લખનૌ, તા., ૨૩ : અલ્‍હાબાદ હાઈકોર્ટની લખનૌ બેન્‍ચે એક સનસનાટીભર્યો અને ઐતિહાસિક ચુકાદો આપ્‍યો છે, જેમાં વિવાદાસ્‍પદ વકીલ અશોક પાંડેને અદાલતી અવમાનના બદલ કડક સજા ફટકારવામાં આવી છે. ન્‍યાયમૂર્તિ વિવેક ચૌધરી અને ન્‍યાયમૂર્તિ બળજરાજ સિંહની ખંડપીઠે અશોક પાંડેને છ મહિનાની સાદી કેદ, રૂા.૨૦૦૦/- નો દંડ અને આગામી ત્રણ વર્ષ માટે અલ્‍હાબાદ તેમજ લખનૌ હાઈકોર્ટમાં પ્રવેશ પર પ્રતિબંધ મૂકી દીધો છે. જો પાંડે એક મહિનાની અંદર દંડ નહીં ભરે તો તેમને વધુ એક મહિનાની જેલ ભોગવવી પડશે.

કોર્ટે સ્‍પષ્ટપણે જણાવ્‍યું હતું કે, આ નિર્ણય ૧૦ એપ્રિલ, ૨૦૨૫ ના અગાઉના આદેશની પુનર્વિચાર અરજી બાદ લેવામાં આવ્‍યો છે. અદાલતે ખાસ કરીને નોંધ્‍યું હતું કે, અશોક પાંડે વારંવાર કોર્ટની સૂચનાઓ છતાં અયોગ્‍ય વષાો (જેમાં શર્ટના ટોચના બટનો ખુલ્લા રાખવાનો સમાવેશ થાય છે) પહેરીને હાજર થતા હતા, જે અદાલતના ગૌરવ અને શિસ્‍તનું ઉલ્લંઘન હતું. માફીનો પ્રયાસ પણ નકામો છે.

અશોક પાંડે દ્વારા દાખલ કરવામાં આવેલી રિકોલ એપ્‍લિકેશન અને માફીના શપથપત્રને કોર્ટે અમાન્‍ય ગણાવ્‍યું હતું. અદાલતે ટિપ્‍પણી કરી હતી કે, તેમની માફીનો પ્રયાસ સમયસર અને ગુણદોષવાળો નહોતો. કોર્ટે એ પણ નોંધ્‍યું કે, પાંડે અગાઉ ૨૦૧૭ માં પણ ત્રણ મહિનાની જેલની સજા ભોગવી ચૂકયા છે, અને હાલમાં તેમની સામે અન્‍ય છ કન્‍ટેમ્‍પ્‍ટ કેસ પણ વિચારણા હેઠળ છે. આ પૂર્વ રેકોર્ડને ધ્‍યાને રાખીને, અદાલતે દંડમાં કોઈ પણ પ્રકારની છૂટછાટ આપવાનો ઇનકાર કર્યો હતો.

અદાલતે કડક શબ્‍દોમાં કહ્યું કે, અશોક પાંડે પોતાના વર્તનમાં સુધારો લાવવાનું કોઈ પ્રમાણ આપી શકે તેવા દસ્‍તાવેજ રજૂ કરી શકયા નથી, અને તેમનો માફીનો પ્રયાસ માત્ર સજા ટાળવા માટેનો દેખીતો પ્રયત્‍ન છે.

આ આદેશ અનુસાર, અશોક પાંડેએ હવે બે મહિનાની અંદર લખનૌના મુખ્‍ય ન્‍યાયમૂર્તિ સમક્ષ સરેન્‍ડર કરવું પડશે. આ ઉપરાંત, તેમને એક મહિનાની અંદર રૂા. ૨૦૦૦/- નો દંડ ભરવાનો રહેશે, અન્‍યથા તેમને વધુ એક મહિનાની કેદ ભોગવવી પડશે.

આ ચુકાદો ભારતીય ન્‍યાયપાલિકા દ્વારા અદાલતની ગરિમા, શિસ્‍ત અને સન્‍માન જાળવવા માટે લેવામાં આવેલી કડક અને સ્‍પષ્ટ કાર્યવાહીનું એક ઉત્તમ ઉદાહરણ બની રહ્યો છે. આ કિસ્‍સો ભવિષ્‍યમાં પણ વકીલો અને સામાન્‍ય નાગરિકો માટે અદાલતી મર્યાદાઓનું પાલન કરવા અંગે એક દાખલારૂપ બનશે.