વોશિંગ્ટન: મધ્ય પૂર્વમાં તંગદિલી ભરી પરિસ્થિતિ વચ્ચે અમેરિકાએ ઈરાન વિરુદ્ધ અત્યાર સુધીનું સૌથી ઝડપી અને સૌથી ખતરનાક લશ્કરી ઓપરેશન "ઓપરેશન મિડનાઈટ હેમર" સફળતાપૂર્વક પાર પાડીને દુનિયાને ચોંકાવી દીધી છે. આ અતિ ગુપ્ત ઓપરેશનમાં, ઈરાનના ત્રણ અતિ મહત્વપૂર્ણ પરમાણુ સ્થળો - ફોર્ડો, નટાન્ઝ અને ઇસ્ફહાનને - માત્ર ૨૫ મિનિટના ટૂંકા ગાળામાં નિશાન બનાવી સંપૂર્ણપણે ધ્વસ્ત કરી દેવામાં આવ્યા. આ મિશનમાં ૧૨૫ થી વધુ વિમાનો અને એક ખાસ 'છેતરપિંડી' વ્યૂહરચનાનો ઉપયોગ કરવામાં આવ્યો હતો, જેણે ઈરાનના હવાઈ સંરક્ષણને નિષ્ફળ બનાવ્યું.
વ્હાઇટ હાઉસ ખાતે યોજાયેલી એક પ્રેસ કોન્ફરન્સમાં, જોઈન્ટ ચીફ્સ ઓફ સ્ટાફના અધ્યક્ષ જનરલ ડેન કેને આ ઓપરેશનની વિગતો આપતા જણાવ્યું કે, ૭ અત્યાધુનિક સ્ટીલ્થ બી-૨ બોમ્બરોએ આ હુમલામાં ભાગ લીધો હતો. આ બોમ્બરોએ ઈરાનના ફોર્ડો અને નટાન્ઝ પરમાણુ સ્થળો પર ૩૦,૦૦૦ પાઉન્ડ (લગભગ ૧૩,૬૦૮ કિલો) વજનના પ્રચંડ 'બંકર બસ્ટર બોમ્બ' ફેંક્યા હતા. જ્યારે ઇસ્ફહાન પર 'ટોમાહોક ક્રુઝ મિસાઈલો' થી હુમલો કરવામાં આવ્યો. કુલ ૧૪ બંકર-બસ્ટર બોમ્બ અને ૨ ડઝનથી વધુ ટોમાહોક મિસાઈલોનો ઉપયોગ કરવામાં આવ્યો હતો. મધ્ય પૂર્વ સંઘર્ષમાં ઈરાન સામે અમેરિકા દ્વારા આટલા મોટા પાયે દારૂગોળાનો ઉપયોગ કરવાનો આ પહેલો કિસ્સો છે.
૧૮ કલાકનું ગુપ્ત મિશન: મિઝોરીથી ઉડાન ભરી, ૨૫ મિનિટમાં કામ પૂરું!
જનરલ ડેન કેને વધુમાં જણાવ્યું કે, અમેરિકન બી-૨ સ્ટીલ્થ બોમ્બરોએ મિઝોરીના એરબેઝ પરથી ઉડાન ભરી હતી. ૧૮ કલાક લાંબા આ મિશનને અત્યંત ગુપ્ત અને શાંત રીતે પાર પાડવામાં આવ્યું. ભારતીય સમય મુજબ રવિવારે સવારે ૪:૧૦ વાગ્યે સમગ્ર મિશન શરૂ થયું હતું. સાતેય B-૨ બોમ્બર્સમાં દરેકમાં બે ક્રૂ સભ્યો હતા. B-૨ બોમ્બરોએ પહેલા ફોર્ડો પરમાણુ સ્થળ પર બે મોટા બંકર બસ્ટર બોમ્બ ફેંક્યા. ત્યારબાદ તરત જ, અન્ય B-૨ બોમ્બરોએ નટાન્ઝ અને એસ્ફહાન પર હુમલો કર્યો. આશ્ચર્યજનક રીતે, રવિવારે સવારે ૪:૩૫ વાગ્યા સુધીમાં, એટલે કે માત્ર ૨૫ મિનિટમાં, તમામ અમેરિકન વિમાનો ઈરાની હવાઈ ક્ષેત્ર છોડી ચૂક્યા હતા.
આ બોમ્બરોએ મિઝોરી એરબેઝ પરથી ઉડાન ભરી હતી, જે ૯/૧૧ના હુમલા પછીની સૌથી લાંબી B-૨ મિશન ફ્લાઇટ હતી. જનરલ કેને ખુલાસો કર્યો કે ઈરાનને મૂંઝવણમાં મૂકવા માટે કેટલાક બોમ્બર્સને ઇરાદાપૂર્વક પેસિફિક મહાસાગર તરફ મોકલવામાં આવ્યા હતા. આને "ડિકોય મિશન" કહેવામાં આવ્યું હતું અને તેના વિશે ફક્ત થોડા વરિષ્ઠ અધિકારીઓ જ વાકેફ હતા.
ટ્રમ્પનો આદેશ અને ઈરાનના હવાઈ સંરક્ષણની નિષ્ફળતા:
આ હુમલો યુએસ પ્રમુખ ડોનાલ્ડ ટ્રમ્પના તે નિવેદન પછી થયો છે, જેમાં તેમણે કહ્યું હતું કે તેઓ આગામી બે અઠવાડિયામાં ઈઝરાયલને ઈરાન પરના હુમલામાં ટેકો આપશે કે નહીં તે અંગે નિર્ણય લેશે. પરંતુ માત્ર બે દિવસ પછી, તેમણે વ્હાઇટ હાઉસના સિચ્યુએશન રૂમમાંથી મિશનનું નિરીક્ષણ કરતી વખતે આ હુમલાઓનો આદેશ આપી દીધો.
જનરલ કેને ભારપૂર્વક જણાવ્યું કે, "ઈરાને અમેરિકાના વિમાનોને તેમના હવાઈ ક્ષેત્રમાં પ્રવેશ કરતી વખતે કે બહાર જતી વખતે કોઈપણ પ્રકારનો હુમલો કર્યો ન હતો. ટોમાહોક મિસાઈલ ઇસ્ફહાન પર હુમલો કરવાની છેલ્લી મિસાઈલ હતી, જેથી અમેરિકા ઈરાનને છેલ્લી ઘડી સુધી મૂંઝવણમાં રાખી શકે." તેમણે ગર્વભેર કહ્યું કે, "આપણે કહી શકીએ છીએ કે ઈરાનની સપાટીથી હવામાં પ્રહાર કરતી મિસાઇલ સિસ્ટમ આપણને પકડી શકી નથી."
યુએસ સંરક્ષણ સચિવ પીટ હેગસેથે આ કાર્યવાહીને "ઐતિહાસિક સફળતા" ગણાવી અને જાહેર કર્યું કે "ઈરાનનો પરમાણુ કાર્યક્રમ હવે સંપૂર્ણપણે નાશ પામ્યો છે." તેમણે પુનરોચ્ચાર કર્યો કે "રાષ્ટ્રપતિ ટ્રમ્પે પહેલા દિવસથી જ સ્પષ્ટ કરી દીધું છે કે ઈરાનને ક્યારેય પરમાણુ શસ્ત્રો મેળવવાની મંજૂરી આપવામાં આવશે નહીં." આ ઓપરેશન વૈશ્વિક સ્તરે મોટી ભૂ-રાજકીય અસર કરશે તે નિશ્ચિત છે.