નવી દિલ્હી :શનિવારે મોડી રાત્રે અમેરિકાએ ઈરાનના ત્રણ પરમાણુ સ્થળો પર B-2 બોમ્બર વિમાનો દ્વારા હુમલો કર્યો હતો. અમેરિકાનો દાવો છે કે તેણે ફોર્ડો, નતાન્ઝ અને ઇસ્ફહાનમાં પરમાણુ સ્થળોનો નાશ કર્યો છે, પરંતુ ઈરાને કહ્યું કે તેને કોઈ મોટું નુકસાન થયું નથી.

ઈરાનના વિદેશ મંત્રી અબ્બાસ અરાઘચીએ કહ્યું છે કે તેઓ સોમવારે મોસ્કોમાં રશિયન રાષ્ટ્રપતિ વ્લાદિમીર પુતિનને મળશે. બીજી તરફ, ભૂતપૂર્વ રશિયન રાષ્ટ્રપતિ અને રશિયન સુરક્ષા પરિષદના ઉપાધ્યક્ષ દિમિત્રી મેદવેદેવે દાવો કર્યો હતો કે ઘણા દેશો તેમના પરમાણુ શસ્ત્રો સીધા ઈરાનને આપવા તૈયાર છે.

અમેરિકાના હુમલા પછી, મેદવેદેવે ડોનાલ્ડ ટ્રમ્પ પર નિશાન સાધ્યું. તેમણે કહ્યું કે શાંતિનો દાવો કરીને સત્તામાં આવેલા ડોનાલ્ડ ટ્રમ્પ અમેરિકાને મધ્ય પૂર્વમાં યુદ્ધમાં ધકેલી રહ્યા છે. તેમણે યુએસ હુમલા પર સવાલ ઉઠાવ્યા અને કહ્યું કે એવું લાગે છે કે ઈરાની સ્થળને નજીવું નુકસાન થયું છે.

મેદવેદેવે અમેરિકાને પડકાર ફેંક્યો અને કહ્યું કે ન્યૂક્લિયર મટિરિયલનું એનરિચમેન્ટ હજુ પણ ચાલુ છે, પરંતુ હવે આપણે ખુલ્લેઆમ કહી શકીએ છીએ કે ભવિષ્યમાં પરમાણુ શસ્ત્રોનું ઉત્પાદન ચાલુ રહેશે. તેમણે એવો પણ દાવો કર્યો હતો કે ઘણા દેશો ઈરાનને તેમના પરમાણુ શસ્ત્રો આપવા તૈયાર છે. જોકે, મેદવેદેવે એ નથી જણાવ્યું કે આ દેશોમાં કોણ કોણ સામેલ છે.

ઈરાનના વિદેશ મંત્રી અબ્બાસ અરાઘચી ઓર્ગેનાઈઝેશન ઓફ ઈસ્લામિક કોઓપરેશનના સમિટમાં ભાગ લેવા માટે ઈસ્તાંબુલમાં હાજર છે. અમેરિકન હુમલા બાદ તેમણે કહ્યું કે હું આજે બપોરે મોસ્કો જઈ રહ્યો છું અને કાલે સોમવારે સવારે પુતિનને મળીશ.

વૈશ્વિક મંચ પર એકલતા અનુભવતા ઈરાનના મંત્રી અરાઘચીએ કહ્યું કે રશિયા ઈરાનનું મિત્ર છે અને અમે હંમેશા એકબીજાની સલાહ લઈએ છીએ. હું પુતિન સાથે મહત્વપૂર્ણ સલાહ લેવા માટે કાલે મોસ્કો જઈ રહ્યો છું. તેમણે અમેરિકાના હુમલાઓને આંતરરાષ્ટ્રીય કાયદાનું ઘોર ઉલ્લંઘન ગણાવ્યું છે.