અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર મોટું નિવેદન આપ્યું છે. નેધરલેન્ડ્સના હેગમાં એક કાર્યક્રમ દરમિયાન ટ્રમ્પે દાવો કર્યો હતો કે તેમણે ભારત અને પાકિસ્તાન વચ્ચે સંભવિત પરમાણુ યુદ્ધ અટકાવ્યું છે. તેમનું કહેવું છે કે તેમણે બંને દેશોના નેતાઓને ફોન કરીને તેમને સમજાવ્યા અને વેપાર કરાર દ્વારા શાંતિનો માર્ગ બતાવ્યો. ટ્રમ્પે કહ્યું, "સૌથી મહત્વપૂર્ણ વાત એ હતી કે મેં ફોન કોલ દ્વારા તેનો અંત લાવ્યો. મેં ભારત અને પાકિસ્તાનને કહ્યું હતું કે જો તમે લડશો તો કોઈ વેપાર કરાર થશે નહીં."

ટ્રમ્પના મતે, તાજેતરમાં એક પાકિસ્તાની જનરલ તેમને મળ્યા હતા, જ્યારે તેમણે ભારતના વડા પ્રધાન નરેન્દ્રભાઈ  મોદીને તેમના "મહાન મિત્ર અને મહાન વ્યક્તિ" ગણાવ્યા હતા.

પીએમ મોદીની પ્રશંસા કરતા ટ્રમ્પે કહ્યું, "વડાપ્રધાન મોદી મારા ખૂબ સારા મિત્ર છે. તેઓ એક સજ્જન, મહાન વ્યક્તિ છે. મેં બંને દેશોને સમજાવ્યું હતું કે જો તમે એકબીજા સાથે લડશો તો અમેરિકા કોઈ વેપાર કરાર પર હસ્તાક્ષર કરશે નહીં." તેમના મતે, આ ચેતવણી પછી, બંને દેશો પાછળ હટી ગયા અને યુદ્ધનો ભય ટળી ગયો.

ટ્રમ્પના સૌથી ચોંકાવનારા દાવાઓમાંનો એક એ હતો કે તેમણે ભારત અને પાકિસ્તાન વચ્ચે પરમાણુ યુદ્ધ અટકાવ્યું. તેમણે કહ્યું, "ના, અમે વેપાર કરાર કરવા માંગીએ છીએ અને અમે પરમાણુ યુદ્ધ અટકાવ્યું."

ટ્રમ્પે અગાઉ પણ ઘણી વખત ભારત-પાકિસ્તાન વિવાદમાં મધ્યસ્થી કરવાની ઓફર કરી છે. જોકે, ભારતે હંમેશા સ્પષ્ટ કર્યું છે કે કાશ્મીર અને દ્વિપક્ષીય મુદ્દાઓ કોઈપણ ત્રીજા પક્ષની મધ્યસ્થી દ્વારા ઉકેલાતા નથી.