25 જૂન 2025: પંજાબમાં ભગવંત માન સરકાર દ્વારા નશા વિરુદ્ધ ચાલી રહેલી કાર્યવાહી વચ્ચે, બુધવારે (25 જૂન, 2025) એક મોટી રાજકીય ઘટના બની છે. શિરોમણી અકાલી દળ (SAD) ના વરિષ્ઠ નેતા અને ભૂતપૂર્વ કેબિનેટ મંત્રી બિક્રમ સિંહ મજીઠિયાની ધરપકડ કરવામાં આવી છે. આ કાર્યવાહી પંજાબ વિજિલન્સ બ્યુરો દ્વારા માદક દ્રવ્યો સંબંધિત એક કેસમાં રાજ્યભરમાં 25 સ્થળોએ દરોડા પાડ્યા બાદ કરવામાં આવી છે, જેમાં મજીઠિયાના અમૃતસર સ્થિત આવાસનો પણ સમાવેશ થાય છે.

આવક કરતા વધુ સંપત્તિનો દાવો, વિજિલન્સનું મૌન?

મજીઠિયાની પત્ની અને અકાલી દળના ધારાસભ્ય ગનીવ કૌર મજીઠિયાએ દાવો કર્યો છે કે બિક્રમ વિરુદ્ધ આવક કરતા વધુ સંપત્તિ (Disproportionate Assets) નો કેસ દાખલ કરવામાં આવ્યો છે. જોકે, વિજિલન્સ બ્યુરોએ હજુ સુધી કયા ચોક્કસ કેસમાં મજીઠિયાની ધરપકડ કરવામાં આવી છે તેની વિગતોની પુષ્ટિ કરી નથી. મજીઠિયા 2021ના માદક દ્રવ્યોના એક કેસમાં પણ તપાસનો સામનો કરી રહ્યા છે.

જબરદસ્તી પ્રવેશના આક્ષેપો અને વિરોધ

મજીઠિયા અને તેમની પત્નીએ આરોપ લગાવ્યો છે કે વિજિલન્સ બ્યુરો સભ્યો તેમના અમૃતસરના ગ્રીન એવન્યુ સ્થિત ઘરમાં જબરદસ્તી ઘૂસી આવ્યા અને તેમના બાળકોને પણ ડરાવ્યા. તેમણે ચંદીગઢ સ્થિત તેમના નિવાસસ્થાને પણ સમાન દરોડા પાડવામાં આવ્યા હોવાનો દાવો કર્યો.

શિરોમણી અકાલી દળના પ્રમુખ સુખબીર સિંહ બાદલ, તેમની પત્ની હરસિમરત કૌર બાદલ અને અનેક વરિષ્ઠ અકાલી નેતાઓએ મજીઠિયાના નિવાસસ્થાને દરોડાને લઈને આમ આદમી પાર્ટી (AAP) ની આગેવાની હેઠળની રાજ્ય સરકાર પર નિશાન સાધ્યું છે. કૌરે પત્રકારોને જણાવ્યું કે "અમે લડાઈ ચાલુ રાખીશું. લોકો મજીઠિયાની સાથે ઊભા રહેશે."

મજીઠિયાનો સરકાર પર પ્રહાર: "હું ન તો ડરીશ, ન તો મારી અવાજ દબાશે!"

બિક્રમ મજીઠિયાએ પોતે પણ વિજિલન્સ અધિકારીઓ પર ઘરમાં જબરદસ્તી પ્રવેશ કરવાનો અને તેમના બાળકોને ડરાવવાનો આરોપ લગાવ્યો. તેમણે 'X' પર એક વીડિયો શેર કર્યો છે, જેમાં તેઓ એક અધિકારી સાથે દલીલ કરતા જોવા મળે છે. મજીઠિયાએ ભગવંત માન સરકાર પર વિપક્ષી નેતાઓની અવાજ દબાવવા માટે આવા હથકંડા અપનાવવાનો આરોપ લગાવ્યો.

મજીઠિયાએ 'X' પોસ્ટમાં જણાવ્યું કે, "ભગવંત માન જી, આ સમજી લો, તમે ભલે ગમે તેટલી FIR નોંધો, હું ન તો ડરીશ અને ન તો તમારી સરકાર મારી અવાજ દબાવી શકશે. મેં હંમેશા પંજાબના મુદ્દાઓ પર વાત કરી છે અને આગળ પણ કરતો રહીશ. મને અકાલ પુરખ, ગુરુ સાહિબ પર પૂરો ભરોસો છે. અંતે સત્યની જીત થશે."

મજીઠિયા 2007, 2012 અને 2017 માં મજીઠા વિધાનસભા ક્ષેત્રમાંથી ચૂંટણી જીતીને પંજાબ સરકારમાં કેબિનેટ મંત્રી રહી ચૂક્યા છે. જોકે, 2022ની પંજાબ વિધાનસભા ચૂંટણીમાં તેમને હાર મળી હતી.

આ ધરપકડ પંજાબના રાજકારણમાં શું નવો વળાંક લાવશે? શું ભગવંત માન સરકારની નશા વિરોધી ઝુંબેશ વધુ વેગ પકડશે, કે પછી આને રાજકીય કિન્નાખોરી તરીકે જોવામાં આવશે?