ્યું કે તેમણે બર્લિન, લંડન અને સાન ફ્રાન્સિસ્કોમાં સ્થાયી થવાના પ્રયાસોને "નોકરશાહીના અવરોધો" ને કારણે છોડી દીધા અને અંતે દુબઈમાં રહેવા ગયા. હવે તેમની પાસે ફ્રેન્ચ અને અમીરાતી બંને નાગરિકત્વ છે અને તેઓ ટેલિગ્રામના એકમાત્ર માલિક છે.
કાનૂની મુશ્કેલીઓ:
દુરોવ, જેઓ હવે દુબઈમાં સ્થિત છે, તેમને ગયા વર્ષે ફ્રેન્ચ સત્તાવાળાઓ દ્વારા બાળ પોર્નોગ્રાફી, ડ્રગ ટ્રાફિકિંગ અને તેમની એપ સાથે સંકળાયેલા છેતરપિંડીના વ્યવહારો સંબંધિત ગુનાઓની તપાસના સંદર્ભમાં અટકાયત કરવામાં આવ્યા હતા અને આરોપો ઘડવામાં આવ્યા હતા. માર્ચમાં, તેમણે કોઈપણ ગેરરીતિનો ઇનકાર કર્યો અને દુબઈ પાછા ફર્યા.