મોસ્કો : વિશ્વભરમાં યુદ્ધના ભણકારા વાગી રહ્યા છે ત્યારે, રશિયાના રાષ્ટ્રપતિ વ્લાદિમીર પુતિને મધ્ય પૂર્વમાં ભડકેલી આગને શાંત પાડવાનો મોટો પ્રયાસ કર્યો છે. સેન્ટ પીટર્સબર્ગમાં ચાલી રહેલા આંતરરાષ્ટ્રીય આર્થિક મંચ (SPIEF 2૦૨૫) દરમિયાન પુતિને ઇઝરાયલને સીધો અને સ્પષ્ટ સંદેશ આપ્યો છે કે, "ઈરાન પરમાણુ હથિયારો વિકસાવવા માગે છે તેવા કોઈ પુરાવા રશિયા પાસે નથી." આ નિવેદન એવા સમયે આવ્યું છે જ્યારે ઇઝરાયલ અને ઈરાન વચ્ચે તણાવ ચરમસીમા પર છે અને પરમાણુ સ્થળો પર હુમલાની ધમકીઓ અપાઈ રહી છે.
પુતિને ભારપૂર્વક જણાવ્યું હતું કે, "ઈરાનને પરમાણુ ઉર્જાનો શાંતિપૂર્ણ ઉપયોગ કરવાનો સંપૂર્ણ અધિકાર છે." તેમણે ઇઝરાયલ અને ઈરાન વચ્ચેના વધતા તણાવ પર પણ ગંભીર ચિંતા વ્યક્ત કરી હતી, જે મધ્ય પૂર્વમાં સંઘર્ષના કારણોને ભયજનક રીતે વધારી રહ્યો છે. નોંધનીય છે કે, રશિયન નિષ્ણાતો હાલમાં તેહરાનમાં બે પરમાણુ રિએક્ટરના નિર્માણમાં પણ સક્રિય રીતે સામેલ છે, જે ઈરાનના શાંતિપૂર્ણ પરમાણુ કાર્યક્રમ પ્રત્યે રશિયાના સમર્થનને દર્શાવે છે.
પુતિનનું 'મધ્યસ્થી' બનવાનું નિવેદન અને વૈશ્વિક ચિંતાઓ:
પુતિને કહ્યું કે રશિયા, ઇઝરાયલ અને ઈરાન બંને સાથે મૈત્રીપૂર્ણ સંબંધો ધરાવે છે અને આ ક્ષેત્રમાં સંઘર્ષ ન વધે અને પરિસ્થિતિ વિસ્ફોટક ન બને તે માટે બંને દેશો વચ્ચે મધ્યસ્થી કરવા તૈયાર છે. તેમણે આ મુદ્દે ઇઝરાયલી વડા પ્રધાન નેતન્યાહૂ, ઈરાની રાષ્ટ્રપતિ પેઝેશ્કિયાન અને પૂર્વ યુએસ પ્રમુખ ડોનાલ્ડ ટ્રમ્પ સાથે પણ વાતચીત કરી હોવાનું જણાવ્યું હતું, જે રશિયાની આ મુદ્દે સક્રિય ભૂમિકા દર્શાવે છે.
આંતરરાષ્ટ્રીય મંચ પરથી બોલતા, પુતિને ગંભીર ચેતવણી આપી હતી કે, "વિશ્વ હાલમાં ત્રીજા વિશ્વ યુદ્ધ તરફ આગળ વધી રહ્યું છે." તેમણે સ્પષ્ટતા કરી કે યુક્રેન સંઘર્ષ મધ્ય પૂર્વના તણાવથી ભલે અલગ હોય, પરંતુ બંને ક્ષેત્રોમાં વધતી જતી તંગદિલી ચિંતાજનક છે અને વૈશ્વિક શાંતિ માટે ખતરો ઊભો કરી રહી છે. રશિયાના વિદેશ મંત્રાલયના પ્રવક્તા મારિયા ઝખારોવાએ પણ ઇઝરાયલ દ્વારા ઈરાનના પરમાણુ સ્થાપનો પરના હુમલા બાદ વિશ્વ પરમાણુ આપત્તિની આરે હોવાની ગંભીર ચેતવણી આપી છે.
રશિયા સતત ઇઝરાયલની સુરક્ષા ચિંતાઓને સંબોધિત કરતા ઈરાનને તેના શાંતિપૂર્ણ પરમાણુ કાર્યક્રમને આગળ ધપાવવાની મંજૂરી આપતા કરાર પર વાટાઘાટો કરવામાં મદદ કરવાની તૈયારી દર્શાવે છે. પુતિનનું આ નિવેદન મધ્ય પૂર્વના ભવિષ્ય અને વૈશ્વિક રાજકારણમાં રશિયાની ભૂમિકાને લઈને અનેક સવાલો અને અટકળોને જન્મ આપે છે. શું પુતિનની આ પહેલ તણાવને ઓછો કરી શકશે કે પછી આ માત્ર રાજકીય દાવપેચ છે, તે જોવું રહ્યું.