વોશિંગ્‍ટન,તા.૨૩: અમેરિકાએ રવિવારે સવારે ઈરાનના ત્રણ પરમાણુ સ્‍થળો પર હવાઈ હુમલો કર્યો. અમેરિકાએ ઈરાનના પરમાણુ સ્‍થળોને નિશાન બનાવતા આ ઓપરેશનને મિડનાઈટ હેમર નામ આપ્‍યું છે. નામ પ્રમાણે, અમેરિકાએ રાત્રે ઈરાનમાં મોટા હુમલા કર્યા. અમેરિકા અને ઇઝરાયલે દાવો કર્યો છે કે આ હુમલાઓથી ઇરાનના પરમાણુ કાર્યક્રમને ભારે નુકસાન થયું છે. આ યુએસ ઓપરેશન વિશે કેટલીક નવી વિગતો બહાર આવી છે, જેમાં યુએસ એરફોર્સે ઈરાની ધરતી પર ઝડપી હુમલા કર્યા હતા. આ ઓપરેશન માટે અમેરિકાએ ૧૩૦ થી વધુ જેટ, આધુનિક મિસાઇલો અને ૧૪,૦૦૦ કિલોગ્રામ ભૂગર્ભ બંકર બસ્‍ટર બોમ્‍બનો ઉપયોગ કર્યો હતો.

અમેરિકાએ ટૂંકા સમયમાં ઈરાનને વધુ નુકસાન પહોંચાડવાની રણનીતિ પર કામ કર્યું, તેથી તેણે તેના ઓપરેશનનું નામ મિડનાઈટ હેમર રાખ્‍યું. યુએસ ચીફ ઓફ સ્‍ટાફ જનરલ ડેન કેને કહ્યું છે કે ઓપરેશન મિડનાઈટ હેઠળ અમેરિકાએ ઈરાનના પરમાણુ સ્‍થળો પર હુમલો કરવા માટે ૭ બી-૨ સ્‍ટીલ્‍થ બોમ્‍બરનો ઉપયોગ કર્યો હતો. આ ૭ બોમ્‍બર્સની સાથે, ૧૨૫ થી વધુ ફાઇટર પ્‍લેન પણ ઈરાન પરના હુમલામાં સામેલ હતા. ઈરાનના ભૂગર્ભ સુવિધાઓ પર બંકર બસ્‍ટર બોમ્‍બ ફેંકવા માટે ૭ B-2 સ્‍ટીલ્‍થ બોમ્‍બર્સનો ઉપયોગ કરવામાં આવ્‍યો હતો.

જનરલ કેને જણાવ્‍યું હતું કે યુએસ બોમ્‍બરોએ બે ઈરાની પરમાણુ સુવિધાઓ, ફોર્ડો અને નાટાન્‍ઝ પર એક ડઝનથી વધુ ૩૦,૦૦૦ પાઉન્‍ડના મેસિવ ઓર્ડનન્‍સ પેનિટ્રેટર (MOP) બંકર બસ્‍ટર બોમ્‍બ ફેંકયા હતા. જેથી ભૂગર્ભ સુવિધાઓનો નાશ થઈ શકે. તે જ સમયે, ઇસ્‍ફહાનમાં પરમાણુ સ્‍થળ પર ટોમાહોક મિસાઇલો છોડવામાં આવી હતી. તેમણે એમ પણ કહ્યું કે ઓપરેશન મિડનાઈટ હેમરમાં ઈરાની સૈનિકો કે ઈરાની લોકોને નિશાન બનાવવામાં આવ્‍યા ન હતા.

કેને આગળ કહ્યું, ઈરાની લડાકુ વિમાનો તરફથી કોઈ પ્રતિભાવ મળ્‍યો ન હતો, તેમણે ઉડાન પણ ભરી ન હતી. એવું લાગે છે કે ઈરાનની સપાટીથી હવામાં પ્રહાર કરતી મિસાઇલ સિસ્‍ટમ્‍સે સમગ્ર મિશન દરમિયાન અમને શોધી શકયા નહીં. અમે તેમને આﾍર્યચકિત કરવાનું ચાલુ રાખ્‍યું છે. તેમણે કહ્યું કે રાષ્‍ટ્રપતિ ડોનાલ્‍ડ ટ્રમ્‍પના આદેશ પર કરવામાં આવેલા આ ઓપરેશનમાં ઈરાનના પરમાણુ કાર્યક્રમનો નાશ કરવામાં આવ્‍યો છે.

ઈરાન પર હુમલો કરતા પહેલા, અમેરિકાએ મિઝોરીના વ્‍હાઇટમેન એરફોર્સ બેઝથી બી-૨ સ્‍પિરિટ સ્‍ટીલ્‍થ બોમ્‍બર્સ, પેસિફિકમાં યુએસ બેઝ, ગુઆમ પરના વ્‍યૂહાત્‍મક એરબેઝ પર તૈનાત કર્યા હતા. જનરલ કેને કહ્યું કે યુએસ એરફોર્સે પેસિફિક ક્ષેત્રમાં બોમ્‍બર્સને તૈનાત કરીને આ ઓપરેશનમાં છેતરપિંડી રણનીતિનો ઉપયોગ કર્યો.

ઈરાની મીડિયાએ અહેવાલ આપ્‍યો છે કે રવિવારે બુશેહર પ્રાંતમાં પણ એક મોટો વિસ્‍ફોટ થયો હતો, જ્‍યાં ઈરાનનો એકમાત્ર પરમાણુ પાવર પ્‍લાન્‍ટ આવેલો છે. અમેરિકાના પરમાણુ સ્‍થળો પર બોમ્‍બમારો થયાના થોડા કલાકો પછી જ આ બન્‍યું. ઈરાની સમાચાર એજન્‍સીઓએ યઝદ પ્રાંતમાં પણ હુમલાના અહેવાલ આપ્‍યા હતા. ઈરાને સ્‍વીકાર્યું છે કે તેના પરમાણુ સ્‍થળો પર અમેરિકાના હુમલાને કારણે તેને નુકસાન થયું છે.

ઈરાન પર અમેરિકાના B-2 બોમ્‍બર જેટના હુમલા બાદ ચર્ચા થઈ રહી છે. આ જેટનો ઉપયોગ ઘણા સમય પછી થયો છે. આ જેટ એક સાથે બે GBU-57 મેસિવ ઓર્ડનન્‍સ પેનિટ્રેટર (MOP) બોમ્‍બ લઈ જઈ શકે છે. તે ઈરાનની ફોર્ડો સુવિધા જેવા ઊંડા દટાયેલા લક્ષ્યોને નિશાન બનાવવા માટે રચાયેલ છે. કારણ કે તે જમીનની અંદર ઊંડે સુધી ઘૂસી જાય છે અને લક્ષ્યને ભેદી જાય છે, તેને બંકર બસ્‍ટર બોમ્‍બ કહેવામાં આવે છે.

B-2 બોમ્‍બર એવી રીતે ડિઝાઇન કરવામાં આવ્‍યું છે કે પરંપરાગત રડાર પર તેને શોધવું મુશ્‍કેલ બની જાય છે. તેની ઉડતી પાંખની ડિઝાઇન, રડાર-શોષક સામગ્રી અને ઓછી ઇન્‍ફ્રારેડ સિગ્નેચરને કારણે, તેનો રડાર ક્રોસ સેક્‍શન લગભગ ૦.૦૦૧ ચોરસ મીટર છે, જે નાના પક્ષીના ક્રોસ સેક્‍શન જેટલો છે. આ ક્ષમતા તેને દુશ્‍મનના પ્રદેશમાં રક્ષણ આપે છે.

અમેરિકાએ ઈરાનમાં બંકર બસ્‍ટર બોમ્‍બ અને ટોમાહોક મિસાઈલનો ઉપયોગ કરવાની વાત કરી છે. બંકર બસ્‍ટર બોમ્‍બ એટલે કે GBU-57A/B મેસિવ ઓર્ડનન્‍સ પેનિટ્રેટર બોઇંગ દ્વારા ડિઝાઇન કરવામાં આવ્‍યું છે. તે યુએસ એરફોર્સ પાસે રહેલો સૌથી શક્‍તિશાળી બિન-પરમાણુ બોમ્‍બ હોવાનું કહેવાય છે. આ બોમ્‍બ બંકરોને નષ્ટ કરવા માટે બનાવવામાં આવ્‍યો છે.

છ મીટર લાંબો GBU-57 બંકર બસ્‍ટર બોમ્‍બ વિસ્‍ફોટ કરતા પહેલા સપાટીથી આશરે ૬૧ મીટર જાડા કોંક્રિટ સ્‍તરમાં પ્રવેશ કરવા સક્ષમ છે. GBU-57A/B મેસિવ ઓર્ડનન્‍સ પેનિટ્રેટરનું વજન આશરે ૧૪,૦૦૦ કિલોગ્રામ છે. તે આશરે ૨૦.૫ ફૂટ ઊંચું છે અને તેનો વ્‍યાસ ૩૧.૫ ઇંચ છે. તેના હથિયાર, AFX-757 અને PBXN-114 વિસ્‍ફોટકોનું મિશ્રણ, લગભગ ૨,૫૦૦ કિલોગ્રામ વજન ધરાવે છે.

અમેરિકાએ ઈરાનના પરમાણુ સ્‍થળો પર ટોમાહોક મિસાઈલ પણ છોડી છે. ટોમાહોક એક લાંબા અંતરની ઓલ-વેધર સબસોનિક ક્રુઝ મિસાઇલ છે. ટોમાહોક ક્રુઝ મિસાઇલને દૂરથી લક્ષ્ય પર હુમલો કરવા માટે સૌથી સચોટ હથિયાર માનવામાં આવે છે. આ મિસાઈલની મારક ક્ષમતા ૧૨૫૦ કિલોમીટરથી ૨૫૦૦ કિલોમીટરની વચ્‍ચે છે. ટોમાહોક મિસાઇલને સબમરીન અથવા યુદ્ધ જહાજમાંથી છોડી શકાય છે.

ટોમાહોક મિસાઇલ ખતરનાક માનવામાં આવે છે કારણ કે તે લક્ષ્ય સુધી સીધી રેખામાં મુસાફરી કરતી નથી. આવી સ્‍થિતિમાં, તેને વચ્‍ચેથી ફટકારીને નીચે પાડી શકાય નહીં. ટોમાહોક મિસાઇલને અદ્યતન નેવિગેશન સિસ્‍ટમ દ્વારા માર્ગદર્શન આપવામાં આવે છે. આ મિસાઇલની ગતિ ૮૮૫.૧૩૯ કિલોમીટર પ્રતિ કલાકથી ૧૪૧૬.૨૨ કિલોમીટર પ્રતિ કલાક સુધીની છે.