મોસ્કો : ઈઝરાયલ અને ઈરાન વચ્ચેના 10 દિવસના સંઘર્ષને કારણે આજે વિશ્વમાં ત્રીજા વિશ્વયુદ્ધનો ખતરો વધી ગયો છે. તે જ સમયે, ઈરાન પર અમેરિકાના હુમલા પછી, રશિયાએ સોમવારે ઈરાનને શક્ય તમામ મદદ કરવાનું વચન આપ્યું હતું. ક્રેમલિનના પ્રવક્તા દિમિત્રી પેસ્કોવે સોમવારે કહ્યું કે વધતા તણાવ વચ્ચે રશિયા ઈરાનને તમામ પ્રકારની મદદ કરવા તૈયાર છે. તેમણે કહ્યું કે ઈરાનને કેવા પ્રકારની મદદની જરૂર છે તે તેહરાન નક્કી કરે છે. પેસ્કોવે કહ્યું કે અમે ઈરાનને મધ્યસ્થી કરવાની ઓફર કરી છે. આ અમારા તરફથી એક મજબૂત મદદ છે. ઈરાનને જે પણ જરૂર છે, અમે તે મુજબ મદદ કરવા તૈયાર છીએ.

ઈરાન અને ઈઝરાયલ વચ્ચે ચાલી રહેલા તણાવ પર રશિયાએ પણ પોતાનું વલણ સ્પષ્ટ કર્યું છે. પેસ્કોવે કહ્યું કે રશિયાનું આ વલણ ઈરાન માટે સમર્થનનો એક મહત્વપૂર્ણ માર્ગ પણ છે. તેમણે કહ્યું કે અમે આ મુદ્દા પર ખુલ્લેઆમ વિશ્વ સમક્ષ અમારો પક્ષ રજૂ કર્યો છે. આ ઈરાન માટે અમારા સમર્થનનો પણ સંકેત છે. પેસ્કોવે એમ પણ કહ્યું કે રશિયન રાષ્ટ્રપતિ વ્લાદિમીર પુતિન અને યુએસ પ્રમુખ ડોનાલ્ડ ટ્રમ્પ વચ્ચેની તાજેતરની વાતચીતમાં ઈરાનનો મુદ્દો ઘણી વખત ઉઠાવવામાં આવ્યો છે. તેમણે કહ્યું કે રાષ્ટ્રપતિ પુતિન અને ટ્રમ્પ વચ્ચેની તાજેતરની વાતચીતમાં ઈરાનનો ઉલ્લેખ ઘણી વખત કરવામાં આવ્યો છે.

રશિયન રાષ્ટ્રપતિ વ્લાદિમીર પુતિને ઈરાનના પરમાણુ ઠેકાણાઓ પર યુએસ હુમલાઓની સખત નિંદા કરી છે. તેમણે સોમવારે મોસ્કોમાં ઈરાનના વિદેશ પ્રધાન અબ્બાસ અરાઘચી સાથેની મુલાકાત દરમિયાન આ હુમલાઓને બિનજરૂરી ગણાવ્યા હતા. પુતિને કહ્યું કે તમે એવા સમયે રશિયા આવ્યા છો જ્યારે તમારા દેશ અને સમગ્ર પ્રદેશમાં પરિસ્થિતિ ખૂબ જ તણાવપૂર્ણ છે. તેમણે યુએસ હુમલાઓને ખોટા ગણાવ્યા

પુતિને વધુમાં કહ્યું કે અમે ઈરાની લોકોને મદદ કરવા માટે અમારા સ્તરે પ્રયાસ કરી રહ્યા છીએ. તેમણે આશા વ્યક્ત કરી કે ઈરાની વિદેશ પ્રધાન સાથેની આ મુલાકાત વર્તમાન પરિસ્થિતિ પર ગંભીર ચર્ચા કરવાની તક પૂરી પાડશે અને બંને દેશો સાથે મળીને ઉકેલ શોધી શકશે. તમને જણાવી દઈએ કે પુતિનનું આ નિવેદન એવા સમયે આવ્યું છે જ્યારે ઇઝરાયલ અને ઈરાન વચ્ચે શરૂ થયેલો તણાવ આજે વૈશ્વિક ખતરો બનવાની આરે છે. કારણ કે રવિવારે અમેરિકાએ પણ ઈરાનના ત્રણ પરમાણુ સ્થળો પર હુમલો કરીને નાશ કર્યો હતો. જેના કારણે સમગ્ર પશ્ચિમ એશિયામાં અશાંતિનું વાતાવરણ છે. તેમણે કહ્યું કે રશિયા ઈરાની લોકોને દરેક શક્ય રીતે મદદ કરવાનો પ્રયાસ કરી રહ્યું છે.